JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR tenki desidi tuir interese nasional ■ Ba EA, TL sei infrenta krize

PR tenki desidi tuir interese nasional ■ Ba EA, TL sei infrenta krize

Atu hakotu inserteza polítika ne’ebé maka oras ne’e dau-daun nasaun infrenta, Komite 12 Novembru husu ba Prezidente Repúblika (PR), Francisco Guterres ‘Lú Olo’, atu foti desizaun ba interese nasional tuir konstituisaun RDTL.

“Opsaun oi-oin, maibé lei inan iha konstituisaun RDTL ne’e ita tenki tane ás no ita rai demokrátiku ida, ita tenki hanoin mós valor demokrátiku, oinsa demokrasia ne’e bele funsiona ho diak no tenki haree ba interese nasional, tanba interese nasional katak ema hotu-hotu ninia interese iha ne’ebá hotu,” Vise Prezidente II, Komite 12 Novembru, Maria de Jesus, ba Grupo Média Nacional (GMN) iha ninia knar fatin, Balide, Díli, Kinta (25-01-2018).

Nia esplika, iha fulan neen (6) nia laran Governu ukun iha inserteza nia laran, tanba ne’e agora hotu-hotu hein hela desizaun saida maka PR sei foti ohin (sesta-Red).

“Klaru PR hatene didiak konstituisaun ninia hakarak, nune’e haree ba iha konstituisaun no haree ba rai ne’e hanesan rai demokrátiku ida, entaun ita hein katak PR sei foti desizaun ne’e iha dalan ida ne’e nia laran ka la’e no tau ás interese nasional ka la’e,”haktuir Vise Prezidente II, Komite 12 Novembru ne’e.

Nia akresenta, interese nasional ne’e la’os interese grupu no partidu no ema ida-idak ninian, interese nasional ne’e interese ida ne’ebé diak liu ba povu tomak ninian moris ou la haree ba interese partidu ida nian.

“Ita hein duni katak desizaun ne’ebé PR sei foti sei bazeia ba konstituisaun RDTL, sei foti ás valor demokrasia ninian no tau ás interese nasional, tanba hotu-hotu hakarak Governu funsiona, makina Estadu bele la’o no povu ninia aktividade buka moris mós bele la’o ho diak,” hateten Maria de Jesus.

Lee hotu :   META MALIK-ANTONIO VERDIAL ELEITU BA VISE PREZIDENTE PN

Entretantu antes ne’e mós PR tenta halo ona enkontru ho sosiedade sivil, konviksaun relijioza, lider antiga jerasaun tuan ninian, lider partidu polítiku no halo ona mós reuniaun Konsellu Estadu iha loron Kuarta (24/1) ne’e, hodi buka solusaun ba situasaun polítika ne’ebé oras ne’e dau-daun nasaun infrenta hela.

Konstituisaun RDTL

Tuir konstituisaun RDTL Artigu 90 (Konsellu-Estadu) 1. Konsellu-Estadu mak órgaun konsulta polítiku Prezidente-Repúblika, ne’ebé nia rasik prezide. 2. Halo parte Konsellu-Estadu mak: 30 a) Ex-Prezidente-Repúblika sira-ne’ebé la’ós destituídu; b) Prezidente Parlamentu Nasionál nian; c) Primeiru-Ministru; d) Sidadaun lima ne’ebé Parlamentu Nasionál hili ho harmonia tuir prinsípiu reprezentasaun proporsionál, ba períodu tuir durasaun lejizlatura nian, ne’ebé la’ós membru hosi órgaun soberania nian; e) Sidadaun lima ne’ebé Prezidente-Repúblika mak foti, ne’ebé la’ós membru hosi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian,.

Artigu 91.o (Kompeténsia, organizasaun no funsionamentu Konsellu-Estadu nian) 1. Konsellu-Estadu maka bele: a) Fó-sai kona-ba disolusaun Parlamentu Nasionál; b) Fó-sai kona-ba demisaun Governu nian; c) Fó-sai kona-ba deklarasaun funu no oinsá atu hala’o dame; d) Fó-sai kona-ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika wainhira nia hala’o ninia knaar, no wainhira nia husu karik. e) Halo ninia Rejimentu internu; 2. Reuniaun Konsellu-Estadu nian la’ós públiku. 3. Lei mak define Konsellu-Estadu nia organizasaun no funsionamentu.

