Auditoria ba ZEESM remata ona, TC sei notifika autoridade RAEOA

Prezidenti Tribunal Rekursu (PTR), Deolindo dos Santos,  informa katak, prosesu auditoria ne’ebé mak Tribunal de Contas (TC) hala’o ba projetu Zona Espesial EKonomia Sosial Merkadu (ZEESM) Oe-cusse Ambeno remata ona iha semana ne’e, maibé TC seidauk bele publika nia rezultadu ba públiku, tanba TC sei fó notifikasaun uluk ba Autoridade Rejiaun Administrativa Espesial Oe-cusse Ambeno (RAEOA) ne’ebé hetan auditoria.

“Auditoria ZEESM ne’e, iha konstituisaun no lei kona ba Câmara de Contas hateten katak, depois parte sira ne’e notifikadu hotu, liu-liu entidade sira ne’ebé hetan auditoria ne’e notifikadu hotu, Tribunal Rekursu foin públika rezultadu ne’e iha nia website rasik,” katak Deolindo.

Tuir Deolindo, kestaun hanesan  mós, Tribunal Rekursu sei haree kestaun sira ne’ebé mak agora dadauk sei pendente hela, iha Tribunal Rekursu iha parte auditoria nian.

“Ha’u hanoin kona-ba auditoria ZEESM ne’e hanesan ha’u dehan tiha ona ba públiku katak, Tribunal Rekursu hala’o nia servisu no konklui ona, no relatóriu ne’e ami notifika ona ba auditora sira inklui ba Autoridade ZEESM rasik,” katak Deolindo.

Nia esplika, auditoria ba ZEESM ne’e, hanesan parte ida husi prosesu tomak ne’ebé Câmara de Contas nia planu rasik.

“Buat balu ne’ebé mak la’o, la’o tiha ona inklui ZEESM ne’e, no buat balun ne’ebé mak la’o dadauk iha Tribunal ne’e, la’o nafatin, tanba ida ne’e atu kumpri de’it buat ne’ebé konstituisaun no lei hateten,”relata Deolindo.cos