JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Sansaun AFC ba FFTL, Aleixo: Kulpa Kalbuady nian mós

Sansaun AFC ba FFTL, Aleixo: Kulpa Kalbuady nian mós

Vise Prezidenti Federasaun Futebol Timor-Leste (FFTL), ba asuntus estranjeirus, Aleixo da Silva “Cobra” deklara katak, sansaun ne’ebé komisaun disiplinar ASEAN  Football Confederation (AFC), hatún ba FFTL ne’e la’os kulpa Sekretariu Jeral FFTL, Amandio de Araujo Sarmento ho nia staff Gelásio da Silva nian deit. Maibé kulpa mós Francisco Kalbuadi Lay nian, tanba hanesan Prezidenti FFTL.

“Kazu FFTL halo ne’e kuaze tinan 5 ka 6 liu ba. No ema hotu hatene tiha ona. I loloos ne’e Sekretariu Jeral Amandio de Araújo Sarmento ho staff Gelasio da Silva labele sai vítima ba kazu ne’e. Mas Prezidenti Francisco ninian. Prezidenti federasaun maka tenki iha responsabilidade másimu ba kazu ne’e, nia mak haruka jogador Brazil nain 12 ne’e mai”, hateten Aleixo da Silva ba Jornalista sira iha nia serbisu fatin, Hotel Luz Clarita, bairo Formosa, Díli, Segunda (23/01).

Aleixo da Silva fundamenta katak, Francisco Kalbuady maka ba kontratu jogadores Brazileiru sira ne’e no nia mak falsifika dokumentus la’os Amandio ho Gelásio.

“Sira na’in rua ne’e, sé momentu ne’ebá Prezidenti la haruka, ema la brani halo ida ne’e”, tenik Aleixo da Silva.

Tuir Aleixo da Silva, tuir loloos sansaun ne’e kona hotu ba sira na’in tolu, Amandio, Gelasio ho Kalbuadi, maibé Kalbuadi iha relasaun di’ak ho estrutura AFC nian, entaun salva tiha nia-an, no fó fali vítima ba Amandio ho Gelasio.

“Francisco tenki sai husi Prezidenti FFTL. Nia rasik tenki rezigna-an deit ona, tanba primeiru halo moe povu Timor tomak, taka dalan ba atleta nasional ba eventu internasional sira”, deklara Aleixo Cobra.

Aleixo da Silva mós deklara sai katak, jogadores naturalizasaun ne’e tuir loloos, la’os na’in 12 deit maibé iha 17.

“La’os 12 deit, maibé lolos ne’e iha ema 17. Jogador sira ne’e sira hatete mai ha’u katak Timoroan, ne’ebé loloos ne’e la’os Amandio ho Gelasio nia responsabiliza, ne’e Francisco mak responsabiliza, tanba nia inkapasidade, halo korrupsaun bo-bo’ot iha federasaun laran,” Aleixo fakar sai

Lee hotu :   HALAKON SINGAPURA, TIMOR-LESTE FINALIZA IHA KLASIFIKASAUN DATOLUK GRUPO A TAXA AFF SUB-18 TINAN-2017

Aleixo da Silva esklarese katak, triste boot ba Timoroan hotu, tanba deit ema ida ema rua nia hahalok, ne’ebé halo TL labele tuir jogus internasional sira.

Aleixo mós dehan, tuir lei FIFA nian, Governu labele interfere to’o iha kazu konaba sansaun AFC nian ba FFTL ne’e, maibé tuir Aleixo katak, nu’udar sidadaun rai ida ne’e, hakarak ga lakohi iha responsabilidade moral tenki hola medidas ruma ba ema ne’ebé mak komete hahalok ida ne’ebé hamoe TL ne’e iha mundu internasionál.

Aleixo da Silva mós konkorda katak, iha tempu badak, membru ezekutiva FFTL nian sei organiza-an atu hasai tiha Prezidenti FFTL ho mós ema króniku aat sira ne’ebé mak okupa hela pozisaun iha FFTL.

Aleixo da Silva mós informa katak, hanesan Vise Prezidenti FFTL nian ba asuntu estranjeirus, maibé wainhira atu kontrata jogadores 12 husi Brazil ne’e para mai apoiu TL deit mós nia (Aleixo, red) nein iha koñesmentu husi Prezidenti FFTL.

Tanba ne’e mak, tenik Aleixo, kuaze tinan hat resin ona nia parte la partisipa iha FFTL nia programa.

“Iha FFTL ne’ebá ne’e ami la la’o, tanba ami hotu tabele deit ba Francisco Kalbuady Lay. Ne’ebé agora hakarak ka lakohi tenki hadia”, Aleixo da Silva funamenta.

Sansaun ne’e halo ita moe

Husi sorin seluk, Vise Prezidenti FFTL atual Deputadu bankada FRETILIN, Osorio Florindo rekoñese katak, sansaun AFC nian ba FFTL ne’e halo moe TL.

“Mai ha’u sansaun AFC ne’e halo ita moe, tanba dokumentu sira husi Brazileiru, maibé ha’u hanoin tanba interese polítiku. Timor ne’e ki’ik bo’ot politik hotu,” hateten Osorio Florindo ba jornalista sira iha Sekretaria Estadu Juventudi no Desportu (SEJD), wainhira partisipa iha enkontru urjenti entre SEJD ho estrutura membru FFTL nian hodi diskuti konaba sansaun AFC ba FFTL.

