JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN-Governu kongratula Xanana konvense ConocoPhillips ■FRETILIN kontinua dúvida

PN-Governu kongratula Xanana konvense ConocoPhillips ■FRETILIN kontinua dúvida

Deputadu Parlamentu Nasional (PN), no Governu daualu kongratula esforsu no sakrifísiu husi Reprezentante Espesiál Governu Timor-Leste, Kay Rala Xanana Gusmão, ne’ebé konvense kompañia ConocoPhillips, tanba susesu hodi sosa asoens (Saham) kompañia internasional ne’e nian ho 30% ka millaun US$350.

Tuir deputadu husi bankada Partidu Libertasaun Popular (PLP), Abel Pires, hatete katak, maske ho idade ne’ebé avansadu, maibe Xanana Gusmão nafatin luta hodi atinji povu Timor-Leste nia mehi atu sai na’in ba nia riku soin rasik.

“Maun bo’ot ne’ebé dala ida tan loke pasu di’ak atu dada kadoras mai Timor-Leste, ita hotu hatene katak, ezistensia ne’ebé akontese iha kompañia iha greater sunrise nian, kompañia ConocoPhillips, dalan sei naruk, maibe pasu ida ne’e maun bo’ot lori ona susesu di’ak”,tenik deputadu PLP ne’e.

Tamba ne’e mak deputadu Abel Pires, husu meja Parlamentu Nasionál (PN) atu komunika ho Governu hodi prosesa ona ratifikasaun Fronteira Marítima (FM), ne’ebé asina tiha ona husi Governu Timor-Leste ho Australia iha Nova Iorque, Estados Unidos da América.

“Ita iha Parlamentu ida ne’e, iha knár importante ne’ebé seidauk halo, ratifikasaun ba tratadu ne’ebé mak asina tiha ona, tanba ne’e ha’u husu ba meja, atu fó hanoin ba Governu Timor-Leste hatama lalais tratadu ne’e mai Parlamentu ratifika para ita loke dalan ba ita-nia riku so’in ne’e mai”,Sujere deputadu bankada PLP, Abel Pires liu hosi plenaria, Tersa (02/10/2018).

Nune’e mos, Sekretariu Estadu Komunikasaun Sosial, Mericio Juvinal dos Reis Akara, hateten, VIII Governu sei publika rezultadu husi akordu ne’e, liu hosi komunikadu ofisial ruma, atu nune’e públiku labele dúvida tan.

“Ami sei hasai komunikadu ofisial ida, hodi esplika ba públiku konaba ida ne’e, maibe estadu Timor-Leste apoia tomak atu dada pipeline mai, laiha dúvidas. Ita bo’ot sira (públiku) kalma oituan, tanba maun bo’ot Xanana ho nia ekipa sei esplika, hanesan babain nia halo, bainhira nia fila, maun Xanana sempre halibur ema hotu hodi esplika publikamente, maibe ita tenke kontente ho pasu importante ida ne’e”,katak Akara.

Lee hotu :   TL la multa husi prolongamentu ba selu asaun ConocoPhillips

Governante ne’e mós husu ba povu Timor-Leste, atu bele orgullu ho esforsu maun bo’ot Xanana nian, hodi Timor-Leste sai na’in rasik ba nia riku so’in iha tasi.

“Hanesan sidadaun, ita hotu tenke kontente, tanba ida ne’e pasu importante ne’ebé Estadu Timor-Leste hetan, liuhosi maun bo’ot Xanana, ne’e desizaun ida mais estratéjiku, ne’ebé mak maun bo’ot Xanana halo, ita tenke orgullu ba estratejia ne’ebé maun bo’ot Xanana foti, tanba ne’e, ita iha razaun forte tan, atu negosia ho kompañia sira hodi dada pipeline mai Timor, tanba atu dada kadoras ne’e tenki negosia ho kompañia, maibe nia (Xanana) halo ona relasaun di’ak, no komunikasaun di’ak, no halo ona diskusaun maka’as ho kompañia ConocoPhillips, ida ne’e progresu bo’ot ida ne’ebé mak ita hetan”,subliña Akara.

Nia rekoñese, iha grupu ka pessoal balun dúvida ho esforsu maun Xanana nian, maibe presiza akompaña prosesu tomak, hodi nune’e bele kompriende.

“Ema maioria kontente no orgullu, se ema balun la kontente, ka konfuzaun,  balun dúvida ho pozisaun Timor atu dada pipeline mai, kona-ba progresu ida ne’e, presiza de’it sira akompaña tan informasaun, no intende estratejia maun Xanana nian dada pipeline mai Timor-Leste, kuandu sira hatene ona oinsa dada pipeline mai, sira akompaña prosesu ne’ebé maun Xanana halo, sira sei la dúvida tan”,katak Akara.

Membru VIII Governu ne’e esklarese, prosesu atu dada greater sunrise ne’e foin mak hahú, tanba prosesu negosiasaun Fronteira Marítima (FM) foin mak remata.

