Fujitivu estranjeiru sira deporta ona ba Indonesia

Polísia Nacionál Timor-Leste (PNTL) deporta ona fujitivus nain rua hafoin dezisaun husi Tribunal Distritál Dili (TDD) hodi aplika prizaun preventiva ba kondenadu nain rua.

Fujitivu sira ho naran Dimitar Nikolov husi nasaun Bulgaria involve kazu droga no Sayed Mohamed  husi nasaun India involve kazu brankamentu kapitál (money laundry-Red).

Kondenadu nain rua ne’e deporta ba Bali liu  husi Airoportu InterNasionál Nicolau Lobato Dili ho aviaun Jet Polisia Indonesia nian ho marka  PK-TWN iha tuku 01:30 Otl lokraik.

TDD Semana  ne’e liu husi primeiru interogotoriu desidi medida koasaun prizaun preventiva ba arguidu  estranjeiru nain rua, tanba bele fó risku bo’ot mai Timor-Leste.

“Desizaun tribunal nian desidi sira nain rua  prizaun preventiva, tanba iha perigu bo’ot fuga ninian husi Timor, tanba ne’e iha rekezitu ida espesiál  ne’ebé mai prosesu kódigu penal, iha  faktus hatudu sira halai husi prizaun Indonesia nian, ke rai kuak hodi halai sai husi ne’eba mai to’o iha Timor,” afirma Advogadu José Guterres, hafoin  primeiru interogatoriu iha TDD-Díli semana kotuk.

José hatutan, hanesan defeza simu medida koasaun  ne’ebé hatun husi  Tribunal nian.

“ Medida koasaun ida tenki aplika, sei fó dalan ba halo rekursu no investigasaun. Maibe tuir ha’u nia hanoin, medida koasaun ba primeiru interogatoriu, desizaun ida ke justu,” dehan José Guterres.

Audensia primeiru interogatoriu ne’e prezidi husi Juiz singular, António Helder, Minsitériu Públiku reprezenta husi Prokurador Jacinto  Babo ho Lidia Soares,  entretantu arguidu Dimitar Nicolov Illivu akompaña husi advogadu  privadu José Guterres no arguidu Sayed Muhammad akompaña husi Defensor Públiku Napolião de Almeida.

Antes ne’e arguidu nain rua PNTL kaptura iha Hotel Novo Turismo  Lecidere, Díli iha loron Kinta (22/06/2017) ne’ebé antes ne’e halai sai husi Prizaun Kerobokan Bali.

Iha parte seluk liu husi konfrensia  imprensa  iha Airoportu InterNasionál Nicolau Lobato Dili, Komandante Jeral PNTL, Komisariu Julio Hornai, konsidera dezisaun Tribunal ninian ne’ebé aplika prijaun preventiva ba fujitivus refere.

“MP   no Prokurador  akompaña    prosesu julgamentu  depois hotu tiha konfirma fali Prokurador Repúblika,”hateten  Julio Hornai.

Iha oportunidade  ne’e, Komandante  Kepolisian  Daerah (KAPOLDA) Bali, Irjen Pol Petrus R Golose, agradese PNTL ne’ebé konsege kaptura fujitivus ne’e.

“Ami agradese  tanba fujitivu nain rua ne’e submete ona ba  julgamentu tuir regulamentu iha Timor-Leste, no PNTL ajuda iha  prosesu   ne’e,” hateten Petrus R Golose. Ami husi Indonesia ho Embaixadór Indonesia  iha Timor-Leste, dala ida tan ami hato’o obrigado  barak,” Petrus R Golose.avi/des