JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN hakarak PR eleitu mak nomeia PTR no PJR foun

PN hakarak PR eleitu mak nomeia PTR no PJR foun

Deputadu Parlamentu Nasionál (PN) hakarak Prezidenti Repúblika foun ne’ebé sei asume husi Francisco Guterres ‘Lu-Olo’ mak nomeia Prezidenti Tribunal Rekursu (PTR) no Prokurador Jeral Repúblika (PJR) foun, tanba Prezidenti Repúblika, Taur Matan Ruak nia mandatu besik remata ona.

Deputadu Francisco Branco husi bankada FRETILIN dehan, agora dadauk maske Prezidenti Tribunal Rekursu hatama ona nia karta rezignasaun, maibé Parlamentu Nasionál tenki akompaña nafatin situasaun ida ne’e.

Prokurador Jeral Repúblika mós remata ona nia mandatu, Prezidenti Repúblika ne’ebé mandatu konstitusionál fó ba nia atu nomeia magistradu rua ne’e, nia tempu mós besik ona atu remata.

“Situasaun ida ne’e ami hanoin katak, so Xefi Estadu foun mak bele nomeia, agora iha periodu ida ne’e, karik di’ak liu para iha viklu ba legal aban bainrua kuandu akontese buat ruma iha dalan ba magistradu na’in rua ne’e, Xefi Estadu foun bele iha poder atu bele hasai desizaun ruma,” dehan Francisco Branco iha plenária PN, Tersa (25/04).

Iha fatin hanesan, Prezidenti Komisaun A, ne’ebé trata asuntu leis no poder local, Carmelita moniz mós dehan, durante ne’e, inspesaun ba magisratura judisial foin mak dala ida.

“Agora hahú ho juiz nain lima ne’ebé atu pasa husi segunda klase ba primeira klase, husi juiz nain lima ne’e mak, Prezidenti Repúblika bele hili ida atu sai Prezidenti Tribunal Rekursu. Tanba ne’e, se bele karik, husu ho haraik aan, Prezidenti Repúblika hein lai avaliasaun ne’e hotu mak ita hodi haree,” relata Carmelita Moniz.

Nia dehan, agora dada’uk ne’e, karik iha desizaun ruma mós se bele nomeia de’it interino ida hodi substitui Prezidenti Tribunal Rekursu, ho Prokurador Jeral Repúblika.

Lee hotu :   Provoka situasaun, F-FDTL ho PNTL sei la tolera "Husu povu hakmatek"

Nune’e mós deputadu Arão Noe husi bankada CNRT hateten katak, Prezidenti Tribunal Rekursu ezerse hela funsaun hanesan supremu Tribunal katak, Tribunal nia orgaun ida ne’ebé aas liu.

“Tanba ne’e mak haree husi saúde ne’e, deputadu sira preokupa no ejizi para oinsa Prezidenti Tribunal Rekursu rezigna-aan ou husu lisensa ba halo tratamentu saúde, atu nune’e fó fatin para ema seluk bele nomeia fali Prezidenti Tribunal Rekursu foun ida, tanba problema ita nia volume servisu ne’ebé mak Tribunal Rekursu halo,” katak Arão Noe.

Nia hatutan, Tribunal Rekursu iha juiz na’in tolu de’it, maibé juiz na’in tolu ne’ekaer matéria rua, ida Tribunal Rekursu, no ida seluk mak Tribunal Kontas.

Arão Noe dehan, Rekursu hotu husi Tribunal hat iha Timor Leste ne’e, Tribunal Rekursu mak deside, no kuandu Governu husu vistu previa ruma kona ba projetu ho nia orsamentu US$ 5 milloens ba leten, Tribunal Rekursu mak tenki halo, tanba Tribunal Rekursu mós ezerse funsaun hanesan Tribunal Kontas.

Nune’e mós, kuandu Prezidenti Repúblika haruka lei ruma atu halo apresiasaun kona ba lei ne’e nia konstitusionalidade, Tribunal Rekursu mak tenki halo.

