Arão Noe: PN la anula proposta sosa kareta foun

Prezidente Parlamentu Nasionál (PN), Arão Noe, deklara, PN sei la anula proposta orsamentu sosa kareta foun ba deputadu sira, wa’inhira seida’uk iha proposta eliminasaun husi deputadu sira, tanba desizaun sosa kareta foun mai husi plenária PN.  

Proposta orsamentu Parlamentu Nasionál atu sosa kareta foun ba deputadu foun kinta lejislatura hamosu reasaun pro no kontra husi públiku inklui Movimentu Universitariu Timor-Leste (MUTL) ne’ebé ezije atu kansela proposta sosa kareta foun ba deputadu 48.

“Kareta ne’e orsamentu privativa parlamentu ne’e aprova iha plenária atu anula fali desizaun iha plenária só plenária mak bele anula, ne’ebé kabe ba to’o iha faze debate orsamentu jeral Estadu iha espesialidade”, Arão Noe hatutan.

“Deputadu sira tuir ita nia rejimentu se mak iha kompetensia atu aprezenta proposta ne’e deputadu sira, entaun deputadu sira bele aprezenta depois plenária sei debate, se liu elimina. Elimina prosesu normal demokrasia mak ne’e duni maibe liu husi ezijensia ida, ita kansela de’it, ne’e defisil”,dehan  Arão Noe ba Jornalista sira iha Palásiu Prezidensial Nicolau Lobato Bairo pite-Dili, Kuarta (21/11/2018).

PPN Arão Noe haktuir katak, maske nia parte bele asina paraser barak maibe sei la anula desizaun ne’ebé foti ona liu husi plenária.

Husi sorin seluk, Xefe Estadu Maior Jeneral Falintil Forsa Defeza Timor Leste (F-FDTL) Major Jeneral, Lere Anan Timur, kompara, karik nia mak hanesan deputadu iha PN, nia sei mantein ho desizaun ne’ebé parlamentu foti tiha ona.

“Parlamentu nu’udar orgaun soberanu, hanesan ha’u dehan, ha’u mak Prezidenti Parlamentu Nasional, ha’u la dada fila ida, más dada tiha ona agora buka kontaktu diálogu hodi hetan solusaun ida mais espesífiku”, dehan, Lere Anan Timur.

Lider másimu F-FDTL ne’e aprofunda katak, sosa ka la sosa ne’e, kareta iha Timor, lá sosa mos Timor mak lá sosa, la’os sosa haruka fali ba liur ne’e mak labele.

Ho nune’e, Lere Anan Timur husu ba MUTL atu hatudu intelektual no buka solusaun katak, imi maka serve duni iha futuru.

Antes ne’e iha loron (19/10/18), Parlamentu Nasionál aprova ona proposta orsamentu PN nian ho millaun rua resin, atu sosa kareta 48 ho ba deputadu foun ho votus a favor 14, kontra 13 no abstensaun 11.Eus