JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FRETILIN akuza CNRT fahe projetu hodi sosa votus CNRT-PLP ezije TC tenki brani auditoria ZEESM

FRETILIN akuza CNRT fahe projetu hodi sosa votus CNRT-PLP ezije TC tenki brani auditoria ZEESM

Bankada FRETILIN iha Parlamentu Nasional (PN), akuza bankada CNRT katak, durante tinan 10 nia laran CNRT kaer ukun, kuandu besik ona eleisaun Parlamentar, CNRT sempre fahe projetu hodi sosa povu nia votus.

Ho atitude CNRT nian ne’ebé fahe projetu ne’e, mak ohin loron hamosu dívidas Estadu bo’ot tebes.

Maibé iha sorin seluk, bankada CNRT rejeita akuzasaun ne’e hodi ezije ba Tribunal de Contas (TC) tenki brani atu halo auditoria ba projetu Zona Espesial Ekonómia Sosial Merkadu (ZEESM) Oe-cusse, tanba deskonfia korupsaun la’o maka’as los iha projetu ZEESM ne’ebé lidera husi aktual Primeiru Ministru Mari Alkatiri, tempu liu ba.

Xefi bankada FRETILIN, Francisco Branco, hateten, povu matenek no matan moos ona, tanba durante tinan 10 CNRT kaer ukun hodi gasta osan barak tebes, maibé rezultadu laiha.

“Ha’u hateten ida ne’e tanba, iha duni informasaun, bainhira tama ona iha kampaña iha tinan 2007, Governu CNRT fahe projetu, ida ne’e ho objetivu saida, atu sosa votus, maibé povu matenek liu polítiku sira, povu matenek liu ita,”katak Francisco Branco iha plenária PN, Kinta (08/02).

Branco solisita VII Governu ne’ebé lidera husi Primeiru Ministru (PM), Mari Alkatiri, tanba atu halo auditoria ba Ministériu hot-hotu, hahú husi Governu nia administrasaun jeral, ho objetivu  atu hamosu fila fali Governu boa jestaun no transparensia ba finansas públika Estadu  nian.

Tanba ne’e, Branco lori bankada FRETILIN nia naran, kongratula Governu, tanba Governu atu halo auditoria ba Ministériu hotu, inklui projetu ZEESM Oe-cusse.

“Inisiativa ida ne’e diak tebes, hodi hatur fila fali boa governasaun, transparensia no finansas públikas Estadu nian, tanba laiha sentidu hamosu 48 projetu iha tempu ne’ebé tuir lolos labele ona atu hasai desizaun,” afirma Francisco Branco.

Lee hotu :   Posse ba dala ikus, PR Lú Olo husu Timor-oan tenki dedika-an iha servisu

Xefi bankada FRETILIN ne’e esklarese, agora deputadu CNRT balun kestiona VII Governu ida ne’e, ne’ebé hala’o viazen ba Munisípiu. Governu ida ne’e nu’udar jestaun Estadu nian, entaun tenki hala’o nia funsaun.

“Ami suporta Governu atu halo auditoria hahú kedas husi ZEESM, se ZEESM sala mós sala, la’os tanba sala, ita hotu applause, ida ne’e lalos. Tanba ne’e ami hakarak reafirma ami nia pozisaun ba tau fila fali polítika Estadu nian ba boa governasaun, transparensia no jestaun finansas públika,” katak Branco.

Hatan ba kestaun ne’e, deputadu Duarte Nunes, husi bankada CNRT, hateten, akuzasaun FRETILIN nian ne’e, latuir ona saida mak la’o durante ne’e, tamba povu sente benefisiu husi tinan 10 CNRT kaer ukun.

“Tinan 10 kaer ukun ne’e, ita hotu hatene katak, tinan 3 ba rezolve problema de’it, se mak halo problema ida ne’e?, tinan tolu ikus ne’e, Governu lidera husi eis Primeiru Ministru, Rui Maria de Araújo, tanba ne’e ita lalika inventa sasan, kampaña bele kampaña ba, maibé ita lalika inventa sasan,”lamenta Duarte Nunes.

Tanba ne’e, Duarte Nunes husu ba FRETILIN atu labele ko’alia de’it, maibé tenki aprezenta faktus hodi diskuti iha públiku.

“Husu ba Governu atu tau lista mai para ita haree tok, kompañia nia nain sira, selae ita buka kompaña sira ne’e, atu lori mai plenária ne’e para ita haree se mak hetan projetu sira ne’e, CNRT nian hotu ka ita hotu nian. Tanba ne’e mak ha’u hakarak hateten, karik ami mak sosa votus, halo favor ida lori ba KAK, lori ba iha ne’eba para investiga,” lamenta nia.

Alende ne’e, Xefi bankada CNRT, Arão Noe, hateten, konta Jeral Estadu nian kada tinan Parlamentu Nasional mak diskuti hodi aprova, maibé konta Jeral Estadu tinan 2016 mak seidauk diskuti.

Lee hotu :   PR garante Timor-Leste ultrapasa krizi polítika

“Ha’u hein katak, rezultadu husi ZEESM nian mak tenki mai, PDHJ halo relatóriu ida mai Parlamentu kona ba violasaun direitus humanus iha Oe-cusse, karta ida mai husi Mari Alkatiri hateten katak, hasai tiha provedoria ne’e, tanba nia halo fali akuzasaun. Ha’u hein katak, auditoria ne’ebé lori mai, ita hotu simu ho liman rua, labele kona ba ha’u ita dehan bele, mas kona ba ita aan rasik ita dehan labele,” relata Arão Noe.

Nune’e mós Xefi bankada PLP, Fidelis Magalhães, hateten, tenki iha auditoria ida ne’ebé los ba Ministériu sira hotu.

“Ita labele halo persegisaun polítika, kuandu ita nian mak involve korupasaun, ou keta lejislador sira mak fó projetu ba malu, ida ne’e mós ita tenki kee sai hotu, tanba ita nia povu la merese ida ne’e, ita asume kargus publikus, ita mak hun ba korupsaun,” dehan Fidelis.

Tanba ne’e, PLP hakarak iha auditoria ne’ebé urjente, maibé labele sai fali fonte ba persegisaun polítika.

Fidelis afirma, durante tinan 15 ne’e, la’os partidu CNRT de’it mak kaer ukun, maibé Partidu Demokrátiku no FRETILIN mós involve iha laran, tanba ne’e kuadrus Partidu Demokrátiku no FRETILIN mós prepara an. Cos

Add to Comments Here!!!!

error: Content is protected.
Secured By miniOrange
You might also like:
Inspesaun Jogus identifika Hamatomo laiha fatin ba jogus • Mahatan Timor Group uza makina Kasino

Inspesaun do Jogus halo ona verifikasaun...

JORNAL NACIONAL GMNTV Loron-8 Fulan-Fevereiru Tinan-2018

Yohan Goutt Gonçalves ho Orgulho Representa Timor-Leste iha Jogos Olimpicos de Inverno 2018 PyongChang

Jogos Olimpicos de Inverno 2018 Pyong...

Close