Entaun kuandu membru Tribunal Rekursu ida mak la efetivu, fó impaktu ba desizaun sira ne’e hotu. Tanba ne’e mak Parlamentu Nasionál sujere atu oinsa Prezidenti Repúblika bele troka lai Prezidenti Tribunal Rekursu, tanba saúde la permiti atu hala’o servisu hirak ne’e.

Arão Noe afirma, Parlamentu Nasionál durante ne’e husu atu Prezidenti Repúblika uza nia kompetensia hodi hapara lai Prezidenti Tribunal Rekursu  husi nia kargu atu bele halo tratamentu saúde, atu nune’e fó fatin ba Konsellu Superior Magistratura nomeia fali juiz ida tu’ur iha ne’eba, atu nune’e desizaun sira ne’e bele la’o lalais, labele iha impaktu ba ema nia direitu ba justisa, labele impaktu mós vistu preve sira ne’ebé mak importante, no apresiasaun lei sira ne’ebé Prezidenti Repúblika husu.

Lee hotu :   MP KONTINUA INVESTIGA KAZU TIRU TIAGO INACIO COELHO

“Prezidenti Tribunal Rekursu hatama ona nia karta rezignasaun, ami husu obrigadu, hein katak bele resolve tiha situasaun ida ne’e iha tempu badak,” dehan Arão Noe.

Nune’e mós deputadu Antoninho Bianco husi bankada FRETILIN hateten, nomeasaun Prezidenti Tribunal Rekursu ho Prokurador Jeral Republika ne’e, di’ak liu hein lai prosesu avaliasaun ba juiz sira nian, depois juiz ne’ebé mak konsidera di’ak liu, bele mós konsidera ba nomeasaun sira hanesan ne’e.

“Governu mós tenki fó hanoin ba Prezidenti Repúblika ba nomeasaun Prokurador Jeral, tuir regras buat sira ne’e tenki la’o didi’ak,” dehan Antoninho.

Iha parte seluk, diretur ezekutivu Judicial Sistem Monotoring Programe (JSMP), Luis Oliveira Sampaio dehan juiz Maria Natercia ho juiz Deolindo do Santos iha mos esperensia atu ba iha prezidente Tribunal Rekursu.

“Ba ami prezidenti tribunal rekursu tenki ema independenti, la iha ligasaun ho partidu politika, atu desizaun ruma ne’ebe nia hasai refleta duni situasaun povu nian no interese nasional,’’ dehan Luis ba jornalista sira iha edificiu JSMP Colmera, Tersa (25/04).

Tantu agora dadaun maioria juiz iha Timor Leste foin iha 3 klase, ida rua mak tama iha 2 klase. Nune’e juiz sira ne’ebe iha TR bele nomea fali ba prezidenti TR, tuir sira nia rejimentu interna.

Tuir Luis, prezidenti TR Guilhermino rezigna an ne’e pasu pozitivu ida, tanba nia hasoru hela dezafiu ba nia saude, tan ne’e importante ba nia atu husik kargu ne’e.

 “Ita hotu bele fo solidaridade ba nia atu nune’e nia bele husik nia kargu ne’e hodi bele livre husi situasaun servisu, nune’e nia bele konsentra ba tratamentu nia saude tanba Estadu labele husik ema ida servisu iha situasaun saude ne’ebe todan,’’ koalia Luis.cos/nia

Add to Comments Here!!!!

error: Content is protected.
Secured By miniOrange
You might also like:
Iha ona lei artemarsias, PNTL sei buka tuir artemasiais nebe treinu subar

Lei artemarsias, promulga ona  husi Prezidenti...

PNTL alerta atu sidadaun kontribui ba estabilidade ElPar

Komisariu Polisia Nasional Timor-Leste (PNTL), Julio...

Rezultadu autopsia, Natalia Judith mate tamba sofre korasaun

Rezultadu autopsia husi dotor Patolojia Hospital...

Close