Joven nain 3 hetan hana ho rama ambon

Joven mane  nain tolu (3) hetan  hana  ho  rama ambon  iha Segunda (09/10) kalan tuku 11:10  OTL  husi  ema   deskoñesidu iha Kapital Dili.

Akontesimentu    ema  deskoñesidu hana  ema nain rua  iha Taibesi ne’e, nain ida hetan kanek iha parte kotuk laran, ida seluk  hana iha parte kabas kotuk, no  vítima ida seluk  hana iha Palapasu kanek iha parte liman.

Hafoin akontesimentu ne’e, vítima nain tolu ne’e, família evakua  kedas  ba Hospital Nacional Guido Valadares (HNGV) hodi halo tratamentu intensivu.

“Vítima nain tolu ne’e,  nain rua ema hana iha Taibessi, nain ida  hetan hana iha Palapasu. Maibé vítima  nain rua  agora dadauk   hala’o  hela tratamentu  iha hospital, no  joven ida  iha Palapasu ne’e,  nia saúde  rekopera no  nia hato’o  ona keixa  iha Suku Vera-Cruz,”informa Segundu Komandante  PNTL Superintendente Asistenti Euclides Belo, ba  jornalista iha kuartel Munisípiu Dili, Tersa (10/10).

Euclides haktuir, agora dadauk seksaun  investigasaun  PNTL halo hela investigasaun   ba  vítima   hodi   hatene  kona-ba   motivu husi  kazu refere.

“Komando PNTL Dili horikalan (horibainruak) kedas   ami buka tuir suspeitu    nain  tolu  ne’ebé mak  uza motor,  no motor  ne’e la uza sapa  matríkula. Tanba ne’e mak  ami  buka tuir nafatin  para  hetan paradeiru hodi bele kaptura,” afirma  Euclides Belo.

Euclides konsidera, kazu ne’e  organizadu, maibe la’os atu instabiliza  situasaun Timor-Leste. Grupu sira   ne’ebé  organizadu ne’e, nia dehan, atu halo asaun tentativa  homesidu  ba ema seluk.

“Tanba  ne’e mak liu husi avaliasaun enkontru  ne’ebé  mak ami halo orienta  membru sira  ativu nafatin, halo koordenasaun ho autoridade no komunidade para bele halo prevensaun diak  iha tempu kalan,”dehan Euclides Belo.aba