“FM ita deside tiha ona, agora mak tempu atu deside pipeline, tanba ne’e mak momentu agora tenke negosia duni ho kompañia, ho joint venture, dalan mak ida ne’e, ne’e kestaun negosiu, tanba ne’e mak maun Xanana halo duni pasu ida ne’e”,tenik tan Akara.

Lee hotu :   La ba aprezenta tan programa iha PN, Alkatiri: “sira la konsidera hau”

FRETILIN kontinua dúvida

Maske nune’e, deputadu bankada FRETILIN, Joaquim dos Santos, kontinua dúvida ho prosesu hirak ne’e no husu VIII Governu atu klarifika ba povu, konaba pozisaun Xefi negosiador Kay Rala Xanana Gusmão ka reprezentante ne’ebé mak asina akordu ho kompañia intrernasional ConocoPhillips kona ba asoens ne’ebé Timor-Leste sosa husi kompañia refere.

“Ha’u haree buat ne’e rame loos iha media sosial, Governu presiza esklarese kapasidade ita-nia reprezentasaun asina akordu ne’e ministru ka Señor Xanana”,hateten deputadu bankada FRETILIN, Joaquim dos Santos liu hosi plenaria, Segunda (01/10/2018).

Hatan ba preokupasaun ne’e, Ministru Reforma Lejislativa no Asuntu Parlamentar (MRLAP), Fidelis Leite Magalhães, hateten, Governu ho Parlamentu Nasionál sei kontinua komunika ba malu, atu nune’e bele haree prosesu ne’e.

“Parlamentu ho Governu iha kooperasaun di’ak mak Parlamentu la’o hela ne’e, no reprezentasaun governu nian mai beibeik, ne’ebé ita hotu hein hela inisiativa ne’e agora atu ba oin halo nusa, tenke iha diskusaun lai iha Parlamentu, parte Governu nian ami hein depois sei kontinua komunika nafatin ho parte Parlamentu”,katak Fidelis.

Governante ne’e realsa, informasuan kompletu sei divulga, maibe importante mak apoia másimu husi Órgaun lejislador nian atu aselera prosesu FM ne’e.

“Detalla ne’e depois mak divulga, maibe prosesu ne’e hotu sei ho apoia husi Parlamentu”,akresenta MRLAP.

Antes ne’e, Prezidente Parlamentu Nasionál, Arão Noe Amaral, deklara, Parlamentu hein de’it Governu atu aprezenta tratadu ne’e, atu bele halo ona ratifikasaun.

Tratadu ba Fronteira Marítima entre Timor-Leste ho Australia ne’e, asina iha loron 06, fulan Marsu, tinan 2018, no asina husi reprezentante Timor-Leste ministru konsellu Ministru Agio Pereira no Ministra Negosiu Estranjeiru Julia Bishop.

Lee hotu :   Xanana husu PR Lú Olo promulga lei fundu petrolíferu ■PM Taur: La promulga, sei tau millaun USD 650 iha OJE

Prosesu asina akordu hodi sosa asoens ConocoPhillips nian 30% entre Timor-Leste ho kompañia internasionál ConocoPhillips ne’e, hala’o iha loron 28, fulan Setembru, tinan ne’e, iha Bali, Indonesia.

Iha parte seluk jurista Manuel Tilman konsidera dada kadoras mina no gas mai Timor-Leste sei fó benefisiu ba povu hanesan kria fatin servisu ba joven no fábrika

“Ita dada kadoras mina no gas mai Timor ne’e vantajen boot, tanba iha billiaun US$50 iha tasi okos, kuandu mina no gas dada ba Australia ita la iha taxa, lolos ita bele aproveita “hateten justista Manuel Tilman ba JN-Diário foin lalais ne’e, iha nia fatin praia dos coqueros Díli.

Tuir ekonomista ne’e mós se mina no gas la dada mai Timor, auto estrada iha munisipiu Suai Governu gasta osan saugati deit, tanba movimentasaun transporte sei la sirkula barak.

“Gasta ona osan milliaun US$700 ba auto estrada ne’e atu uza laos animal sira mak pasiar iha leten,” dehan nia.

Tanba foin lalais iha debate programa VIII governu, Primeiru Ministru Taur Matan Ruak promete sei kria fatin servisu ba ema nain rihun 60, tan ne’e dada kadoras mai ne’e oportunidade diak. Say/ety

Add to Comments Here!!!!

error: Content is protected.
Secured By miniOrange
You might also like:
Governu identifika kauza prinsipál ba dezenvolvimentu ekonómiku iha Timor Leste

Governu identifika kauza prinsipál ba dezenvolvimentu...

PN fó votus pezar ba vítima terramoto-Indonesia

Liu husi votasaun iha uma fukun...

Polémika fundadór FRETILIN Abilio Araújo: “FRETILIN povu Timor-Leste nian”

Sekretariu Jeral Partidu FRETILIN, Mari Alkatiri...

Close