Polisia justifika ona, Yuniria la´os terrorista

Segundu  Komandante Polísia Nasionál Timor-Leste (PNTL), Munisípiu Díli Superintendente Assistente, Euclides Belo, klarifika  katak,  inan feton  Yuniria Gea ne’ebé hela iha Tasitolu la´os terrorista hanesan komunidade sira koalia, maibe  nia matan dook ne´ebé mak kura ema.

Klarifikasaun ne´e Euclides Belo hato´o  ba jornalista sira Segunda (21/05/18)  iha Kuartel PNTL Caicoli- Díli, relasiona  ho informasaun balun ne’ebé espalha liu husi media sosial facebook katak, Yuniria hanesan feto ne´ebé deskonfia  terrorista.

Ho informasaun falsu ne´ebé fó sai husi media sosial  ne´e halo  komunidade barak mak antusiazmu hakarak ba to´o iha inan feton ne’e nia uma iha Tasitolu hodi haree lolos ninia atividade.

Tanba  ne´e, Komando PNTL Munisípiu Díli liu husi seksaun investigasaun kriminal Díli Domingu (20/05/18) bolu ona  inan feton ne’e no akompaña husi nia laen hodi halo identifikasaun (investiga) durante 12 horas de tempo iha Eskuadra Dom Aleixo Comoro.

Husi rezultadu identifikasaun hatudu katak, inan  feton ne´e  sidadaun Indonesia, no nia naran  iha rua,  ida husi Indonesia nian  mak Yuniria Gea no naran iha Timor mak Adriana dos Santos no nia kaben mak Quintiliano dos Santos de Araújo, husi  Postu Administrativu Maliana, Munisípiu Bobonaro.

Yuniria Gea tama iha Timor-Leste iha iha tinan 1999 to´o agora nia ho nia laen harii uma mutin ida hodi hela, maibe  uma ne´e ho odamatan ida de´it, pinta koor modok.

“Ba media sosial  ne´ebé mak fó sai katak, sidadaun ida  iha Tasitolu lori sasan ne´ebé mak proibidu ka bomba. Tanba ne´e mak  media ne´e fó sai horiseik, Komando PNTL Munisípiu Díli Eskuadra Dom Aleixo liu husi seksaun investigasaun kriminal foti ona sidadaun ne´e halo ona identifikasaun ba nia, no sidadaun ne´e feto ida, nia naran Yuniria Gea hela duni Tasitolu,“dehan Euclides Belo.

Euclides Belo hatutan, tuir informasaun husi komunidade sira katak, Yuniria mate tiha mak moris fali mai, ne´e lalos.

 “So iha nia uma seksaun investigasaun hetan mak sasan oin tolu Alkitab ida utiliza hodi reja,  mapa  Timor ida no mós fotografia ne´ebé mak reprezenta espiritu.  Tanba  ne´e mak konkluzaun PNTL nian parte investigasaun  kriminal  katak, sidadaun refere la´os ema terrorista, PNTL konsidera nia hanesan matan dook  ne´ebé mak kura ema,“dehan Euclides Belo.

Tanba  ne´e mak Euclides Belo dehan, liu husi identifikasaun remata ba sidadaun ne´e haruka Yuniria Gea ho nia laen fila fali ba nia uma iha Tasitolu.

Alende ne´e Yuniria Gea dehan, nia la´os terrorista, nia hanesan sidadaun Timor Leste.

“Nusa mak imi la buka terrorista, ha´u ne´e Timor oan, la´os terrorista. Imi bele pasa revista ha´u-nia ain to’o ulun fatuk, imi ba haree ha´u-nia uma laran mak haree buat ruma laiha imi atu fó saida mai ha´u. Ha´u la mate klamar, ha´u-nia liman ain kompletu. Tanba ne´e nia entrega de´it ba rai lulik, se mak fitnah ha´u ne´e,“dehan Yuniria Gea.

Yuniria Gea mos informa, tuir planu  nia sei selebra nia tinan iha loron  15 fulan Juñu mai. Tanba  ne´e nia hakarak konvida ema hotu bele partisipa hodi  dansa hamutuk.avi