JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR deside EA, Alkatiri kontenti ”Povu konfia liu Xanana, Taur-Naimori

PR deside EA, Alkatiri kontenti  ”Povu konfia liu Xanana, Taur-Naimori

Sekretáriu Jeral Partidu FRETILIN, atual Primeiru Ministru, Mari Alkatiri, kontenti ho desizaun Prezidenti Repúblika (PR), Francisco Guterres ‘Lu-Olo’ nian ba Eleisaun Antesipada (EA).

Mari Alkatiri hateten, PR foti ona desizaun ba eleisaun antesipada, maibé hein Xefi Estadu ne’e atu marka data ba kampaña no votasaun.

“Prezidenti Repúblika marka lai data mak ita halo eleisaun antesipada, agora ita halo konsolidasaun de’it,” katak Alkatiri ba jornalista sira iha Palasiu Prezidensial Aitarak Laran Dili ho oin hamnasa, Sesta (26/01), hafoin Prezidenti Repúblika foti desizaun hodi intrega fali ba povu atu vota fila fali.

Nune’e mós Alkatiri afirma, ba eleisaun antesipada ne’e, FRETILIN seidauk iha akordu ho PD atu la’o hamutuk pakote ida ou lae.

Alende ne’e, Alkatiri afirma, durante fulan nen nia laran ne’e, Governu laiha krize, tanba maske osan laiha, maibé membru Governu sira hala’o nafatin sira nia kna’ar hanesan bai-bain.

“Parlamentu mak iha krize, tanba deputadu 30 labele hasoru deputadu 35. Osan lalika preokupa, ha’u sei poupa,” katak Alkatiri.

Alende ne’e, Xefi bankada PLP, Fidelis Mgalhães fiar katak, eleisaun antesipada ne’e, povu sei tau konfiansa bo’ot liu tan ba PLP, CNRT NO KHUNTO, ne’ebé lidera husi lideransa sira hanesan, Kay Rala Xanana Gusmão, Taur Matan Ruak, no José dos Santos Naimori.

“Hanesan PLP no hanesan AMP, ami prontu no ami hein eleisaun tuir mai. Ita nia povu hatene, se los mak tau intrese nasional iha nia fuan, entaun ami hakarak de’it, viva ba ita nia konstituisaun, no viva ba demokrásia. Ami sei kontinua tane aas valores demokrásia, tanba PLP ninia dever hanesan partidu iha Timor Leste, atu asegura demokrásia iha Timor Leste metin, no ita nia nasaun ne’e sei la’o iha paz nia laran,” dehan Fidelis.

Lee hotu :   Toó loron 13 Marsu: Partidu 4 no koligasaun 4 mak kompete ba EA

Kona ba atu hakat ba eleisaun antesipada partidu CNRT, PLP no KHUNTO sei pakote ida de’it, Fidelis dehan, asuntu ne’e partidu tolu sei diskuti.

“Ami partidu tolu ho lideransa Kay Rala Xanana Gusmão, Taur Matan Ruak ho José dos Santos Naimori, loke ona konjuntura foun ne’ebé partidu tolu harii bandeira hamutuk no metin no iha mós kolaborasaun ne’ebé metin,” katak Fidelis.

Tanba ne’e, Fidelis fiar katak, iha eleisaun antesipada tuir mai, lideransa Kay Rala Xanana Gusmão, Taur Matan Ruak ho Naimori sei hamrik hamutuk  iha palku atu ko’alia ba povu atu tau sira nia konfiansa ba lideransa tolu ne’e.

Fidelis dehan, PLP nunka politiza povu atu hetan vantazen eleitoral, tanba ne’e PLP fiar katak, partidu tolu ne’e (CNRT, PLP no KHUNTO) sei asegura nafatin maioria absoluta iha Parlamentu Nasional.

Kona ba orsamentu ba eleisaun antesipada, Fidelis Magalhães dehan, durante ne’e Governu sempre ko’alia ba públiku katak, orsamentu atu transfere pasiente ba rai liur laiha, maibé orsamentu ba eleisaun antesipada iha.

