JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

POVU SIMU XANANA NUDAR HEROI BOOT

POVU SIMU XANANA NUDAR HEROI BOOT

Ema atus wain, kompostu husi ferik-katuas, jovens no estudantes husi nivel pre-primaria to’o ensino superior, Segunda (4/9/2017), nadodon la iha rohan, hodi ba simu prezensa negosiador principal ba delimitasaun fronteira maritima, Kayrala Xanana Gusmão, iha Aeroportu Comoro, Dili.

Xanana Gusmão to’o fali Timor Leste ho aviaun komersial Sry Wijaya Air, tuku 13:45 Otl, hafoin besik semana ida partisipa enkontru konfidensial entre delegasaun Timor Leste ho Australia ne’ebe halao iha Copenhaga, Dinamarka. Enkontru ne’e hatudu rezultadu positivu tanba nasaun rua ne’e iha ona akordu ida ba delimitasaun Fronteira Maritima.   Prezensa Xanana nian iha Aeroportu Internasional Prezidenti Nicolau Lobato, simu ho antosiasmu boot husi nia ema lubun wain no simu ho dahur, dadolin no haklalak ho lian viva Xanana Gusmão no viva Timor Leste. Militantes partidu CNRT nian lubun wain mos hatais kamizola CNRT no lori bandeira CNRT haklalak hodi fo apresiasaun boot ba Xanana nudar mos prezidenti partidu CNRT. Xanana hakat tuun husi eskada aviaun nian simu mos husi lideransa partidu politiku sira ne’ebe hamrik forma iha aeroportu, kompostu husi lideransa partidu CNRT, Partidu Demokratiku  (PD), KHUNTO, membru Governu balun ho mos veteranus sira. Xanana sai husi portaun sorin VIP nian hakat liu mai liur komprimenta no simu ho lia nain sira hodi hamulak. Nia hamrik iha kareta PRADO ho numeru matrikula A.15-519 TL. Xanana  hateke ho esperansa boot ba nia povu ne’ebe hamrik nadodon no balun ho kareta no  motor hodi halo konfoiu husi Aeroporto to’o sede CNRT iha Bairo dos Grilhos. Iha sede CNRT maka Xanana Gusmão nudar mos prezidenti Partidu CNRT, akompaña husi estrutura partidu nian halo konferensia imprensa. Maske nune’e, antes ne´e Xanana Gusmão deklara ona katak, delimitasaun fronteira maritima asuntu nasional, tanba ne’e  la merese atu politiza ba interese partidu nian.  Liu husi konferensia imprensa ne’e Xanana Gusmão deklara katak, nia rasik lahatene konferensia imprensa nee halo iha sede CNRT no Xanana lia tun mos katak, bainhira nia tun iha aeroportu nia rasik hakarak ona ba uma hodi deskansa. ´´La´os hau maka prepara, hau sai husi aviaun lori hau ba alin sira ne´ebe maka hein, ne´ebe hau mos tuir ba, hau hakarak ne´e atu ba deskansa ona,´´ dehan Kayrala Xanana Gusmão iha sede Partidu CNRT. Xanana Gusmão deklara, delimitasaun fronteira maritima interese nasional duni, la´os interese partidu.  ´´Hau dehan dala ida tan katak, fronteira maritima ne´e interese nasional duni, tanba ne´e maka iha kampanha partidu nian hau nein temi ida ne´e, hau lakohi aproveita hodi temi iha kampanha, tanba asuntu fronteira maritima interese nasional,´´ hateten Xanana Gusmão. Iha fatin hanesan, Sekretario Jeral Partidu CNRT, Francisco Kalbuadi Lay akresenta tan katak, durante loron hirak ne´e partidu organizia militantes no sipatizantes sira hodi reza no halo liturgia. ´´Hau hakarak atu dehan tan katak, tanba sa maka konferensia imprensa halo iha sede, tanba loron hirak liu ba iha sede realiza reza no halo liturgia hodi husu tulun ba Aman Maromak atu bele fo kbi’it ba delegasaun Timor Leste iha prosesu ne’e tomak,´´ esklarese Francisco Kalbuadi Lay. Konvoiu husi aeroportu Comoro to´o iha sede CNRT, komunidade no estudante, veteranus ne´ebe maka senti an la´os militante partidu CNRT fila ba ida-idak nia fatin, no militantes CNRT maka iha sede laran. Hafoin xefi negosiador ne´e Kayrala Xanana Gusmão halo deklarasaun hotu, partidu CNRT kontinua kedas ho misa agradesementu.

