JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

KAZU LEOREMA, GOVERNU REINTEGRA KOMUNIDADE BA BAIRU

KAZU LEOREMA,  GOVERNU REINTEGRA KOMUNIDADE BA BAIRU

Governu liu husi Sekretáriu Estadu Protesaun Sivíl (SEPS), hamutuk ho Prezidente Komisaun B Parlamentu Nasionál, Segundu Komandante Jerál Polísia Nasionál Timór-Leste (PNTL), Reprezentante Xefe Estadu Maiór F-DTL, Reprezentante Ministériu Edukasaun, Igreja, Komisaun Reguladora Artes Marsiais (KRAM), Administradór Munisípiu Likisá ho ninia estrutura tomak, realiza diálogu aberta ho komunidade Suku Leorema hodi buka solusaun ba kazu konfrontasaun ne’ebé akontese iha fulan jullu liu ba, hodi  reintegra fila-fali komunidade sira ne’ebé durante ne’e husik hela sira nia hela fatin no refuzia iha Munisípiu Likisa.

Hafoin remata prosesu diálogu, Sekretáriu Estadu Protesaun Sivíl,  Alexandrino de Araújo hatete,  diálogu refere ho komunidade suku Leorema, hodi hare fila-fali problema ne’ebé akontese iha loron 04 fulan Jullu liubá, ne’ebé mak rezulta ema nian 2 mate, kanek  inklui uma no motor balun hetan sunu iha momentu ne’eba.

“Ohin ita presiza ko’alia ho ita nia povu sira, entre sira rasik mós ko’alia ba malu no sira iha vontade para atu simu malu fali, depois problema ne’e akontese. Problema ne’e akontese liu tiha ona no prosesu legal la’o ona, entaun problema ida ne’e, labele impede fila fali povu sira atu fahe malu, sira tenke normaliza fila fali situasaun moris hakmatek, atu nune’e sira bele hala’o servisu no estudante sira labele sai vítima”,informa Alexandrino ba jornalista sira, iha Aldeia Baura-Leorema, sesta (06/09/2019).

Iha fatin hanesan, Prezidente Komisaun B Trata Asuntu Defeza no Seguransa, Adérito Hugo da Costa, afirma, prosesu diálogu aberta ne’e, hanesan medida ida para atu rekopera fali komunidade sira ne’ebé mak iha dezintendimentu ba malu bele hamutuk fali.

“Ita haree husi kazu ne’ebé akontese, ninia impaktu boot tebes, ita bele kompriende oinsá sentimentu família husi vítima sira nian, feto faluk sira nian no feto ho labarik sira ne’ebé tenke hela mesak tanba sira nia katuas oan sira agora tuir prosesu investigasaun, ida ne’e todan”.dehan nia.

Lee hotu :   Autoridade judisial failla atu trava arguidu halai sai

Maibé ida ne’e hanesan medidas ida estadu halo liuhusi Sekretáriu Estadu Protesaun Sivíl nian koordena ho liña ministerial relevante sira, atu nafatin kria kondisaun mezmu akontesimentu ne’e todan, maibé mákina estadu nian funsiona nafatin atu kria kondisaun nune’e komunidade sira iha nafatin kontakta ba malu.

Nune’e mós Segundu  Komandante Jerál PNTL Komisáriu Polisia Mateus Fernandes, haktuir diálogu ne’e hetan aproximasaun diak tebes ho komunidade sira, tanba dezde kazu ne’e akontese, polísia hala’o kedan ninia kna’ar hodi tau postu inklui aprósima kedan ho populasaun sira hodi hare problema saida mak mosu hodi nune’e bele hetan solusaun ne’ebé diak liu iha komunidade nia leet.

Alende ne’e, ligadu ba preokupasaun husi Komunidade sira nian, kona-ba kontinua mantein seguransa no tau postu permanente iha Suku Leorema, Mateus Fernandes kompromete katak,  nia parte sei konsulta ho irarkia komandu atu hare kestaun refere

“Ohin ami rona ona preokupasaun husi Komunidade nian, ami sei ba konsulta no husu orientasaun husi ami nia superior irarkia, para depois hare kestaun lojístika oinsá atu bele apoiu, atu nune’e seguransa sira bele mantein iha ne’e, para bele fó apoiu ba orden públiku ba komunidade Suku Leorema, para depois buat sira ne’e bele lao ho diak. Tanba ne’e dezde komunidade sira husu dehan katak sira presiza tebes ami, ami sempre hamutuk ho sira, tanba polísia mai husi komunidade”,dehan Mateus Fernandes.

Xefe Suku Leorema, Sandra de Araújo,  admite katak, tuir ninia haree diálogu refere hetan partisipasaun másimu tebes husi komunidade sira, maske iha diálogu ne’e la hetan solusaun ida ne’ebé pozitivu, maibé nia espera katak, diálogu ne’e hanesan pasu dahuluk atu loke dalan oinsá bele hatene partisipasaun komunidade nian.

