JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana Gusmão: Alterasaun lei anterior sei la fó fatin ba ema ida atu joga tun-sa’e ■FRETILIN sei vota kontra konteúdu tomak

Xanana Gusmão: Alterasaun lei anterior sei la fó fatin ba ema ida atu joga tun-sa’e ■FRETILIN sei vota kontra konteúdu tomak

 

Reprezentante espesiál Governu Timor-Leste ba asuntu petrolíferu, Kay Rala Xanana Gusmão, hatete, razaun halo alterasaun ba lei haat anterior nian iha tinan 2005 ne’ebé momentu ne’eba lidera husi Primeiru Ministru, Marí Alkatiri, sei la fó fatin ba ema ida atu halimar ho nia poder ka joga tun-joga sa’e tuir nia hakarak. Maibe ho alterasaun lei ne’e atu hatúr regra ne’ebé loos no diak ba benefísiu povu no nasaun nia moris diak.

Lei haat ne’e mak hanesan Lei Atividade Petrolíferu, Lei Fundu Petrolíferu, Lei Tributária no Lei Kontratu ho Bayu Undan nian.

“Ho aprovasaun lei haat ne’e mak sei fo benefisiu ba nasaun. Tanba lei haat ne’e nia redasaun barak mak presiza hadia no testu foun alterasaun lei anterior ne’e sei la fó fatin ba ema ida atu joga tun-joga sa’e tuir hakarak. Ne’ebé la fo fatin ba ita atu joga tun-joga sa’e baihira ita koalia kona ba petróleu, tanba petróleu ne’e Estadu nian, povu nian.Ita-nia esforsu ne’e atu hadia ita nia lei sira atu ita-nia atividade petrolífera ne’e atu komesa karik ho ona regra ne’ebé loos ho diak. Depois sira ne’e hotu ministériu sei anunsia iha Jornal da República ho media públiku no portal internet hotu. Hatama lei atividade sira ne’e hotu ba ita-nia diak no sei la benefisia se deit, ida ne’e atu fo dalan ba futuru atividade petrolífera nian. Ita tenki prepara-an para halo industria ida diak liu ba dezenvolvimentu Timor-Leste”,subliña Kay Rala Xanana Gusmão, Tersa (16/7/19), iha Parlamentu Nasionál, iha plenária extraordináriu halo aprezenta materia lei sira alterasaun ne’ebé atu ajusta ba ratifikasaun delimitasaun fronteira marítima nian ba deputadu sira.

Tuir Xanana Gusmão, lei anterior 2005 laos ladiak, maibe artigu sira ne’ebé sofre alterasaun ne’e atu lori dezenvolvimentu ba nasaun diak liu tan ba tempu agora no tempu tuir mai.

“Ha’u la temi uluk 2005 halo lei ne’e ladiak, lae. Ne’e Diak. Maibe lei ida agora ne’e atu hadia fali nia Portugés ne’e halo diak liu fali Portugés ida uluk ne’e”,dehan Xanana Gusmão.

Xanana mos esplika, iha alterasaun lei tuan haat no proposta lei foun ne’ebé nia aprezenta iha PN ne’e atu dehan katak, laiha ema ida mak iha poder liu atu deside mesak. Tanba mundu oras ne’e dadaun avansa ba oin, entan tenki adapta situasaun ida ne’e hodi muda lei anterior sira ne’ebé la koresponde ona ho tempu agora ninian hodi hadia diak liu tan lei petrolífera ne’e sai diak liu.“Laos halo buat foun ida, maibe hadia deit redasaun, hadia deit kontestu uluk nian iha 2005 no agora iha 2019 ne’e.”dehan tan Xanana.

Lee hotu :   Agostinho Gomes: Jose Luis ba AMP la fo impaktu ba FDD

Redasaun anterior lei petrolífera ne’e produs husi Governu anterior lideradu Primeiru Ministru, Marí Alkatiri, iha tinan 2005, iha ne’ebé Timor-Leste sei seidauk determina nia fronteira marítima. Tanba ne’e, Xanana Gusmão, afirma, lei sira anterior ne’ebé la pertinente tenki muda, nune’e Xanana ho nia ekipa ne’ebé halo estudu komparativu barak ona ba rai-liur iha esperiensia maka’as hodi kurizi redasaun anterior lei petrolífera ne’ebé mak la pertinente ona hodi tau fali lei foun.

Tuir Xanana, Timor-Leste hakarak ka lakohi tenki partisipa iha atividade petrolífera sira atu bele sustenta orsamentu Estadu nian, hadia dezenvolvimentu nasaun no labele hein deit ema produs mak TL simu.

Xanana dehan, iha lei ida agora ne’e aban bainrua ema seluk sei mai kurizi no ema hot-hotu tenki simu.