Lee hotu :   Xanana sa’e taxi ba lansamentu GMN-TV

LUTA BA DIGNIDADE UMANA

Tuir Xanana Gusmão nia haree katak,  rai boot sira tau uluk fali katak sira mak iha poder, maske nune’e   TL rai ki’ik tau uluk dignidade umanu. Xanana afirma katak, problema delimitasaun fronteira martima ne´e problema boot, tan ne´e respeitu ba rai sira seluk no mos respeitu ba dignidade umana. “Foin dadauk ita dehan katak funu oan ida ne´ebe hala´o durante tinan 18 ne´e los, tanba la´os deit mai ita nia dereitu  ba soberania, maibe mos ba dignidade umana povu ida ne´e nian. Tinan 18 ita atu hetan soberania ba ita nia rain lori tinan 24, agora soberania ba ita nia tasi lori tinan 18,” afirma Xanana Gusmão. Tinan 18 liu tiha, tuir Xanana, iha loron 30 Agostu 2017 iha buat diak mosu iha Copenhaga, soberania rai ida ne´e nian rasik. La fasil, iha buat hot-hotu ne´ebe mosu iha Timor oan nia vida. Maibe povu hahuu kedas husi bai ala sira, nunka hanoin katak luta ba buat ruma ne´e atu lakon. “Hau husu ba ita hotu fo gloria ba Maromak, tanba Maromak ne´ebe iha leten as liu ba nia tulun, agradese ba rai lulik, foho lulik, matebian, tanba sira fo forsa no korazen nafatin atu ita bele hanoin deit soberania iha foin dadaun luta ne´ebe hatudu besik hotu ona,” Xanana hateten. Nia konta-tuir katak, hahuu iha fulan Abril 2016, maibe hahu lolos iha tinan 2006 no agradese mos ba veteranus sira ne´ebe iha tinan hirak nia laran sira lao haleu Australia, agradese mos povu Australia sira ne´ebe fo hanoin katak buat ne´ebe imi nia dereito imi nian duni. “Hau bele dehan katak, saida maka ita hakarak ita hetan tiha ona, susesu seidauk hotu, husi agora too fulan Outubru ami sei kontaktu nafatin ho komisaun Australia atu estuda textu tratadu ninian.  Tanba iha loron 19 to´o 23 Outubru, sei iha enkontru ida tan iha Olanda, atu aprova textu ba delimitasaun fronteira maritime,” hateten Xanana. Nia mensiona mos katak, Timor oan kontenti tanba TL mak sai terseiru lugar iha mundu maka tuir transparensia gasta osan mina nian, iha Asia Timur primeiru lugar. Nune´e mos Timor maka primeiru lugar iha Asia prosesu konsiliasaun ba fronteira maritima. Iha biban ne´e, Xanana Gusmão, matan wen monu, no hodi dehan katak, luta ne´ebe nia halo la´os ba nia an, maibe ba jerasaun tuir mai nia futuru. “Ita hetan ona linha fronteira, tanba ne´e maka ita viva soberania, tanba fronteira ne´e maka fo soberania ba ita. Maibe sei iha buat balu, tanba ne´e maka hau sei dehan konfidensial kuandu komisaun fo sai lolos ona, no hau bele esplika,” hateten Xanana. Iha loron 19 to´o 23 fulan Outubru, delegasaun Timor Leste ho Australia elebora textu ne´e, no iha ne´eba maka aprova textu final ba delimitasaun fronteira martima nian. mia

Add to Comments Here!!!!

error: Content is protected.
Secured By miniOrange
You might also like:
PROJETU LIFAU OE-CUSSE AMBENO ABANDONA

Projetu Lifau Oe-Cusse Ambeno abandona ona...

SOSIEDADE SIVIL KONSIDERA GOVERNU IGNORA LORON 30 AGOSTU

Sosiedade Sivil konsidera  Governu ignora loron...

ABAN, FRETILIN-PLP SEI “HADAU MALU” KARGU PREZIDENTI PN

Partidu mais votadu FRETILIN ho Partidu...

Close