JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kazu viatura MOPTC, Diogo: ”ha’u asina dokumentus, maibe viatura la entrega ba ha’u”

Kazu viatura MOPTC, Diogo: ”ha’u asina  dokumentus, maibe viatura la entrega ba ha’u”

Tribunal Distrital Dili, Sesta (22/18) halao julgamentu daruak ba kazu krime pekulatu, administrasaun danoza ho falsifikasaun dokumentus ne’ebe deskunfia envolve eis Ministru Obras Públicas Transportes e Comunicasões (MOPTC), Gastão de Sousa ho Martinho Gusmão.

Alende ne’e, envolve mos arguidu Gastão de Sousa nia oan, Jordão Maria de Jesus da Silva Sousa,  Ferlio Afonso Bado Loi da Silva Sousa no funsionário públiku iha MOPTC, Diogo da Costa.

Iha audensia arguidu Diogo da Costa nudar eis xefi gabinete MOPTC deklara iha momentu ne’eba nia asina duni termo de entrega husi viatura haat (4) ne’ebe ADB fo ba MOPTC ho xapa matrikula 18-948 TLS, marka toyota land cruiser, viatura 19-754 TLS, marka toyota kijang innova, viatura 18-723 TLS, marka toyota rav 4 no viatura 18-947 TLS ho marka  toyota land cruiser prado, maibe kareta haat ne’e la entrega direitamente ba nia iha momentu asina ne’e.

“Ha’u so asina deit termo de entrega husi viatura haat ne’ebe husi parte ADB fo ba MOPTC ne’ebe uza hela xapa matrikula ADB nian, maibe sasan la entrega mai ha’u nia liman tanba antes ne’e kareta para ona iha MOPTC,”deklara arguidu ba tribunal.

Nia rekoñese nia uza duni viatura numeru matrikula 19-754 TLS ho marka toyota kijang innova wainhira iha autorizasaun husi Ministru  Gastão de Sousa, maibe wainhira kareta refere fo tiha ba arguidu Martinho Gusmão nia uza deit kareta privadu hodi hala’o servisu.

“Durante kareta ADB fo ba paroquia Manatuto, hau uza kareta privadu. Maibe nafatin hetan konbustivel husi ADB, tanba hetan autorizasaun verbal husi Fernando hodi hetan recibu ADB, hodi ense mina iha tiger fuel, nune’e wainhira mina la iha hau husu verbal ba Fernando ou nia mak fo deit,”deklara arguidu.

Iha audensia julgamentu ne’e arguidu Jordão Maria de Jesus da Silva Sousa ne’ebé  koñesidu ho “Jordy Sousa” lakoi fo nia deklarasaun hodi hili dalan nonok.

Antes ne’e iha loron 9 fulan Janeiru 2018, Tribunal Distrital Dili rona tiha ona arguidu Gastão de Sousa ba kazu refere.

Lee hotu :   Deskonfia insulta Xanana, PSIK investiga Cedelina

Iha audensia arguidu deklara eis Primeiru Ministru Xanana Gusmão mak haruka, nune’e nia kumpri deit, nia mos hanoin, ne’e ba interese sarani paroquia Manatuto. Depois kareta ne’e mos laos lori osan Estadu mak sosa, maibe hetan apoiu husi Asia Development Bank (ADB).

Gastão haktuir, kareta ne’e Martinho Gusmão uza ba festa santuariu Santo Antonio iha paroquia Manatuto, durante tinan ida fulan tolu.

Manutensaun ba kareta ne’e husi MOPTC no orsamentu ne’ebe uza ba manutensaun mai husi osan restu ne’ebe ADB ho Governu RDTL asina akordu ba projetu finansiamentu  ho montante $ 46.000.000 ne’ebe atribui ba fundu ba rehabilitasaun no konstrusaun estrada.

Gastão hatutan kareta ida ne’ebe dehan nia uza ba privadu no fo ba nia oan sira ne’e la los, tanba hanesan Ministru nia iha direitu uza kareta rua, ida ofisial ida mak operasional.

No kareta operasional ne’e mos laos loron loron nia lori ba para iha uma, maibe kuandu tempu presiza deit mak nia lori ba para iha uma.

“Ha’u mos nunka fo ba hau nia oan nain rua atu uza kareta Estadu ne’e ba privadu, maibe haruka sira kuandu husu ajuda ba fase kareta no ba ense  mina, tanba sira nain rua mos iha kareta rasik,’’ koalia Gastão ba tribunal.

Tantu julgamentu ba kazu ne’e adia fila fali ba loron 26 fulan Fevereiru 2018, tuku 9.30 hodi rona deklarasaun husi arguidu seluk

Ba kazu ne’e, Ministériu públiku akuza no rekere julgamentu iha prosesu komum bazeia ba artigu 236 numeru 48, numeru 2 alínea d, kódigu prosesu penál hasoru arguidu  Gastão Francisco de Sousa nudar Ministru Obras Públikas, Transportes no Komunikasaun (MOPTC), Diogo da Costa nudar funsionáriu publiku no Xefi Gabinete MOPTC, Jordão Maria de Jesus da Silva Sousa ne’ebé  koñesidu ho “Jordy Sousa”, oan husi Gastão de Sousa, Ferlio Afonso Bado Loi da Silva Sousa koñesidu ho “Viali”, funsionário Públiku iha Ministériu Negosiu Estranjeiru no Kooperasau (MNEC) no Martinho Gusmão nudar saserdote katóliku iha paroquia Santo António Manatuto.

