JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana:Tenki tau ás interese nasionál ■Lahatene, lalikan “asbun”

Xanana:Tenki tau ás interese nasionál ■Lahatene, lalikan “asbun”

Xefi negosiador prinsipal Fronteira Marítima (FM), Kay Rala Xanana Gusmão, informa, partidu no sidadaun hotu iha Timor-Leste (TL), tenki tau interese nasaun ás liu interese hotu-hotu, hodi hases tiha interese partidu partidaria.

“Ita mai halo asaun de grasa iha AMP no CNRT nia fatin, mas hakarak husu ba partidu hotu-hotu, ita-nia polítika oin nusa de’it, kuandu ita hatene diak, nasaun nia interese maka ida ne’ebé, partidu hotu-hotu tenki tau ninia interese iha okos”,Xefi negosiador FM, liu husi konferensia imprensa ne’ebé realiza iha sede CNRT, Bairo Formoza, Díli, Segunda (08-10-2018).

Nia esplika, partidu hotu-hotu tenki kaer prinsipiu ida, katak interese nasaun nian maka tenki ás liu, interese hotu-hotu.

“Partidu hotu-hotu iha ne’ebé de’it, iha mundu iha prinsipiu ida boot liu, kuandu interese nasaun nian, partidu nia interese tenki tau iha okos, sé partidu ida iha mundu, sé partidu ida maka haree interese nasaun nian, depois nia kaer partidu nia interese tau fali iha leten, chaos (Ingles-red) no estrañu”,haktuir Xanana Gusmão.

Xefi negosiador FM rekoñese, katak rezultadu Estadu Timor-Leste sosa asaun 30% husi kompaña ConocoPhilips, ne’e la’os Estadu maka manan, maibé povu maka manan.

“Ita hotu bele hamutuk hodi barani, maibé ita atu manan ida ne’e, la’os ha’u mai rona viva Xanana no avo Nana, maibé povu, povu nia futuru, labarik no joven sira maka manan, tanba sei kria servisu”,hatutan lider karismátiku ne’e.

Nia akresenta, Buat hotu bele mosu iha TL, iha polítika no saida de’it, maibé dalan ida de’it kadoras Greater Sunrise (GS) sei mai, tanba Timor-Leste nia independensia ne’e polítika, ne’ebé agora buka independensia ekonómika.

Lee hotu :   PN simu ona desizaun vetu ba LAP-LFP, Presiza de’it maioria kualifikada atu halo konfirmasaun votus

“Povu maka manan, ita hotu sai de’it hanesan atributu, instrumentu, ne’ebé Maromak tau hela, rai lulik,  bei ala sira no matebian sira dudu hela, atu kumpri dever ida ne’e, para nei-neik nei-neik povu makan ninia futuru ne’ebé diak”,informa Xefi nesiador FM ne’e.

Xanana Gusmão, afirma, tanba saida mak Fronteira Marítima tenki manan tiha uluk mak diskuti fali sira seluk, tanba ne’e integridade territorial no mos labele fo implikasaun bo’ot ba TL bainhira atu dada kadoras GS mai Timor-Leste.

“Ne’ebé joven sira tenki buka hatene, la’os sai ba liur ne’e haree de’it oiii ema nia uma ne’e nune’e, lae! Tenki buka husu, buka aprende. Ba imi joven sira hotu hanoin iha planu mak ita bele halo sasan, ita laiha planu, ita halo arbiru de’it. Balu la halo, ohin ne’e koalia nune’e, aban koalia fali ne’eba, ne’e tanba laiha vizaun. Kuandu iha vizaun, ita koalia, koalia ba oin”,dehan Xanana ne’ebé nunka baruk hodi luta ba Timor-Leste nia di’ak baa ban-bainrua ninian.

Xanana dehan, hafoin de asina fronteira maritime ho Australia iha 30 de Agustu, tinan 2017, iha Nova Iorque, durante fulan ne’en nia la’o ba aprende iha rai liur hanesan EuroPipe ne’e oin nusa katak, sira tau kadoras iha tasi okos naruk ne’e noin nusa.

“Ba buka aprende buat sira ne’e, tanba ema dehan oiii ConocoPhillips ne’e maka’as iha mundo tomak, imi ne’e (Timor-Leste) kuitadu. Hanesan uluk mos ita halo funu, ema dehan itumimpi di siang bolong (Mehi loron-manas), Beasu mos ema dehan, mimpi di siang bolong itu, mas como ita hatete tiha ona katak, mimpi di siang bolong ne’e mos bele, ne’e mak ita mimpinafatin ne’e”,dehan Xanana Gusmão.

Lee hotu :   Lakohi sosa asaun ConocoPhillips-Shell, Xanana: Dehan ba imi nia prezidente veta tiha OJE

Xanana dehan tan, kuandu ema ne’ebé lahatene nia servisu no saida mak nia luta ba nasaun TL nia di’ak, labele nar-naran koalia, tenki buka hatene.

“Asina akordu ne’e saida? Uluk iha malae (Portugés) nia tempu, kuandu ami atu koalia, malae sira dehan nune’e, ó hatene ka lae? Se ó lahatene di’ak liu ó nonok hodi rona. Mas ohin loron, ita lahatene mos ita koalia asbun (asal bunyi) dehan katak, hau mos koalia. Kuandu ita lahatene ita husu, ne’e ita nia rai”,dehan Xanana Gusmão.

“Kompañia joint venture iha kampo GS ne’e kompostu husi Woodside kompañia Australia ho 42%, ConocoPhillips 30%, shell 27%, Osaka Gas 8%. Ida defende maka’as atu lori ba Darwin lakohi dada mai TL ne’e  ne’e mak Conocophillips, tanba fasilidade iha Darwin ne’e ConocoPhillips nian, ne’ebé nia hakarak dada ba ne’eba. Entaun diskuti, diskuti dehan, entaun sosa, la buat ida sosa, sosa ho osan povu TL nian”,esplika Xanana Gusmão.

Iha oportunidade, Xanana hamulak ba maromak, rai lulik, no matebian sira hotu atu tulun VIII Governu hodi servi povu no nasaun ne’e ba oin.

Ekipa negosiador sosa ona asaun ConocoPhilips pursentu 30 ho Dolar Amerikanu milliaun 350 husi osan povu nian, ne’ebé asina iha Bali-Indonézia iha 28 Setembru, tinan ne’e. Xefi negosiador Kay Rala Xanana Gusmão ho delegasaun, to’o hikas Díli  ho aviaun Sriwijaya, iha aeroportu internasional Nicolao Lobato  Díli, Segunda, loron 8, Outubru,   tuku 01:30 oras TL.ves

 

Add to Comments Here!!!!

error: Content is protected.
Secured By miniOrange
You might also like:
Tribunal prekupa Defensor Públiku fó asistensia ba sidadaun estrangeiru

Instituisaun Defensor Públiku hari ho objetivu...

Lei CAC seidauk iha Fóngtil husu PN labele toba hanesan lenuk

Forum Organizasaun Noun Governamental FÓNGTIL husu...

MEJD kontinua esforsa hasai sidadaun ne’ebe okupa resintu eskolar

Ministériu Edukasaun, Juventudi no Desportu(MEJD) kontinua...

Close