Antesipa terorizmu, SAT treina tiru konfiansa ho bala real

Membru  Seksaun Anti Terrorismu (SAT)  23 hala’o treinamentu tiru konfiansa uza bala real, atu prepara mentalidade no hasa’e koñesimentu hodi antesipa   ameasa terorizmu iha nasaun ne´e.

Treinamentu ne´e hala’o iha Kuartel Unidade Espesial Polísia Bairo-Pite, Díli, Sesta (16/02/18), ho instrutor  Seksaun Anti Terrorismu Timor-oan, ne´ebé terinadu iha Portugal.

“Membru ida-idak iha Seksaun Anti Terrorismu  ténki iha konfiansa ba iha nia arma no konfiansa mós ba arma ne´ebé mak nia atu atinji ba objetu, ne´ebé  prepara  ita nia mentalidade ne´e mak bolu dehan tiru konfiansa,“esplika komandante Unidade Espesial Polísia Superintendente Xefe Afonso Dos Santos, ba GMN, hafoin observa treinamentu SAT iha Bairo-Pite.

Afonso dos Santos,  argumenta, Unidade Espesial Polísia preparadu hela hodi  asegura situasaun seguransa politika  iha nasaun ne´e.

“Ami nia moto mak laiha loron ida la treinu loron-loron  treinu hodi prepara a´an hodi sai unidade ne´ebé mak hatudu nia  profesionalismu,“dehan Afonso dos Santos.

Membru Unidade Espesial Polisia hamutuk ema 23 partisipa ona Treinamentu Anti Terrorismu  iha nasaun Portugal iha tinan 2017, liu husi akordu kooperasaun ne´ebé asina iha tinan  2001.

Antes ne´e Ministru Defeza no Seguransa (MDS) José Agustinho   Sequeira  `Somotxo`, konsidera treinamentu Seksaun Anti Terorismu,   importante, tanba  hodi asegura nasaun ne´e, wainhira akontese ameasa terrorismu iha futuru.

“Anti terrorismu kursu ida  ne´ebé mak  importante, hanesan forza espesial ida  hodi responde situasaun spesial ida, tan  ne´e mak ba imi  ne´ebé mak hetan ona formasaun  atu transmiti ba polísia seluk, tanba  ita nia rai presiza ajenti  preparadu  para responde situasaun ne´ebé de´it,“esplika MDS, hafoin ensera treinamentu SAT, Kinta (21/09/2017), iha Kuartel Unidade Espesial Polísia, Bairo Pite, Díli.avi