Espoza PR husu Governu kria programa proteje direitu Labarik

Espoza Prezidente Repúblika, Francisco Guteres Lu Olo, Cidália Nobre Lopes Mouzinho Guterres, husu ba governu atu kria programa ne’ebé diak atu nune’e bele proteje direitu labarik, nune’e labarik hotu bele livre husi violensia no bele  ezerse sira nia direitu nu’udar labarik.

“Ha’u hanoin , ita nia Estadu preve  Estadu nia rekoñesimentu  ba labarik sira, ne’ebé hatur ona iha Konstituisaun RDTL artigu 18 hodi koalia kona-bá protesaun ba labarik sira”, afirma Cidália Nobre Lopes Mouzinho Guterres, ba jornalista sira   iha edifísiu Sektretaria Estadu Joventude no Desportu (SEJD), segunda (25/11/2019) bainhira partisipa iha  komemorasaun loron mundial labarik.

Espoza Prezidente Repúblika hatete, ho konvensaun direitu labarik ne’ebé prevé ita hakarak governu no Ministériu relevante sira tenke kria programa ida ne’ebé diak, oinsa atu protégé labarik husi violensia nune’e labarik sira bele hala’o sira nia kna’ar ho diak no bele ezerse sira nia direitu, ne’ebé tau ona iha konvensaun direitu labarik .

“ Kampaha ida ohin kona-ba labele sosa sasan husi labarik, ha’u hanoin fila-fali ba ema bo’ot katak, bainhira ema boot mak fo presaun ameasa hodi haruka labarik sira halo servisu mak labarik sira tenke halo, entaun hau hanoin ida ne’e presiza mos inan-aman ema hotu tenke hatene direitu labarik nian no laos direitu ba buat hotu maibé iha parte balun ne’ebé presiza inan-aman nia atensaun”, afirma Cidália Mouzinho Guterres.

Inan ba Nasaun subliña, iha nia vizita ba fatin balun konsege hasoru vitima violasaun seksual husi ema bo’ot ba labarik feto ne’ebé fa’an hela sasan iha dalan, tanba ne’e husu ba parte relevante hotu atu fo sansaun maka’as ba autor ne’ebé halo violasaun hasoru labarik sira.

Komisária Komisaun Direitu Labarik, Dinorah Granadeiro hatete, iha komemorasaun loron mundial labarik atu fo hanoin fali ba Estadu atu investe nune’e labarik sir abele hetan nia direitu nu’udar labarik.

“Iha mos fenomena seluk ne’ebé hatudu labarik barak mak kontinua fa’an sasan iha estrada hodi kontribui ba rendimentu familia, tanba ne’e iha komemorasaun ne’e aprova lansa kampaña nasionál konaba mai ita hapara violensia hasoru labarik hahu agora no  labele sosa sasan husi labarik, dehan Komisária Komisaun Direitu Labarik.

Dinorah Granadeiro haktuir, Komisaun direitu labarik rekoñese katak, situasaun violensia hasoru labarik no obriga labarik fa’an sasan imediatamente ita atu hakotu labele, tanba ida ne’e situasaun sosiais no asuntu sosiais sai asuntu ida ne’ebé komplikadu.

Maibé sei hakarak hakotu situasaun violensia hasoru labarik no obriga labarik fa’an sasan, mak ita tenke servisu hamutuk entre entidade hotu tanba komisaun mesak komisaun  labele halo buat ida, maske nune’e komisaun halo esforsu ho entidades relevante atu bele resolve problema sira ne’ebe mak ladauk resolve too ohin loron. Fel