“Durante ne’e Governu mak dehan, laiha kondisoens ba selu ema moras no laiha kondisoens ba buat hotu, maibé to’o ikus afinal iha osan ba eleisaun antesipada, ne’ebé povu mak haree, no povu mak sei julga,”  lametan Fidelis.

Nune’e mós, Prezidenti Partidu Demokrátiku (PD), Mariano Asanami Sabino hateten, Prezidenti Repúblika foti ona desizaun ba eleisaun antesipada, hot-hotu tenki kumpri, tanba ukun povu nian, entaun povu mak tenki deside fila fali.

“Ha’u husu ho haraik an ba inan aman sira atu asume imi nia sidadania katak, ukun ne’e imi nian, povu mak hun no abut ba ukun, no ukun ne’e oportunidade atu servi povu. Tanba ne’e, PD fiar metin ba povu katak, PD sei ba oin nafatin,” relata Asanami.

Lee hotu :   PR Lú Olo: “Jerasaun foun tenki iha vontade dezenvolve nasaun”

Prezidenti PD ne’e afirma, saida de’it mak mosu iha eleisaun antesipada ne’e, PD sei simu ho liman rua, tanba povu mak tenki deside.

“Ami fiar povu sei vota hametin ninia knua demokrásia iha Timor Leste, mak vota ba Partidu Demokrátiku,” dehan Asanami.

Alende ne’e, Asanami dehan, odamatan PD nian sempre nakloke ba partidu ne’ebé de’it atu halo negosiasaun hodi la’o hamutuk.

Nia hatutan, partidu hotu iha komprimisu ba povu iha kampaña, maibé to’o ikus partidu sira ne’e lahatene jere sira-nia komprimisu.

“Prezidenti Repúblika fó fila fali ona ukun ne’e ba povu, ita hotu sei hamrik atu determina rai ne’e ba oin. Ha’u husu ba inan aman sira atu esforsu, no buka dalan hotu atu vota para depois ita nia ukun ne’e bele metin ona ba oin. Se ita bele dezafia katak, kiak mak ita-nia inimigu, tanba saida mak ita iha dapur laran tenki buka inimigu ba malu,” relata Asanami.

Prezidenti PD ne’e dehan, povu hatene ona katak, kuandu lideransa sira lahamutuk, Estadu Timor Leste monu, no nasaun Timor Leste nia naran monu iha mundu internasional.

“Ita la’os kontenti ho eleisaun antesipada, maibé ida ne’e failansu lideransa nian, tanba ne’e mak fila fali ba povu atu povu determina,” dehan Asanami.

Entretantu, Xefi bankada FRETILIN, Francisco Branco mós hateten, FRETILIN hateten bebeik ona katak, situasaun impase polítika ne’ebé akontese dadaun ne’e, to’o ona tempu atu povu deside fila fali.

“Ami sempre deklara katak, saida de’it mak desizaun Prezidenti Repúblika nian ami simu, no desizaun sai tiha ona, ami hakruk ba desizaun ida ne’e,” dehan Branco.

Lee hotu :   Antoninho Gonçalves troka Marcelina lidera CFJJ

Nia afirma, bainhira dekretu Prezidenti Repúblika nian kona ba disolve Parlamentu Nasional públika ona iha Jornal da República, entaun husi ne’eba mak Parlamentu Nasional disolvidu.

Alende ne’e, Francisco Branco dehan, kona ba orsamentu ba eleisaun antesipada ne’e, desizaun mak hanesan ne’e ona, Estadu tenki disponibiliza orsamentu atu realiza eleisaun antesipada ne’e.cos

Add to Comments Here!!!!

error: Content is protected.
Secured By miniOrange
You might also like:
PR deside ba eleisaun antesipada, Pe. Juvito: “Lalika protesta desizaun PR”

Prezidenti Repúlika, Francisco Guterres ‘Lú Olo’...

Deside ba EA PR Lú Olo: Povu maka bele rezolve impase polítika

Prezidente Repúblika (PR), Francisco Guterres ‘Lú...

JORNAL NACIONAL GMNTV Loron-26 Fulan-Janeiru Tinan-2018

Close