Lee hotu :   DESKONFIA TAMA GRUPU COLIMAU 2000 HODI OHO MEMBRU PSHT

Tuir akuzasaun, iha loron 28 fulan Fevereiru 2010 asina akordu entre Governu RDTL ho Asian Development Bank (ADB) ba projetu finansiamentu  ho montante orsamentu $ 46.000.000 ne’ebé atribui ba fundu ba reabilitasaun no konstrusaun estrada.

Projetu refere remata iha tinan 2012 no tenki entrega fila fali osan husi fundu ne’ebe la uza ho montante $ 82.776,77 dolares Amerikanu inklui viatura 8.

Entre viatura hirak ne’ebe MOPTC simu konsta viatura ho matrikula  18-948 TLS ho marka toyota land cruiser  no viatura ho numeru matrikula 19-754 TLS ho marka toyota kijang innova ne’ebe entrega ba arguidu Diogo da Costa.

 Iha realidade fo koñesimentu deit ba viatura rua seluk ho matrikula 18-723 TLS ho marka toyota rav 4 no viatura 18-947 TLS ho marka  toyota land cruiser prado.

Hafoin simu viatura hirak ne’e, tuir instrusaun verbal husi arguidu Gastão de Sousa, la fo koñesimentu ba departamentu logistika no MOPTC konaba simu viatura hirak ne’e.

Konkordansia no kolaborasaun hirak ne’e ho intensaun hodi oinsa bele halakon rejistu viatura rua ne’e hanesan patrimoniu estadu nian.

Tuir planu ne’ebe sira halo ona maka iha loron 24 fulan Setembru 2012, arguidu Gastão komunika ba ADB kona-ba nia desizaun atu atribui viatura rua ho matrikula 18-948 no 19-754 ba unidade jestaun projetu nian, inklui manutensaun no abastesimentu kombustivel ne’ebe finansia husi ADB.

Maibe realidade hatudu katak, viatura ho matrikula 18-948 rai hela iha Gastão de Sousa nia rezidensia iha aldeia Becusi bawah, suku Becora.

Arguidu Gastão de Sousa mos permite arguidu nain rua Jordy no Viali hodi uza veikulu ba titulu pesoal durante sira nia paseiu iha sidade laran.

 Iha data ne’ebe la konkretu, iha final fulan Abril ka meadu fulan Maio 2014, arguidu Martinho Gusmão solisita verbalmente ba arguidu Gastão de Sousa hodi husu ajuda viatura ida ba preparasaun serimonia komemorativa tinan 200 paroquia Manatuto nian, no iha loron 13 fulan Maio 2014 arguidu Gastão de Sousa entrega pesoalmente viatura ho matrikula 19-754 TLS ne’ebe uza hela ba titulu privadu hosi arguidu Diogo da Costa.

Lee hotu :   OFISIAL FALINTIL-FDTL, HAMUTUK NAIN RUA NULU RESIN NEN PARTISIPA SEMINARIU IHA MISAUN PAZ ( Video )

Arguidu Martinho Gusmão uza viatura refere durante tinan 1 fulan 3 no bainhira uza viatura refere Martinho Gusmão solisita dala 2 ba Gastão de Sousa hodi halo manutensaun  ba viatura iha loron 14 fulan Junho 2014 no loron 28 Agostu 2014 ne’ebe uza osan husi fundu ADB nian ho montante $ 532,34 dolar Amerikanu.

Bazeia ba akuzasaun hirak ne’ebe iha maka konsidera katak bens no ekipamentu hirak ne’ebe sira uza pertense ba Estadu, mezmu nune’e, sira aproveita patrimoniu publiku ba benefisiu propriu maske hatene katak aktu sira ne’e prezudika Estadu.

Nune’e, arguidu Gastão de Sousa hetan akuzasaun primeiru, husi MP ho krime pekulatu kontra artigu 295 numeru 1 ho 3 ba autoria material ho arguidu Diogo da Silva. Segundu, krime pekulatu ida seluk maka kontra artigu 295 numeru 1, 41 no 34 ba autoria material ho arguidu Jordy Sousa no Viali. Terseiru, krime administrasaun danoza kontra artigu 274, numeru 2 ho 3 ba kumplisidade ho arguidu Martinho Gusmão.

Arguidu Diogo da Costa MP akuza ho primeiru, krime pekulatu, iha artigu 295  numeru 1 ho 3 ba autoria material ho arguidu Gastão de Sousa, segundu nafatin ho krime pekulatu hosi artigu 295 no 41 no terseiru maka krime falsifikasaun dokumentu  kontra artigu 303 numeru 1, alinea A no 41.

 Arguidu Jordy sousa no Viali komete iha co-autoria material ne’ebe MP akuza ho krime pekulatu kontra artigu 295 numeru 1, 41 no 34 ba autoria material ho arguidu Gastão de Sousa.

Arguidu Martinho Gusmão komete ba kumplisidade material ne’ebe MP akuza ho krime administrasaun danoza kontra artigu 274 numeru 2 ho 3 ba kumplisidade ho arguidu Gastão  de Sousa.

Audensia julgamentu ne’e prejidi husi juiz koletivu, Albertina Neves, Antonio do Carmo, Zumiaty Freitas, Ministeriu Publiku reprezenta husi prokuradora Lidia Soares ho Jacinto Babo, arguido sira hetan asistensia legal husi defensor publiku Fernando Carvalho, Estaqui Guterres ho Cancio Xavier.ita

Add to Comments Here!!!!

error: Content is protected.
Secured By miniOrange
You might also like:
PR sei hamutuk ho órgaun Estadu moderniza F-FDTL

Prezidente Repúblika (PR) Francisco Guterres Lú...

JORNAL NACIONAL GMNTV Loron-02 Fulan-Febereiru Tinan-2018

Lalaok Desportu GMNTV espcial edisaun MMA Timor Leste, Eps 22 Versaun Kompleitu

Close