Komponente Naval kontinua infrenta dezafiu

Xefe Estadu Maior F-FDTL Major General Lere Anan Timur, rekoñese, ejistensia Komponente Naval tinan 16 ona, maibe sei hasoru nafatin dezafiu durante ne’e.

Lere Anan Timur, hato’o kestaun ne’e liu  husi diskursu,  Sesta (12/01/18) iha aniversariu Komponente Naval ba dala 16,  iha Kuartel Naval Hera.

“Atu  harii komponente Naval fofoun iha dezafiu barak impedementum balun konkorda balun la konkorda, maibe la konkorda mak barak liu, hodi  ita nia Governu  nia inisiativa ita hari  ita nia komponente Naval   ne´ebé mak kiik,  hahú husi ro rua Portugal  fó ba  ita,“ haktuir Lere Anan Timur.

Iha okaziaun ne’e Lere hatutan, komponente  naval harii iha iha tinan 2002, altura ne’eba membru Naval iha ema nain 45, no dadaun aumenta ba 500.

Eis  grileiru atual Major  General Lere Anan Timur dehan,  membru sira ne’ebe iha komponente naval ne’e joven hotu no edukadu.

Nune’e mos  preokupasaun Governu nian hatene katak, hanesan tasi pas parte soberania Timor ninian luan liu  rai maran sira sei tau matan fó periodade ba komponente Naval.

Entretantu atu ultrapasa dezafiu iha Komponente Naval,   Xefe Estadu Maior F-FDTL, Major Jeneral Lere Anan Timur hateten, Australia sei fó apoiu tan ro ba F-FDTL.

`´Ba   internasional Komponente Naval husu nafatin imi ninia apoiu i Australia atu fó tan ro ida, rua ka tolu, mas sei kleur, ami hakarak lalais oituan,“ dehan Major General Lere.

Alende ne´e Komandante  Komponente  Naval Ligeiras Kapitaun    Fragata   Adão Brito, alias Zeky, rekoñese iha dezafiu iha Komponente Naval, liu-liu ba kapasidade Ró labele halo operasaun to’o tasi mane.

“ Dezafiu barak  mak   ita hasoru  ita atu  aprende  buat barak  iha  ita nia  moris,  iha  ita nia pasu  no  iha  ita nia  oin,  iha  ita nia asaun. Saida  mak   ita tenta halo durante tinan 16 ba  kotuk asaun lubuk  mak  ita halo rezultadu neneik  ou lais los  ou sala ida ne´e aprende, apredende  ita sai matenek liu tan,“ esplika Kapitaun Fragata Adão Brito, alias Zeky. GMN