Lee hotu :   Sikilista nasional protesta komisaun organizadora TdT 2017

Osorio Florindo responde ba desizaun AFC ne’e, hanesan sansaun ida ne’ebé atu fó hanoin ba FFTL para bele hadia nia-an.

Maski AFC fó sansaun ba FFTL katak, durante tinan rua (2) nia FFTL labele partisipa iha eventu jogu internasionál ruma, maibé tuir Osorio Florindo katak, torneu seluk hanesan Asean Games no Sea Games ne’e TL bele partisipa nafatin.

“AFC foti ona desizaun ba FFTL, iha pontu 9 maka AFC foti, primeiru ba Sekretariu Jeral FFTL Amandio tanba nia maka rejistu jogador liu-liu jogador estranjeirus, maske Amandio hatene jogador sira ne’e nasionalidade seidauk lós, maibé nia rejistu. Tanba ne’e maka nia hetan sansaun labele mete futebol durante tinan 3 no osan 9 mill ba FFTL tanba jogador sira ba reprezenta FFTL”, hateten Osorio Florindo.

“Ita sei selu multa ba AFC 20 mill alénde ida ne’e ita iha hanesan osan jaminan (garantia, red) 56 mill iha Federasaun ba AFC ne’e, atu hatete ba ita katak durante tinan 2 nia laran FFTL labele halo hahalok ne’ebé hanesan. Sé halo fila fali, osan ida ne’e sei hangus, ha’u hanoin todan liutan ba FFTL seluk maka ita nia Prezidenti arbitrajen Gelasio tanba nia maka trata dokumentu sira ne’e, nia mós hetan sansaun. Mas selu osan deit 3 mill. Seluk maka ita labele tuir Taça Ázia iha 2023, sansaun ne’ebé todan oituan maka joga ne’ebé durante 2012 to’o 2016 ne’ebé maka ita manan, lakon no drow sei hatun ba ita lakon 3-0, ida ne’e maka sei fó impaktu ba ita nia ranking iha FIFA”, tenik nia.

Konaba kongresu extraordináriu FFTL nian, Osório Florindo esplika katak, klubu sira bele halo kongresu maibé AFC no AFF la rekoñese. Hanesan akontese iha 2008, ne’ebé klubu halo kongresu no hili Pedro Carrascalão maka eleitu sai Prezidenti, maibé FIFA no AFF la rekoñese.

Lee hotu :   Final taca BMX ( Video )

“Tanba ne’e ita atu resolve bua ida, atu hadia buat ida sempre ita tuir koridor ne’ebé iha para labele hetan sansaun ne’ebé todan liu”, Osorio Florindo esplika.

Relasiona ho kazu ne’e, jornalista sira husi Jornal ne’e, tenta atu konfirma ho Sekretáriu Jeral FFTL Amandio ho Prezidenti FFTL Francisco Kalbuadi Lay, maibé direjentes na’in rua ne’e laiha nia fatin.

Tuir funsionáriu FFTL nian, iha edifísiu FFTL Kampo Demokrasia ba jornalista sira esplika katak, Sekjer FFTL Amandio laiha nia fatin. Nune’e jornalista fila no kontinua ba buka Amandio nia rezidensia iha Comoro, maibé wainhira jornalista to’o iha Amandio nia uma, Amandio nia viziñu sira hateten katak, Amandio sai tiha ga laiha nia fatin.

Entretantu jornalista sira mós kontinua korajen ba buka Prezidenti FFTL Francisco Kalbuadi Lay iha nia Gabinete Minstériu Turismo no Kultura (MTK), maibé funsionáriu balun iha MTK hateten katak, Francisco sei ba iha rai liur.

Entretantu sansaun AFC ba FFTL mak hasai FFTL husi Taça Ázia 2023 no multa 20 mill dollares amerikanus. Komite mós desidi katak, proibi Amandio atu hola parte iha atividade futebol ho nia durasaun durante tinan tolu (3) no multa US$ 9.000.00. Disidi mós FFTL tenki lakon sira nia kompetisaun ho multa US$ 56.000,00 no suspensaun provatóriu durante tinan rua.  Fó multa ba Gelasio ho kuantia US$ 3,000.00.

Lista jogadores na’in 12 ne’ebé konsidera FFTL falsifika sira dokumentus sai sidadaun Timor Leste, maka hanesan, Ramon de Lima Saro, Paulo Helber Rosa Ribeiro, Diogo Santos Rangel, Rodrigo Sousa Silva, Patrick Fabiano Alves Nobrega Luz, Paulo Cesar da Silva Martins, Jairo Pinheiro Palmeira Neto, Felipe Bertoldo do Santos, Junior Aparecido Guimaro de Souza, Jaime Celestino Dias Braganca, Heberty Fernandes de Andrade no Thiago dos Santos Cunha.des/nes

Add to Comments Here!!!!

error: Content is protected.
Secured By miniOrange
You might also like:
Kongresu FFTL, Klubu 5 deit mak iha direitu ba vota

Membrus estrutura ezekutivu FFTL hamutuk ho...

Governu seidauk hatene FIFA atu blacklist aktividade futebol TL

Sekretariu Estadu Juventude no Desportu (SEJD),...

Mandatu Kalbuady remata ona, Klubu ejiji FFTL realiza kongresu

Klubu Futebol sira ne’ebé ezisti iha...

Close