SAT-EOD alerta kombate infiltrasaun terrorizmu

Seksaun Anti Terrorizmu (SAT) no Explosive Ordnance Disposal (EOD) husi Unidade Espesial Polísia (UEP), preparadu kombate wainhira infiltrasaun elementu terrorizmu tama Timor-Leste.

“Ha´u hanoin katak, Komandante Unidade koloka ona ninia efetivu liu-liu ba SAT,  servisu informasaun husi UEP nian  iha fatin ne´ebé mak indikadu mosu karik, oras ne´e preparadu visibilidade tuir ami nia jeneral nain rua hato´o ona iha televizaun katak, la´os de´it unidade espesial, maibe F-FDTL apoiu ami mós preparadu, ne´ebé ami alertadu,“esplika Komandante Unidade Espesial Polísia (UEP), Superintendente Xefe Afonso dos Santos, ba GMN, Sesta (18/05/18), iha Kuartel UEP Bairo-Pite Díli.

Nia  mós husu  komunidade tomak bainhira hetan objetu ruma iha Igreja ka iha fatin komersial ka Hotel ruma, atu labele bok no   labele hakbesik a´an,   urjentimente kontaktu ba iha SAT ho  numeru 77556074, no ba iha EOD 77494374, preparadu  24 oras hodi responde iha terenu.

“Husu ba komunidade tomak atu apoiu, teknikamente wainhira  EOD ho SAT halo atuasaun husu ba komunidade atu hadok a´an  husi fatin ne´ebé mak halo intervensaun,  tanba ne´e sensitivu los. Ami mós iha ligasaun ho Komandante Densus 88,  Dansat Brimob Kupang, ami mós iha ligasaun ho Komandante Badan Nasional Narkotika iha Atambua, akontesimentu iha Indonesia Komandante Unidade hatene ona, sira sempre fó hatene mai ami durante 24 oras,“dehan Afonso dos Santos.

Antes  ne´e mós Komando Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL), alerta ona  membru sira atu  kontrola ema sira estranjeiru ne´ebé mak tama sai liu husi liña fronteira terrestre, aeroportu, karik deskonfia membru terrorismu.

Entretantu bomba suisida ba Igreja tolu iha Surabaya-Indonesia foin lalais ne´e hamate ema nain sia no na’in haat nulu resin kanek todan.

Tuir informasaun iha ona alerta katak, liña terrorizmu tama ona to´o Kupang Nusa Tenggara Timur (NTT), Indonesia.avi