SNJ FRETILIN hala’o kompetisaun debate públiku entre universitáriu

Atu rona joventude sira nia opiniaun, Tersa, loron 3, fulan ne’e, Sekretariadu Nasional Juventude (SNJ), Frente Revolucionario do Timor-Leste Independente (FRETILIN) hala’o kompetisaun debate públiku entre universidade sira.

“Debate públiku ne’e ho objetivu atu rona juventude sira nia opiniaun tuir tema ne’ebé mak ida-idak prepara tiha ona no iha debate públiku ne’e universitáriu sira aprezenta temátiku ne’ebé mak la hanesan, husi UNTL aprezenta kona-bá dezempregu, kampu servisu no medida atu ultrapasa, UNITAL kona-bá edukasaun ho kualidade ba joven sira iha Timor-Leste, dezafiu no solusaun, husi UNDIL kona-bá dezempregu, kampu servisu no medida atu ultrapasa, husi DIT aprezenta edukasaun ho kualidade ba joven sira iha Timor-Leste, dezafiu no solusaun”, Sekretáriu Jeral Joventude FRETILIN, Abrão Nocosico liu husi ninia diskursu iha CCF-Comoro, Tersa (03-09-2019).

Nia esplika, parte seluk husi debate ne’e atu haree mós talentu joven sira ni’an, oinsa halo argumentasaun, oinsa halo debate kona-bá tópiku ne’ebé mak sira hili.

“Ita hotu hatene oinsa joventude FRETILIN prepara fatin ba juventude FRETILIN no prepara fatin ba joven sira atu hato’o sira nia opiniaun, husi opiniaun ne’ebé iha hanesan organizasaun partidu, bele akumula opiniaun ida ne’e liu husi kanal ne’ebé mak partidu hanesan iha bankada”, tenik Abrão.

Husi sorin seluk tuir, Reprezentante CCF, Nurima Alkatiri hateten, debate ne’ebé SNJ FRETILIN realiza nu’udar oportunidade, atu ida-idak aprezenta argumentu lojíka hodi bele konvense ho ema seluk, relasiona ho tópiku ou tema ne’ebé sira prepara.

“Debate ida ne’e la’os ita atu sukat malu no sé mak di’ak liu no sé mak át liu, maibé debate ne’e hanesan experensia ida hodi aprende no komunika diak liu tan, ho debate hirak ne’e mós iha parte ida atu aprezenta argumentu ida ne’ebé ho lojíka ho rasiosíniu no bele konvense ho ema seluk, espera ho debate hirak ne’e ita bele manan ema nia fiar no konfiansa ba ita nia fiar, ita nia ko’alia no ita nia servisu“, tenik Nurima.

SNJ FRETILIN realiza debate públiku ne’e, hodi komemora tinan 45  existensia FRETILIN nini’an.

Debate ne’e partisipa husi universitáriu sira husi Universidade Nasional Timor Lorosa’e (UNTL), Universidade Oriental (UNITAL), Universidade Díli (UNDIL) no Díli Institute of Technology (DIT). Ety