JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Konsidera akuzasaun, PPN lori karta destituisaun BOAMP ba Tribunal

Konsidera akuzasaun,  PPN lori karta destituisaun BOAMP ba Tribunal

Prezidenti Parlamentu Nasional (PPN) lori Bloku Opozisaun Aliansa Maioria Parlamentar (BOAMP) ba Tribunal Distrital Dili (TDD), tanba konsidera karta destituisaun ne’e, nakonu ho akuzasaun no hatun nia dignidade hanesan PPN.

Aniceto Guterres mós entrega ona karta destituisaun ne’e ba Tribunal Rekursu (TR), hodi husu fiskalizasaun kona ba inkonstitusionalidade.

 “Ohin dader (Horiseik) ha’u hatama tiha ona ha’u nia prosesu rua, ida iha Tribunal Distrital Dili, no ida iha Tribunal Rekursu. Ida Tribunal Rekursu ne’e, kona ba atake konstitusionalidade rejimentu PN nian artigu 15, kona ba destituisaun Prezidenti Parlamentu Nasional. Prosesu ba Tribunal Distrital Dili ne’e, kona ba prosesu sivil ida ne’ebé hanaran, providensia tatelar ba proposta rekursu opozisaun nian mai PPN, tanba iha konteudu proposta ne’e, balu ofende los ha’u, inventa sasan no foti lia bobar hasoru ha’u,”informa Aniceto Guterres liu husi konferensia ba imprensa iha PN, Segunda (11/12).

Aniceto dehan, deputadu sira opozisaun hatene hela saida mak konstituisaun hateten, tanba barak mak tinan 10 ona asume kna’ar iha PN, maibé sira tau aan hanesan ema ne’ebé la kompriende.

PPN ne’e esklarese, nia hatama prosesu ida tan iha TDD, tanba razaun sira ne’ebé hakerek iha proposta rekursu ne’e, hanesan razaun infantil sira nian.

Aniceto dehan, agora ba oin nia sei asume nafatin kargu PPN, to’o TR rejeita nia pedidu kona ba karta destituisaun ne’e.

“Razaun sira ne’ebé sira (Opozisaun) aprezenta atu halo destituisaun mai ha’u ne’e, fera ha’u-nia dignidade, kontra ha’u-nia onra no ha’u-nia reputasaun. Sira akuza ha’u dehan, ha’u lakon kapasidade atu konvense Prezidenti Repúblika, sira hateten lia falsu tiha ona, depois sira hateten tan ha’u dehan, ha’u laiha kapasidade atu konvense Prezidenti Repúblika,”katak Aniceto.

Lee hotu :   PCIC identifika ona autor posting video RS iha FB

PPN ne’e afirma, ho akuzasaun falsu sira ne’e, nia senti ofendidu tebes, no nu’udar sidadaun nia iha direitu atu lori kazu ne’e ba TDD, tanba konstituisaun mós garante sidadaun ida-idak-nia direitu atu asesu ba justisa, ba kualker situasaun ne’ebé ofende ema ida-idak nia dignidade.

“Sira kestiona ha’u-nia imparsialidade labuat ida, maibé to’o ona ha’u-nia onra no dignidade, ha’u kuandu defende lia los ne’e, mate mós ha’u la tauk. Nu’udar polítiku, kuandu sira tama ho polítika, ha’u sei hatan ho polítika, tanba ha’u mós polítiku, maibé kuandu sira halo akuzasaun oi-oin,” katak Aniceto.

Prezidenti Parlamentu Nasional (PPN), Aniceto Guterres mós hateten, asaun polítika ne’ebé Bloku Opozisaun Aliansa Maioria Parlamentar (BOAMP) halo durante ne’e, hakarak hadau poder husi Koligasaun FRETILIN no Partidu Demokrátiku (PD).

“Durante fulan tolu ha’u assume funsaun nu’udar PPN, ha’u hasoru opozisaun ida ne’ebé abuza liu sira-nia maioria iha PN, ne’ebé uza dalan hotu atu atinji sira nia objetivu polítika hamonu lalais Governu,”afirma Aniceto Guterres.

Tanba ne’e mak, hafoin forma tiha, AMP uza dalan oi-oin ka halo maneira hotu atu hamonu VII Governu konstitusional, hahú kedas halo presaun ba Prezidenti Repúblika, rejeita programa Governu, tenta atu blokeia Orsamentu Retifikativu (OR), no mosaun sensura ba Governu.

Nia haktuir, ho nune’e mak, iha loron 1 Desembru lorokraik, opozisaun mós hatama proposta atu hatun PPN, ne’ebé asina husi grupu deputadu nain 12 opozisaun AMP nian.

Aniceto dehan, haree husi razaun sira ne’ebé opozisaun AMP aprezenta iha sira- nia karta destituisaun ne’e, hatudu momos katak, husi proposta ne’e, opozisaun AMP hakarak hatur PPN ida ne’ebé bele fasilita hamonu lalais Governu, liu husi ajendamentu urjensia mosaun sensura ba Governu.

Lee hotu :   Hametin paz, Autoridade Suku Madohi realiza diálogu ho KPK

PPN nu’udar segundu figura Estadu nian, tanba ne’e, nia iha dever tomak atu haree ba prátika normal ka presedente iha PN no kultura vida institusional Estadu, no li-liu tenki halo mós ponderasaun ba interese nasional ne’ebé sai kauza ho nia eventuais kustus polítiku, sosial no ekonómiku ba nasaun, bainhira halo desizaun atu halo ajendamentu ba Rekursu Administrasaun proposta lei OR no mosaun sensura ba Governu.

“Ha’u halo ona ho konsensia mós katak, ha’u la viola rejimentu, nem kontra prátika normal ka presedente ruma iha PN, muito menus viola konstituisaun hanesan sira alega mai ha’u públikamente. Ha’u-nia sala ka pekadu mortal mak, tan de’it ha’u partense ba partidu ida ne’ebé brani atu simu netik dezafiu hodi avansa ho Governu minoritáriu,” dehan Aniceto.

PPN ne’e konsidera akuzasaun hirak ne’e, la’os de’it atinji gratuitamente ninia integridade moral, onra no reputasaun, maibé deputadu proponente sira rasik hatudu sira-nia intensaun aat, tanba mai ho razaun infantile, argumenta la ho laran moos, halo konkluzaun la bazeia ba faktus.

“Forma sira ne’e, ladignifika ita polítika, la dignifika mós Estadu no estraga imajen propriu PN nian. Nu’udar sidadaun, nune’e mós nu’udar PPN, ha’u sei hatan liu husi dalan justisa nian, ba akuzasaun hirak ne’e hotu,” afirma Aniceto.cos

Add to Comments Here!!!!

error: Content is protected.
Secured By miniOrange
You might also like:
GRANDE ENTREVISTA Hamutuk ho Komisáriu KAK Dr.Aderito Tilman

JORNAL NACIONAL GMNTV Loron-12 Fulan-Dezembru Tinan-2017

AMP sei la retira mosaun sensura

Deputadu bankada CNRT, Dionísio Babo, hatete,...

Close