“Aban bainrua lei ne’e iha 2030 ema seluk mai kurizi fali, ita tenki simu. Ne’ebé ho esperiénsia sira ne’e hotu mak agora ita atu hadia sasán sira ne’e. Uluk lae, laiha esperiénsia ida, laiha osan ida foti fó deit ba kaer, maibe agora lae”,haktuir Xanana.

Reprezentante espesial Governu Timor-Leste ba assuntu petrolíferu, Kay Rala Xanana Gusmão, hateten nia rekoñese servisu ne’ebé nia halo konaba tratadu delimitasaun fronteira marítima ne’e servisu ne’ebé difisil no todan.

Durante aprezentasaun, reprezentante espesial Governu Timor-Leste ba Assuntu Petrolíferu, Kay Rala Xanana Gusmão, hateten, nia rekoñese servisu ne’ebe nia halo konaba tratadu delimitasaun fronteira marítima ne’e servisu ne’ebé defisil no todan.

“Wainhira tratadu ratifika tiha entre vigór, rejimi foun fali ona buat ne’e pertense hotu mai ita, iha hotu ita nia diskusaun exklusiva jurisdisaun, ne’ebé matéria fiskal Australia nian oin seluk, ita nian oin seluk, ho estatutu bayu undan nian ne’e oinsa, depois esplika hotu ba ita bo’ot sira para bele kompriende, tanba sa mak só agora mak ami mai iha ne’e. Tanba hodi dehan katak servisu ne’e todan oituan mas ita konsege halo hotu tiha ona, parlamentu Australia mos hahu deskuti ona no ha haré ona sira nian leis ne’ebé revé, e iha ona konkordansia katak dia 30 de agustu se bele iha ona troka diplomatikas, e buat sira ne’e hotu mak halo ami mai to’o iha ita bo’ot sira,” hateten Kay Rala Xanana Gusmão.

Entretantu deputadu bankada FRETILIN, Antonino Bianco, hatete, FRETILIN hakarak debate artigu ba artigu, maibe tempu mak la to’o. Tanba ne’e, deputadu Antonino mos husik deit.

“Governu prepara buat ne’e tinan ida resin depois opozisaun mai tur rona deit, entaun buat ne’e ladún diak karik”,dehan Antonino iha debate lei fundu petrolíferu.

Aprezentasaun matéria lei sira alterasaun ajusta ba ratifikasaun delimitasaun fronteira marítima nian ne’e diriji husi reprezentante espesiál governu Timor-Leste ba asuntu petrolíferu, Kay Rala Xanana Gusmão ho nia ekipa Timor GAP, Autoridade Nacional Do Petróleo E Minerais (ANPM) no partisipa husi deputadu sira tantu husi bankada AMP no opozisaun.

Lee hotu :   Assanami: Governu kontrola moeda sentavu 200

Diskusaun ba alterasaun lei fundu petrolíferu deputadu Parlamentu Nasional no reprezentante espesiál governu Timor-Leste ba asuntu petrolíferu, Kay Rala Xana  na Gusmão ho nia ekipa konkorda hamutuk atu kontinua fali ohin Kuarta (17/7/19), hodi halo pergunta no resposta.

Iha diskusaun refere, bankada FRETILIN la konkorda ho esplikasaun ne’ebé hato’o nune’e deputadu Antonino Bianco ho Joaquim dos Santos walk out husi diskusaun. Tanba ne’e, Kay Rala Xanana Gusmão, hatete katak, deputadu FRETILIN sira ne’ebé sei partisipa iha diskusaun ba aletrasaun lei ne’e dalaruma sira rona ona sira-nia xefe bankada Aniceto Guterres, pronunsia katak, FRETILIN sei vota kontra proposta alterasaun ne’e mak sira la konkorda, no ne’e direitu. Nune’e Komisaun B Parlamentu Nasional, trata asuntu relasaun esterna, defeza no seguransa hanesan mos prezidente meja, Adérito Hugo da Costa, deside hahú fali diskusaun iha loron ohin hodi halo aprovasaun.

FRETILIN sei vota kontra konteúdu tomak

Entretantu iha loron hanesan parte dader liu husi konferensia ba imprensa, Xefi bankada FRETILIN, Aniceto Guterres, deklara katak, FRETILIN sei vota kontra pakote lejislasaun tomak ne’ebé reprezentante espesiál governu Timor-Leste ba asuntu petrolíferu, Kay Rala Xanana Gusmão ho nia ekipa tomak aprezenta.

Bankada opozisaun FRETILIN iha Parlamentu Nasional (PN) deklara sei vota kontra pakote lejislasaun tomak ne’ebé mak VIII Governu aprezenta hodi diskuti no aprova ona iha jeneralidade iha PN hodi halo alterasaun,  tanba konsidera lei hirak ne’e inkonstitusional no laiha ligasaun ho tratadu Fronteira Marítima.