Lee hotu :   Jeca Smith husu KPK servisu imparsiál ■Estabelese ona iha Suku 24

“Ba oin ha’u espera katak, ho sira nia kooperasaun ne’ebé mak diak, ha’u sente katak sei lori duni solusaun ne’ebé mak diak ba kazu ida ne’e nian”.

Nia dehan, agora daudaun situasaun iha Suku Leorema, tuir aproximasaun ne’ebé nia parte halo ho família vítima sira nian,  ezije liuliu ema na’in-haat ne’ebé sei livré hela iha liur  deskonfia envolve hotu iha kazu ne’e.

“Ida ne’e mak sai preokupasaun boot ba sira atu simu realidade ida ne’e, maibé ha’u fiar katak, ha’u sei kontinua luta nafatin para depois bele iha mudansa ruma iha sira nia hanoin, tanba ne’e mak ha’u hakarak seguransa mantein nafatin, tanba hare ba pergunta sira ne’ebé mak hamosu iha ha’u nia prosimasaun ne’e, hamosu ona preokupasaun ba ha’u hanesan lideransa, atu evita problema ne’e labele akontese tan iha future”.

Alende ne’e, reprezentante família matebian Leandro Manuel Gonçalves, ezije ba autoridade kompetente sira atu buka tuir portavós na’in-tolu ne’ebé mak envolve iha kazu Leorema, daudaun ne’e subar hela iha liur.

“Sira na’in-tolu ne’e kuandu problema la tampil iha oin, maibé portavóz ba problema  mak ne’e, sira na’in-tolu ne’e mak hanesan Fernando Soares Freitas, Ernesto Gonçalves no Alcino. Sira ne’e dezde problema ne’e akontese sira hala’i lakon hotu to agora. Ami harak sira mak mai marka prezensa iha  diálogu ne’e hodi rona orden husi estadu nian ne’e, ami sira ne’e kolabora ho estadu”.

Nia dehan, enkuantu ema kriminozu sira ne’e la kaer, populasaun iha Suku Leorema sei la hakmatek.

“Ema kriminozu sira ne’e tenke kaer ba detein, se la detein mak situasaun Leorema sei la hakmatek, tanba sira sei livre hela iha liur”.

Lee hotu :   Kondus kareta Estadu laiha karta kondusaun, PNTL detein morista na’in 7 iha sela

Nia hateten, komunidade sira ne’ebé refujiadu ba iha komandu PNTL Likisá, bele fila fali mai hela fila fali iha sira nia fatin.

“Sira planu halo grupu oho ema mate no estraga sasán, iha momentu ne’e polisia mai lori sai sira ba iha Likisá. Ema ida mate ne’e hakoi hotu ona, se situasaun normal ona sente dehan kontroladu ona, sira bele fila fali mai sira nia hela fatin, la iha problema. Se agora ema ida halo krime hasoru sira, ne’e krime foun fali ona”.

Enkuantu, komunidade refujiadu Bendita Doutel Sarmento, haktuir sira prontu atu fila, maibé nia parte husu ba estadu atu kria kondisaun no tau postu permanente iha area refere.

“Problema ida ne’e laos mai husi ami feto, maibé husi mane sira, ami feto sira ne’e sai refujiadu, tanba ami no ami nia oan sira tauk no trauma, ami tenke ses an husi fatin ne’e hodi salva ami nia an. Tanba ne’e ami husu ba na’i-ulun sira ho komandante sira, ami prontu atu fila maibé agora daudaun hetan deit ami feto mesak, mane sira toma hotu ona iha komarka.

“Ami sente fila mai la seguru, tanba fatin ne’ebé mak ami atu hela ba, ami nia uma estraga hotu ona, la iha fatin ba ami atu hela. Tanba ne’e ami prontu fila, maibé ami husu tau postu permanente ida iha fatin ne’e mós ha’u husu ba na’i-ulun sira atu buka fatin seguru ruma mai mai atu hela, tanba ami nia uma la iha sunu hotu ona”. Aes

Add to Comments Here!!!!

error: Content is protected.
Secured By miniOrange
You might also like:
MEMBRU PNTL BAKU SIDADAUN IHA BAUKAU, FM KONSIDERA LA TUIR REGRA

Diretór Ezekutivu Fundasaun Mahein (FM), João...

PARÓKIA BALIDE HALO TINAN BA 74, DOM VIRGÍLIO: SARANI SIRA TENKI TAU KONFIANSA BA MAROMAK

Bispu Dioseze Díli, Dom Virgílio do...

SOSIEDADE SIVÍL HUSU EKIPA KONJUNTA HALA’O OPERASAUN BA VEÍKULUS ESTADU

Sosiedade Sivíl  husu ekipa operasaun konjunta...

Close