JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Orgaun eleitoral propoin dia 12 de Maio nudar data EA

Orgaun eleitoral propoin dia 12 de Maio nudar data EA

Orgaun eleitoral hanesan Comissão Nacional de Eleições (CNE), Secretário Técnico Administração Eleitoral (STAE) no Ministério Administração Estatal (MAE) propoin loron 12 fulan Maiu tinan ne’e, ba Prezidente da Republika, Francisco Guterres Lu-olo hanesan data ba eleisaun antesipada.

Tuir esplikasaun prezidente CNE, Alcino de Araujo Barris katak lei eleitoral numeru 9/2017  artigu 17 dehan, em kazu desolusaun Prezidente da Republika dekreta loron 60 minimu ba eleisaun antesipada.

 “Tanba ne’e, se Prezidente da Republika opta ami nia proposta ba loron 12 fulan Maiu ba aleisaun, entaun iha loron 20 fulan Fevereiru mak Prezidente da Republika foin dekreta data eleisaun,” dehan prezidente CNE, Alcino de Araujo Barris iha grande entrevista iha studio II, Bebora, Segunda (5/2/18).

Basa tuir artigu 20 konaba sequencia tempu ne’ebe tenki priense iha lei eleitoral numeru 9/2017 dehan, hahu husi data markasaun ba eleisaun, partidu politiku sira iha loron 20 ba koligasaun, loron 30 ba partidu politiku sira atu halo inskrisaun ba lista kandidatura, loron 10 ba averiguasaun husi Tribunal de Recurso, loron 2 ba konkorente sira atu fo resposta, loron 2 tan ba tribunal de Recurso ba fiksasaun, depois loron 30 ba partidu politiku sira halo kampaña eleitoral, loron 2 ba silencio no loron 1 ba votasaun. Total loron hirak ne’e priense ona artigu 20 iha kazu normal, laos ona em kazu disolusaun.

Ba Alcino Barris, CNE preparadu atu organiza eleisaun antesipada hanesan eleisaun liuba, tanba CNE iha rekursu kualifikadu no garante eleisaun sei lao ho imparsial no susesu.

Iha parte seluk, Diretur Jeral STAE, Acilino Manuel Branco dehan orgaun ida ne’e nia papel mak atu organiza eleisaun, nune’e orgaun ne’e prontu kualker tempu.

Lee hotu :   FRETILIN HO CNRT KAER GOVERNU IMPLEMENTA PEDN

“Ami halo esforsu maximu tebes, kordenasaun hamutuk CNE ho parseiru sira atu ajusta ita nia planu operasional sira no iha tempu badak ami sei halo resensiamentu iha nivel munisipiu no diaspora, hau espera molok eleisaun material sira kompletu hotu ona”, dehan DJ Acilino

Tuir dadus husi STAE iha eleisaun tinan kotuk, eleitor pursentu 76 mak partisipa iha eleisaun husi numeru eleitores hamutuk rihun 775, kuaze rihun 200 resin (20%) mak la partisipa.

Iha tinan kotuk liu ba, povu Timor-Leste partisipa ona festa demokrasia hodi hili partidu ne’ebe sira fo fiar, hodi kaer Governu ba periodu tinan lima (5). Iha periodu kampaña partidu hamutuk 21 mak harame palku demokrasia. Partidu hirak ne’e mak partidu koligasaun BUP, partidu APMT, KHUNTO, PEP, PST, PDP, CNRT, PR, UDT, PDC, MLPM, PLP, PD, UNDERTIM, PUDD, PTD, Frente-Mudança, PSD, CASDT, PDN no FRETILIN.

Husi rezultadu eleisaun hatudu partidu lima (5) mak liu bareira 4% mak partidu FRETILIN ho kadeira 23, CNRT ho kadeira 22, PLP ho kadeira 8, PD ho kadeira 7 no KHUNTO ho kadeira 5.

Rezultadu ne’e laiha partidu ida mak manan maioria hodi forma Governu, nune’e partidu mais votadu FRETILIN realiza enkontru hodi bolu partidu haat seluk atu forma koligasaun, maibe partidu CNRT, PLP no KHUNTO deside hili opozisaun, nune’e partidu PD ba hamutuk ho FRETILIN hodi avansa ba Governu minoritariu.

Hafoin membru Governu simu tiha tomada de posse husi Prezidente da Republika, Francisco Guterres Lu-Olo, VII Governu enfrenta kedas krizi politika no krizi institusional, tanba hamrik ho Governu minoritariu.

Situasaun ne’e mosu bainhira Aliansa Maioria Opozisaun Parlamentar iha parlamentu nasional halo rezeisaun ba programa Governu nian, tanba programa hirak ne’e, tuir aliansa la koresponde ba povu nia moris.

Lee hotu :   Funsionáriu públiku SEJT balun iha intensaun fasilita deit nia familía ba serbisu iha Koreia no Australia

Hafoin ne’e aliansa maioria opozisaun halo tan musan sensura hasoru Governu tanba la lori programa daruak ba parlamentu nasional atu deskute.

La to’o ba ne’e deit, aliansa maioria opozisaun mos halo rezeisaun ba orsamentu retifikativu (OR) ho karakter urjensia, tanba sira konsidera Governu desvia asuntu, lolos lori lai programa ba mak orsamentu.

Durante fulan neen (6) nia laran, VII Governu ne’ebe lidera husi Primeiru Ministru, Mari Alkatiri hamrik iha politika inserteza nia laran, nune’e iha loron 26 fulan Janeiru liu ba, Prezidente da Republika, Francisco Guterres Lu-Olo deside disolve parlamentu nasional no konvoka eleisaun antesipada hodi hakotu impase politika ne’ebe lao, hodi fo fila poder ba povu, maibe to’o agora Prezidente da Republika seidauk dekreta data eleisaun antesipada. mra

Add to Comments Here!!!!

error: Content is protected.
Secured By miniOrange
You might also like:
JORNAL NACIONAL GMNTV Loron-6 Fulan-Febereiru Tinan-2018

Haburas Vida Espiritual GMNTV eps.08

City Feuaters GMNTV eps.01

Close