JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FRETILIN simu ona karta xamada husi CNE  AMP seidauk

FRETILIN simu ona karta xamada husi CNE  AMP seidauk

Partidu FRETILIN konfirmadu simu ona karta xamada husi Comissão Nacional de Eleições (CNE) relasiona ho aktu kampaña eleitorál ne’ebé la’o ona durante semana ida nia laran ne’e.

Karta CNE ne’e FRETILIN simu iha loron 18 fulan Abril 2018, CNE haree no avalia katak, FRETILIN mós komete iregularidade, viola régra no kontra paktu unidade nasionál, ne’ebé partidu polítiku individual sira no koligasaun partidária asina hamutuk iha CNE, molok hahú kampaña.

Iha karta xamada ne’e, CNE bolu atensaun ba partidu polítiku hotu inklui FRETILIN, atu labele insulta malu, maibé fó prioridade ba aprezenta programa ba povu iha kampaña.

Adjuntu Sekretáriu Jeral FRETILIN, Flavio da Silva hateten, depois kampaña polítika la’o semana ida, CNE konvida partidu polítiku hotu halo avaliasaun, li-liu konaba iregularidade sira ne’ebé mak partidu sira komete iha kampaña eleitorál.

“FRETILIN simu karta husi CNE hodi fó hanoin no aviza ba partidu polítika hotu atu kumpri de’it mak lei, no kaer metin ba paktu ne’ebé mak asina tiha ona.  Karta ne’ebé ami simu, CNE bolu atensaun ba partidu polítiku sira konaba linguajen, defamatória iha kampaña eleitoral,” haktui Flavio da Silva ba GMN iha nia eskritóriu Comite Central FRETILIN (CCF) Comoro Dili, Sesta (21/04).

Nia haktuir, FRETILIN iha komitmentu bo’ot nafatin atu halo kampaña ida ne’ebé atu aprezenta programa atu konkista konfiansa povu nian konaba, saida mak FRETILIN hanoin atu halo, bainhira hetan konfiansa atu kaer VIII Governu.

Flavio esklarese, FRETILIN iha obrigasaun atu aprezenta programa, hodi povu hatene katak, saida mak FRETILIN atu halo iha VIII Governu mai.

“Xamada atensaun ne’ebé CNE aprezenta mai partidu sira, hanesan atu bolu atensaun de’it katak, kaer metin ba unidade nasionál, atu fokus ba programa iha tempu kampaña,” Flávio esplika.

Lee hotu :   KEJDKDRTL husu Alkatiri hakruk ba kontituisaun ■Polítika Alkatiri fo presaun ba PR

Alén de ne’e, Flavio hateten, iha kampaña eleitoral durante ne’e, FRETILIN la insulta ema ka partidu ida, maibé esklarese de’it situasaun polítika ne’ebé la’o iha rai laran.

“Ema balun kampaña toka liu ba, dignidade membru partidu nian balun. Hanesan ita rona iha kampaña, dalaruma ema toka liu ba Sekretáriu Jeral FRETILIN nia pessoa, ida ne’e tuir loloos labele akontese. Partidu ida iha obrigasaun atu aprezenta programa hodi halo povu bele moris hakmatek, entaun iha FRETILIN nia kampaña, esklarese de’it situasaun sira ne’ebé adversáriu sira lansa iha sira nia kampaña ne’e,” katak Flavio.

Nia afirma, FRETILIN halo ona avaliasaun ba nia kampaña durante semana ida ne’e, tanba povu entusiaizmu tebes atu rona FRETILIN nia programa, tanba ne’e ba oin FRETILIN espera, partisipasaun povu nian iha kampaña FRETILIN bele aumenta barak liu tan.

Iha parte seluk, membru Konsellu Diretiva Nasional Koligasaun Aliansa Mudansa ba Progresu (AMP), Dionisio Babo hateten, AMP seidauk simu karta husi CNE, li-liu karta xamada atensaun konaba kampaña.

“Ita iha dokumentasaun ba kampaña hot-hotu nian, li-liu kona ba linguajen ne’ebé iha, ha’u hanoin tenki haruka mós ba partidu hotu, la’os ba partidu ida ka koligasaun ida rua de’it, tanba iha liafuan balun husi partidu seluk ne’ebé mós CNE tenki tau matan,” katak Dionisio Babo.

Nia esklarese, CNE labele tau matan de’it ba AMP, maibé tenki tau matan mós ba lingaujen partidu seluk nian, hodi fó xamada.

Nune’e mós, Membru Konsellu Diretiva Nasional AMP, Mericio Akara lori AMP nia naran hato’o sira nia pontu devista konaba propaganda sira ne’ebé mak partidu FRETILIN ataka AMP katak, AMP ba kampaña laiha programa ne’e lalós, tanba AMP la halo propaganda negativu, maibé aprezenta programa.

Lee hotu :   Mari Alkatiri: FRETILIN sei tetu hodi aprova orsamentu

Nia dehan, durante kampaña ne’e, AMP tuir de’it régras no lei ne’ebé mak vigora ona, no AMP iha komitmentu atu kontinua hametin paz no estabilidade atu festa demokrásia ne’e bele la’o di’ak.

Antes ne’e Prezidenti Repúblika (PR) Francisco Guterres Lú Olo mós apela ona ba partidu polítiku sira, inklui koligasaun partidária sira atu labele insultu malu, maibé aprezenta maka programa, tanba tempu to’o ona, atu povu hakarak rona programa.

“Tempu ba kampaña labele uza hodi insulta malu. Atu halo desturbasaun ba ita-nia istória. Atu halo kleuk ita-nia pasadu. Ita-nia sidadaun sira hakarak rona ideias, sira lakohi rona insultus ne’ebé dirijente polítiku sira halo ba malu. Ita-nia joven sira hakarak simu edukasaun husi demokrasia no debate. Sira lakohi simu edukasaun husi demagojia ka insultus. Futuru ita-nia rain nian, futuru ita hotu nian, aprezenta liuhusi programa polítiku,” apela Xefi Estadu liu husi mensajen estadu.

Nune’e mós foin lalais ne’e Prezidenti CNE deklara ona, atu fó karta xamada ba partidu politiku sira, inklui koligasaun partidária sira ne’ebé mak viola regra kampaña eleitoral no paktu unidade nasional ne’ebé sira asina hamutuk iha CNE molok kampaña.

Partidu polítiku individu ho koligasaun partidária ne’ebé oras ne’e dadaun hola parte iha kampaña atu konkore iha eleisaun antesipada ne’e, hamutuk 8 hanesan, partidu avansa individual hat (4) hanesan Partidu FRETILIN, Partidu Esperansa da Patria (PEP), Partidu Demokrátiku (PD), ho Partidu Repúblikanu (PR) no koligasaun partidária hamutuk hat (4) maka hanesan, Frente Dezenvolvimentu Demokrátiku (FDD), Aliansa Maioria ba Progresu (AMP), Movimentu Dezenvolvimentu Nasional (MDN) no Movimentu Sosiál Demokrata (MSD).cos/ixo

Add to Comments Here!!!!

error: Content is protected.
Secured By miniOrange
You might also like:
KNUA Kay Rala Xanana Gusmão deklara apoiu AMP

Grupo Knua Kay Rala Xanana Gusmão...

Xefe Suko Maubisse preokupa prezensa negosiante Xineza

Xefe Suko Maubise Vila ,Wilson Nivio...

Abílio Araújo: “Tinan 10 nia laran buat barak la’o lalós”

Membru Comite Central FRETILIN (CCF) Abílio...

Close