Xefe Bankada FRETILIN, Aniceto Guterres razaun seluk ne’ebé obriga FRETILIN atu vota kontra lei hirak ne’ebé atu halo alterasaun ne’e, tanba konsidera lei hirak ne’e  regula de’it jestaun ba fundu petrolíferu no seluk tan.

“Ha’u hanoin ita bo’ot sira hatene, iha semana kotuk governu hatama proposta kona ba pakote lejislasaun atu halo alterasaun ba lei sira ne’ebé iha relasaun ho tratadu fronteira marítima, ho rezolusaun ida atu ratifika tratadu nian, iha pakote lejislasaun ida ne’e mós, iha lei estruturante balun hanesan lei petrolíferu no lei seluk-seluk tan, ne’ebé bankada FRETILIN ezije atu iha tempu natoon fó fatin ba konsulta klean, halo diskusaun klean, halo diálogu no konsensu, maibé ita bo’ot sira mós akompaña, AMP aprova karakter urjensia ba pakote lejislasaun sira ne’e katak, AMP hakarak halo ho lalais de’it, lufu lafu de’it iha tempu balun, menus ne’e loron sanulu ita haree iha kalendáriu ne’e to’o iha oras 24  tenki aprova hotu ona. Tanba ne’e ha’u hakarak hateten, laiha razaun atu partidu FRETILIN fó votu a favor ba pakote lejislasaun sira ne’e”,hateten Aniceto  Guterres, ba Jornalista sira  liu husi konferensia ba imprensa iha sala bankada  FRETILIN Tersa (16/7/2019).

Lee hotu :   Horta husu Xanana-Governu diálogu ho PR ba alterasaun LAP

“Ami hakarak hatete iha ne’e katak bankada FRETILIN sei vota kontra pakote lejislasaun sira ne’e, rajaun sira ne’ebé mak lori ami hodi vota kontra tanba lei atividade petrolíferu iha sesaun lejislativa ida ne’e iha fulan hirak liu ba iha tiha ona aleterasaun mosu polémika boot no agora iha lejislasaun ida ne’e proposta foun tama mai tan atu halo alterasaun dala ida tan ne’ebé tuir lei, tuir regra alterasaun lei ida iha kada sesaun lejislasaun ida tenki dala ida deit labele liu dala ida, ne’e hatudu katak alterasaun ida ne’ebé mak governu propoin, AMP hakarak halo ne’e la halo ho estudu no análiza ne’ebé mak klean, nune’e mos lei petrolíferu nu’udar lei ida ne’ebé mak estruturante ne’ebé ita hotu hatene uluk iha primeira lejislatura lei ida ne’e halo liu husi prosesu konsultasaun ne’ebé mak halo ho klean tanba ne’e lei ida ne’e labele altera naran-naran deit,”Aniceto esplika.

Iha fatin hanesan, deputadu bankada CNRT, Aderito Hugo da Costa, hateten  pozisaun vota kontra ne’e desizaun Partidu opozisaun nian.

“Se sira deklara ona antisipadamente atu vota kontra, prontu, idak-idak jere nia bankada tuir orientasaun partidu nian karik, mas prosesu seidauk hotu, sei iha hela dalan halo kedas ona deklarasaun vota kontra, ha’u sente ne’e pozisaun mak kaer ninian ita labele kaer kanuru tohar iha laran.”dehan Adérito Hugo.

Nune’e mos, Prezidente Partidu Demokrátiku (PD), Mariano Sabino Asanami, hateten, PD mantein prinsípiu apoia prosesu Fronteira Maritima to’o rezultadu ikus.

“PD a favor ba interese Estadu nian no fronteira marítime no lei sira ne’ebé mak atu ajusta ne’e, liu-liu iha tranjisaun sira para atu hare’e ne’e lei sira ne’ebé  mak uluk PD nia pozisaun klaru iha neba, iha  buat barak ne’ebé mak presiza hadia, presiza kompleta,mas ba fronteira marítima ne’e PD iha  prinsípiu kedas desde uluk ami halo kampaña maka’as  to’o iha Australia konsolida solidariedade sira para fo apoia ba teritóriu soberania TL nian no ikus mai kuandu halo demonstrasaun iha embaixada Australia nian ha’u rasik tun halo orasi, no ohin ne’e problema ne’ebé mak ita hasoru mak inves labele urjensia ne’e mak ami husu ba Governu tenki esplika tanba saida mak tenki tama urjensia lolos la’o normal ami hein kleur ona tanba saida mak tenki urjensia”,kestiona Asanami hateten.Ola/Ito

Add to Comments Here!!!!

error: Content is protected.
Secured By miniOrange
You might also like:
DIA 17/07/19|| GMNTV LIVE STREAM || DADER KMANEK

DIA 16/07/19|| GMNTV LIVE STREAM || JORNAL NASIONAL KALAN

DIA 16/07/19|| GMNTV LIVE STREAM || JORNAL AS 12

Close