JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT, PLP KHUNTO hasa’e ona bandeira AMP iha teritoriu tomak  Taur: Laiha eleisaun antesipada

CNRT, PLP KHUNTO hasa’e ona bandeira AMP iha teritoriu tomak 	Taur: Laiha eleisaun antesipada

Partidu tolu hanesan CNRT, PLP no KHUNTO ne’ebé hanaran aan, Aliansa Maioria Parlamentar (AMP), hamutuk ona hodi hasa’e bandeira partidu tolu ne’e nian iha Sede Nasional Partidu tolu ne’e nian iha Munisípiu Díli, ho objetivu atu hatudu ba públiku katak, ba oin partidu tolu ne’e sei hamutuk hodi hasoru desizaun saida deit mak sei mosu.

Seremonia hasa’e bandeira partidu tolu ne’e nian, partisipa husi reprezentante CNE, no partidu 12 seluk ne’ebé lahetan asentu iha Parlamentu Nasional, no hanaran aan, Forum Demokrátiku Nasional (FDN).

Vise Prezidenti CNRT, Tomas Cabral, hateten, Prezidenti CNRT, Kay Rala Xanana Gusmão la marka prezensa iha seremonia importante ne’e, tanba sei hala’o hela servisu iha rai liur ba interese nasaun nian.

“Hahú ohin to’o Domingu, ita sei hasa’e bandeira AMP nian iha teritóriu nasional tomak. Aban iha Munisípiu Díli, bainrua iha Postu Administrativu 6 iha Munisípiu Díli, ho Munisípiu 11 inklui mós Rejiaun Oe-cusse Ambeno,” informa Tomas Cabral iha nia intervensaun ba seremonia hasa’e bandeira iha sede nasional CNRT, Sesta (15/12).

Tomas Cabral haktuir, opozisaun AMP hametin unidade nasional, respeita konstituisaun da Repúblika Timor Leste, hodi atinji objetivu dezenvolvimentu nasional.

“Maioria Parlamentu Nasional, ita la’o tuir ona mandatu Konstitusional, tanba ne’e, maioria Parlamentar sei defende nafatin interese povu tomak nian, ne’ebé fó votus ba ita iha fulan Juñu liu ba, hodi nune’e ita bele asegura boa Governasaun, atu estabelese paz no estabilidade ba ita-nia rai,” katak Tomas Cabral.

Nia haktuir, seremonia hasa’e bandeira partidu tolu ne’e nian, hanesan simbolu ida atu hatudu ba públiku katak, Timor oan sira komesa hanoin ona dalan los atu ukun rai ida ne’e, no dalan los atu afirma Timor oan nia pozisaun no dalan los atu kumpri konstituisaun.

Tomas Cabral  esklarese, ida ne’e atu hatudu katak, povu sei fó nafatin konfiansa ba Kay Rala Xanana Gusmão, Taur Matan Ruak ho Naimori, atu lori jerasaun foun sira la’o tuir sira nia ain fatin ne’ebé sira halo durante tinan 24.

Lee hotu :   Mariano Assanami Sabino: Dezenvolve sistema agrikula no edukasaun inkluzivu

Alende ne’e, Konseleiru Superior KHUNTO, José dos Santos ‘Naimori’, lee komunikadu AMP nian ba imprensa katak, iha nesesidade hodi asegura solusaun ba governativa ne’ebé estavel no dura to’o tinan lima tuir mandatu konstituisaun RDTL, mak fó ona motivasaun bo’ot ba partidu polítiku husi pozisaun Parlamentar ne’ebé deside ona hodi halo esforsu atu muda polítika no programátika iha lejislatura ida ne’e.

“Ezijensia no dezafius hirak ne’ebé koloka mai ita-nia rai doben iha material dezenvolvimentu no promosaun ba bem-estar ka moris diak ho kualidade moris ba ita-nia povu doben, katak ida ne’e ezije ona ba CNRT, PLP no KHUNTO atu assume sira nia responsabilidade hodi etabelese plataforma polítika ida forte no kappas atu responde positivamente ba aspirasaun no preokupasaun husi ita nia povu,” katak Naimori.

Bazeia ba plataforma polítika ne’ebé estabelese ona entre bankada Parlamentar husi opozisaun mak, CNRT, PLP no KHUNTO selebra ona akordu polítiku ida hodi forma Aliansa Maioria Parlamentar ho objetivu atu loke siklu polítiku foun ida, hodi hetan Governu ida forte no estavel, hodi reprezenta maioria husi sidadaun Timor Leste tomak, ho kondisaun atu asegura etabilidade polítika ne’ebé presiza hodi konkretiza objetivu dezenvolvimentu social no ekonómiku ne’ebé Timor  oan tomak mehi no hakarak.

AMP ho partidu polítiku ne’ebé forma ne’e, buka atu orienta nia asaun polítika tuir kritérius konstitusionalidade, tuir legalidade hodi hala’o interese públiku nian, la’os atu aprezenta ba povu doben Timor Leste katak, atu kontra buat hotu no ema hotu, maibé sai hanesan alternativa ida ne’ebé séria no empanada ba Governasaun ne’ebé ezerse hela husi partidu ne’ebé forma koligasaun hodi apoiu ba VII Goveru konstitusional.