Deside ba EA, TL sei infrenta krize

Bloku Opozisaun Aliansa Maioria Parlamentar (BOAMP) iha Parlamentu Nasional (PN) hato’o sira nia opiniaun ba públiku katak, kuandu Prezidenti Repúblika (PR), Francisco Guterres ‘Liu-Olo’ foti desizaun hodi ba Eleisaun Antesipada (EA), Timor Leste sei infrenta krize ekonómia no krize polítika.

Lee hotu :   AMP rejeita hadau poder husi VII Governu

Xefi bankada CNRT, Arão hateten, AMP la kestiona Prezidenti Repúblika nia desizaun, maibé tenki tetu didiak situasaun sira ne’e, atu labele sakrifika fali povu.

“Eleisaun antesipada nia impaktu mós, ita bele krize ekonómia no krize polítika, kuandu ita opta ba eleisaun antesipada. Tanba ne’e mak ami hanoin kompetensia ne’e Prezidenti Repúblika nian, maibé ami husu atu halo analiza ba situasaun sira ne’e,” relata Arão Noe ba jornalista sira iha PN, Kinta (25/01).

Arão hatutan, BOAMP iha  obsaun rua atu hakotu impase polítika iha rai laran ne’e mak hanesan,  ida mak demite Governu hodi forma fali  VIII Governu.

“Desizaun ida seluk mak desolve PN, ne’ebé nia impaktu ba eleisaun antesipada, maibé eleisaun antesipada, ita presiza atravessa konsekuensia lubuk ida, tanba Orsamentu Jeral Estadu 2018 laiha, orsamentru duo-desímu ne’ebé mak iha, preve de’it ba fulan tolu nian, liu tiha fulan tolu ne’e, Estadu atu moris ho saida,” katak Arão Noe.

Alende ne’e, Arão Noe mós preokupa katak, dadaun ne’e, tempu uda, entaun kuandu atu realiza eleisaun antesipada, movimentasaun material eleisaun sir aba Suku sira ne’ebé izoladu ne’e, sei difisil tebes atu to’o iha ne’eba.

“Opsaun ida formasaun VIII, se fó ba AMP, ami kompromete katak, iha fulan ida nia laran ami bele rezolve situasaun sira ne’e, bele forma Governu, programa Governu aprova, lei organika Governu bele pronto iha fulan ida, no OJE 2018 bele aprova iha fulan tuir mai,” relata Arão.

Nia hatutan, kuandu Prezidenti Repúblika foti desizaun ba eleisaun antesipada, Estadu Timor Leste tenki moris ho situasaun inserteza fulan 6 tan.

Alende ne’e, Xefi bankada FRETILIN, Francisco Branco, hateten, Grave liu bainhira proposta Orsamentu Retifikativu tama, opozisaun rejeita. “Situasaun ne’e krize institusional ka lae,” katak Branco.

Lee hotu :   Diálogu bele solusiona tensaun polítika, Alkatiri: Presiza prezensa Xanana Gusmão

Alende ne’e, Xefi bankada PD ne’e mós dehan, desizaun hotu tenki iha nia impaktu, inklui eleisaun antesipada.

Maria Teresa dehan, kuandu desizaun Prezidenti Repúblika nian atu forma VIII Governu mós, FRETILIN mak tenki lidera nafatin, tanba FRETILIN mak manan eleisaun.

“Maibé desizaun kuandu sai ona, impaktu saida de’it mak ita atu hasoru, ita tenki hasoru, maibé ita Timor ultra pasa buat barak ona, no maturidade mós iha los dinámika, ita espera katak, sei laiha krize bo’ot atu mosu,” katak Teresa.ves/cos

Add to Comments Here!!!!

error: Content is protected.
Secured By miniOrange
You might also like:
EMISAUN DIRETA DESIZAUN PRESIDENTE DA REPUBLIKA

JORNAL NACIONAL GMNTV Loron-25 Fulan-Janeiru Tinan-2018

GRANDE ENTREVISTA hamutuk ho Sr. Jose Reis nomos Dr.Deonisio Babo

Close