Disputa rai, Komunidade Lahane protesta Júlio Álvaro

FOTO:GMNTV

Komunidade Aldeia Vale, Suku Lahane Oriental, Postu Administrativu Nain-Feto, Munisípiu Díli, hala’o protesta hasoru Emprezariu  Timor oan Júlio Álvaro, ne’ebé deklara rai ne’ebé lokaliza iha Suku Lahane Oriental partensia ba ninian.

Rai ne’ebé disputa ne´e joven sira husi Suku Lahane Oriental no Suku Lahane Osidental utiliza hodi tebe bola, desde tinan 1958 to´o Timor-Leste hetan indedependensia, no tama ona ba tinan 2018 nia laran ne’e.

Maibe ikus mai Emprezariu Timor oan Júlio Álvaro deklara, kampo tebe bola  ne´e rai partensia ba ninian.  Tanba ne´e, komunidade sira desidi halo mediasaun dala barak ona ho Emprezariu Júlio Álvaro, maibe la hetan solusaun. Maske nune´e, Júlio Álvaro, ‘la pusing’ aluga kareta hodi ba hatun fatuk iha kampo laran ne´e. Tamba ne’e implika komunidade Aldeia Vale, Suku Lahane Oriental, mobiliza  malu hodi halo intervensaun ba trava kareta sira atu labele hatun fatuk iha kampo laran ne’e.

Asaun husi komunidade nian ne’e, hetan intervensaun rápida husi Polísia Eskuadra Nain-Feto hodi fó seguransa, nune’e fatuk sira ne’e la konsege hatun iha rai ne’ebé disputa ne’e.

“Problema sira mai sukat rai Polísia mai akompaña, iha prosesu mediasaun barak ona ami halo laiha solusaun to´o ohin loron sira hakarak mai fakar fatuk, justisa iha ne´ebé. Ami hakarak husu de´it interese komun se interese justisa tau fali interese privadu, ha´u hanoin ne´e  injustisa ona,“esplika Xefe Aldeia Vale, Herman de Araújo Magno, ba GMN, Kuarta (06/06/18), iha kampo Vale Lahane-Díli.

Xefe Aldeia Herman de Araújo, mós husu emprezariu Timor oan  Júlio Álvaro atu aprezenta evidensia ka faktus ruma katak rai ne’e partensia ba ninian, tamba iha tinan 2000 to´o tinan 2018, nia nunka aprezenta dokumentus ruma ba  komunidade  sira.

“Ami defende kampo ne´e la´os ba interese Xefe Aldeia no Xefe  Suku  atu halo uma, ne´e ba juventude  tanba kampo ne´e akumula ba komunidade husi Suku Lahane Oriental no Lahane Osidental desde antigu mós ema uza hodi tebe bola tiha ona,“dehan Herman de Araújo.

Alende ne´e eis jogador Nuno dos Santos, fó sasin katak,  nia moris  iha Aldeia Vale Lahane iha  tinan 1959, wainhira nia bo´ot haree rasik ho matan katak rai  ne´e nakonu ho ailok, maibe loke  akademia futebol  hodi treinu joven sira no nia mós joga iha kampo ne´e.   Tanba ne´e mak  rai ne’e konsidera partensia ba Estadu, la´os Júlio Álvaro nian.

“Júlio Álvaro foin mai hela iha Indonesia nia tempu, ukun a´an nia hakarak hadau kampo ne´e, labele,“dehan Nuno dos Santos.

To’o notísia ne’e publika, GMN seidauk hetan konfirmasaun ho emprezariu Timor oan Júlio Álvaro, tamba okupadu.avi