Lee hotu :   AMP promete hakotu problema veteranus no hadia uma lisan

“Ami hotu fiar katak, programa ne’ebé ho esperansa ho konfiansa no ho dezenvolvimentu mak aprezenta ona husi AMP, no haree katak, bele reuni duni maioria husi ita-nia povu doben, tanba reprezenta iha Parlamentu Nasional deputadu husi opozisaun hamutuk 35, no la’os ho deputadu 30 de’it ne’ebé reprezenta husi koligasaun Governu nian, nune’e sira presiza dezenvolve esforsu tomak hodi hetan sira-nia plena konkretizasaun,” dehan Naimori.

Liu husi realizasaun seremonia públika hanesan AMP realiza dadaun ne’e, hodi hasa’e bandeira partidu 3 nian ne’e, AMP reafirma liu tan katak, agora ne’e sólidu ka forte tebes iha lasu unidade, iha solidaridade, no iha vontade nomós empeñu hanesan maun alin ba iha projetu polítiku komun ida hodi promove dezenvolvimentu prontidaun atu hasoru kualker dezafiu polítiku ne’ebé mai husi planu Governu nian ka planu eleitoral.

Taur: Laiha eleisaun antesipada

Prezidenti Partidu Libertasaun Popular (PLP), Taur Matan Ruak, hateten, Eleisaun Antesipada la eziste iha istória Timor-Leste nian durante tinan 15, tanba ne’e, Taur Matan Ruak fiar katak, eleisaun antesipada sei laiha.

Prezidenti Partidu Libertasaun Popular (PLP), hanesan mós portavoz Aliansa Maioria Parlamentar (AMP), Taur Matan Ruak, hateten, iha demokrásia ko’alia kona ba mais votadu no menus votadu.

“Ita haree katak,  iha istória Timor Leste nian, hahú husi 2002, ita nunka koñese eleisaun antesipada, karik eleisaun antesipada iha, ha’u lahatene razaun saida. Mas karik obriga ami atu ba eleisaun antesipada, ami AMP prontu,” katak Taur Matan Ruak liu husi konferensia ba imprensa iha sede nasional CNRT, hafoin hasa’e AMP, Sesta (15/12).

Nia dehan, iha tinan 2002 primeiru lejislatura, hamosu Governu tolu, iha momentu ne’eba Prezidenti Repúblika mak Kay Rala Xanana Gusmão, maibé nia la deside eleisaun antesipada.

Taur hatutan, iha momentu ne’eba, eis Prezidenti Repúblika, Kay Rala Xanana Gusmão fó konfiansa ba Primeiru Ministru hodi hakotu lejislatura. Tuir mai iha 2007, rezultadu eleisaun partidu mais votadu mak FRETILIN, Prezidenti Repúblika iha momentu ne’eba mak José Ramos Horta, fó prazu ba partidu mais votadu atu halo esforsu hodi reuni ho partidu sira seluk hodi hetan maioria atu sustenta Governasaun Segunda lejislatura nian.

Lee hotu :   PLP dezafia FRETILIN aprezenta kandidatu KAK

Maibé FRETILIN la konsege halo negosiasaun ho partidu seluk atu forma Governu, Prezidenti Repúblika deside fó ba CNRT hanesan segundu partidu mais votadu iha eleisaun.

“Iha 2012, Prezidenti Repúblika mak Taur Matan Ruak, kandidatu independente. Iha nia mandatu ne’e, mosu Governu rua mak hanesan, Kintu no Sestu Governu. Saida mak ha’u halo iha momentu ne’eba, ha’u husu buat ida de’it ba maun Xanana atu garante ba ha’u no iha kapasidade atu asegura Governativa  VI Governu ne’e to’o remata ka la’e, maun Xanana dehan, ha’u prontu atu asegura Governasaun to’o hotu, entaun ha’u fó posse ba Primeiru Ministru VI Governu konstitusional,” katak Taur Matan Ruak.

Maibé Taur Matan Ruak dehan, maske nune’e, AMP desponivel nafatin atu rona Prezidenti Repúblika kona ba prosesu ne’e.

Eis Prezidenti Repúblika ne’e haktuir, foin lalais nia halo enkontru ikus ho Prezidenti Repúblika, Francisco Guterres ‘Lu-Olo’ katak, solusaun ba impase polítiku ida ne’e, iha rua de’it, ida solusaun polítiku, no ida seluk solusaun konstitusional, maibé solusaun polítika ne’e, la posivel ona, tanba la’o ses dok tiha ona.

“Solusaun konstitusional katak, tanba minoria la konsege sustenta estabilidade Governativa, ami prepara-an no oferese ami-nia bom servisus, karik presiza ami nia servisu, ami prontu la’o, tanba ami iha apoiu polítiku tanba ami maioria ho 35 deputadus, entaun VIII Governu sei Governu ida metin to’o lejislatura remata,” katak Taur.cos

Add to Comments Here!!!!

error: Content is protected.
Secured By miniOrange
You might also like:
JORNAL NACIONAL GMNTV Loron-15 Fulan-Dezembru Tinan-2017

JORNAL NACIONAL GMNTV MEIO-DIA Loron-15 Fulan-Dezembru Tinan-2017

EDTL seidauk selu millaun $ 9.750 ba kompañia CNI,22

Diretor Jeral Eletrisidade Timor Leste (EDTL),...

Close