JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Deskonfia oferese projetu ba família, DJ gabineti PM hatán iha TDD

Deskonfia oferese projetu ba família, DJ gabineti PM hatán iha TDD

Tribunal Distrital Díli (TDD), iha Kinta lokraik (17/01) kontinua halo julgamentu ba Diretora Jerál, gabineti Primeiru Ministru (PM), arguida FJ no arguidu AC hodi kontinua rona sasin Sixto.

Iha audénsia julgamentu ne’e, sasin deklara katak, momentu ne’ebá nia asumi kna’ar hanesan responsabel aprovizionamentu, maibé hanesan funsionáriu kontratadu no iha momentu ne’ebá mós parte aprovizionamentu la halo anúnsiu ba tenderizasaun ne’e, tanba parte finansas maka bolu ona kompañia ida.

“Projetu rehabilitasaun ba corredor no casa de banho, iha Gabineti PM la liu husi konkursu, tanba parte finansas ou arguidu rasik maka bolu ona kompañia Seiara Irapite. Lda no la liu husi prosesu tenderizasaun. Ha’u rasik hatene kona-bá prosesu tenderizasaun, tanba ha’u hetan formasaun durante semana rua no hau rasik fo ona koñesimentu ba parte finansas no aprovizionamentu, kona-bá lala’ok ne’e maski verbal de’it no razaun ha’u la interven, tanba ha’u rasik momentu ne’ebá hanesan funsionáriu kontratadu de’it,”deklara sasin iha sala audénsia.

Hafoin rona husi sasin ninia deklarasaun, TDD adia hikas julgamentu ba loron 14, fulan Febereiru, tinan ne’e, hodi submete ba alegasaun.

Antes ne’e, tuir akuzasaun husi Ministériu Públiku (MP) katak, arguida hanesan Diretora Jeral, iha Gabineti PM, hahú iha tinan 2008, to’o agora no arguidu hanesan, Ofisiál Finansas, Gabineti PM, hahú iha tinan 2007, to’o agora.

Iha loron 12, fulan Maiu, tinan 2009, Diresaun Aprovizionamentu, Gabineti PM, halo prosesu tenderizasaun ba ekipamentu informátika, iha kompañia tolu maka pasa iha avaliasaun finál, hanesan kompañia Obrigado Komputer Elektrik, Nazaret Lda no Champions Komputer, maibé ikus mai ekipa avaliasaun rekomenda kompañia Obrigado Komputer Elektrik maka sai hanesan vensedór hodi asina akta ho membru ekipa avaliasaun ne’ebé hetan mós aprovasaun husi arguida, maibé iha loron 18, fulan Maiu, tinan 2009, arguida husi kotuk sein koñesimentu husi membru ekipa avaliasaun, arguida haruka karta ida ba Diretór dos Serviços Nacional do Aprovisionamento, Manuel Monteiro, hodi rekomenda fali kompañia Alegna Supplier

Lee hotu :   PNSIK detein suspeitu tráfiku umanu

Maski kompañia refere la pasa iha avaliasaun finál ho razaun fó oportunidade ba kompañia lokál, hodi dezenvolve sira-nia kompañia, maski razaun ne’e laiha baze fundamentu, tanba karik atu fó ba kompañia lokál loloos fó ba kompañia Nazaret. Lda ne’ebé hanesan mós kompañia lokál no hetan segundu lugar iha avaliasaun finál, maibé arguida rekomenda fali kompañia Alegna Supplier, tanba Diretora kompañia, Angela dos Reis Fernandes hanesan arguida nia prima.

Ikus mai, kompañia, Alegna Supplier maka sai vensedór hodi fornese ekipamentu informátiku ba Gabineti PM, maibé loron hatama liu ona, nune’e responsavel IT, Joanico telefone ba kompañia hodi dehan tempu hatama ekipamentu liu ona, maibé ita bo’ot sira seidauk hatama no kompañia responde katak he’in de’it, maibé depois de ida ne’e arguida bolu Joanico hodi dehan ita bo’ot laiha direitu atu telefone kompañia.

Maski loron liu ona, maibé kompañia konsege hatama ekipamentu informátika, maibé la involve parte IT atu verifika ekipamentu refere, tanba ne’e realidade hatudu katak, iha Laptop ida, inklui CPU no komputadór hát maka át antes utiliza no to’o agora kompañia la responsabiliza.

Alende ne’e, iha fulan Setembru tinan 2008, sein koñesimentu husi aprovizionamentu, arguida haruka arguidu buka kompañia atu halo rehabilitasaun ba corredor Gabineti PM no arguidu bolu José Higinio Santos Vilanova, nu’udar Diretór kompañia Seiara Irapite. Lda ne’ebé iha mós relasaun família ho arguidu hodi haruka kompañia prepara rasik dezeñu no volume ba konstrusaun hodi hatama presu ba obra ne’e ho montante USD11.327,59, ne’ebé la bazeia ba price analisys, tanba ne’e iha loron 8, fulan Outubru, tinan 2008 kompañia refere asina kontratu ho Governu, maski arguidu ho arguida hatene katak prosedimentu ba tenderizaun, tenki liu husi aprovizionamentu.

Lee hotu :   PDHJ sei apoia AMD kombate lixu iha Díli

Depois de rehabilitasaun ba corridor arguida ho arguidu sein koñesimentu husi aprovizionamentu kontinua haruka kompañia Seiara Irapite. Lda prepara tán dezeñu ba rehabilitasaun casa de banho no iha loron 13, fulan Outubru, tinan 2008, kompañia aprezenta dezeñu no presu ba rehabilitasaun casa de banho ho montante USD19.396,60 no rehabilitasaun ne’e mós la hetan kontrolu husi arguida no arguidu, tanba realidade katak posa casa de banho uza de’it posa antigu nian.

Hafoin remata obra, Governu mós oferese bolsu estudu ba funsionáriu iha Gabineti PM no normalmente bolsu estudu ne’e oferese ba funsionáriu ne’ebé servisu pelumenus tinan tolu ba leten, maibé iha Gabineti PM funsionáriu sira hetan tratamentu ne’ebé la hanesan husi arguida, tanba fó liu prioridade ba nia família ne’ebé servisu iha Gabineti PM, tanba ne’e bolsu estudu refere oferese de’it ba Aidil Clodo, Fransisco Fernandes no Lino da Cruz, maski funsionáriu hirak ne’e servisu seidauk to’o tinan rua.

Alende ne’e, iha tinan 2009, Gabineti PM realiza Natal konjunta no iha loron 4, fulan Dezembru, tinan 2009, arguida fo orden servisu ba João de Jesus hodi sai hanesan prezidenti ba Natal konjunta, tanba ne’e, prezidenti Natal konjunta realiza enkontru ho komisaun organizadora hodi aprezenta orsamentu finanseira ho total USD19.000 ba arguida, maibé arguida la aprova, tanba montante bo’ot liu, nune’e presiza halo revizaun, tanba ne’e komisaun organizadora mós realiza fali enkontru hodi halo revizaun ba osan no aprezenta fali proposta foun ho montante USD13.685,50 ne’ebé ikus mai hetan aprovasaun husi arguida.

Iha loron 20, fulan Dezembru, tinan 2009, wainhira realiza Natal konjunta, mezmu komisaun estabelese ona seksaun konsumu hodi prepara ai-han, maibé sein koñesimentu husi komisaun organizadora arguida índika ninia subriña Aidil Clodo hodi prepara ai-han, maibé iha Natal konjunta ne’e, hahan hotu-hotu tama, so que hahan ne’ebé arguida ninia subriña prepara ne’e maka la tama.

Lee hotu :   Konfrontu ihaVemase, ema ida mate ■Motor tolu hetan estragus

Iha fulan Janeiru, tinan 2010, arguidu aprezenta fali relatoriu foun ida ba gastus Natal konjunta hamutuk USD16.127,15, ne’ebé iha relatoriu ne’e rasik iha kestaun rua maka sai problema, primeiru hahan ne’ebé prepara husi Aidil Clodo mós a lista mós iha relatoriu, mezmu realidade hahan sira ne’e la tama ba osan USD578 no selu saugati de’it, segundu gastu ba bebidas hamutuk USD2.477 ne’ebé falsa, tanba osan bebidas tama ona iha konsumu tuir proposta orsamentu ba Natal konjunta ninian.

Tanba ne’e, MP akuza arguida ba krimi abuza de podér dala rua ne’ebé previstu iha artigu 2, husi lei númeru 31/1999, kona-bá anti korupsaun, falsifikasaun dokumentu no burla ne’ebé previstu iha artigu 263, 267 husi kódigu penál Timor-Leste.

Arguidu hamutuk ho arguida, komete krimi tolu, hanesan abuzu de podér dala rua, falsifikasaun dokumentus dala ida no krimi pekulatu dala ida, ne’ebé previstu iha artigu 297, 304 no 295 husi kódigu penál Timor-Leste.

Audénsia julgamentu ne’e, prezidi husi juís kolektivu, Francisca Cabral, José Maria de Araújo, Maria Solana, MP reprezenta husi prokuradór, Jacinto Babo, arguidu sira hetan asisténsia legál husi, DP, Fernando. ita

Add to Comments Here!!!!

error: Content is protected.
Secured By miniOrange
You might also like:
PPN Arão suspende akordu ho ospitál Manipal Malázia

Prezidente Parlamentu Nasionál (PPN), Arão Noe,...

Lere: Artemarisias labele koko PNTL ho F-FDTL ■Lamenta juramentu iha RI

Xefe Estadu Maior Jeneral F-FDTL Major...

CPLP na GMN, Edição 17 de Janeiro de 2019

Close