PNTL sei la husik inan sira soe bebé la’o livre

Komandante Jeral Polísia Nasional Timor-Leste (PNTL), Komisariu Julio Hornay, promete sei la husik inan sira ne’ebé mak soe bebé hodi la’o livre hela de’it iha nasaun ida ne’e.

Julio Hornay, hatutan, entidade hotu tenki ba hatan nia hahalok iha tribunal, tanba ne’e sei la husik kriminozu liu-liu inan sira ne’ebé mak soe bebé no oho ema, husik livre.

“Ami mai iha ne’e atu informa situasaun rai laran ba prezidente liu-liu kazu kona ba ita nia alin feto ida foin lalais ema oho hodi soe iha Subaun nian neébé joven nain 4 ita kaptura ona no agora dadauk iha hela prosesu investigasaun, alende ne’e mos ita mos informa kona ba kazu inan sira neébé mak soe bebé balun iha uma, balun iha baleta no ida ikus liu iha semitériu Viqueque ne’ebé oras ne’e dadauk bebé ne’e ita sei autopsia, hodi buka tuir suspeitu, inan ne’ebé mak halo hahalok ne’e ba nia oan depois mak ita submete ba investigasaun para nia bele responsabiliza nia hahalok,”Komandante Jeral PNTL, Komisairu Julio Hornay hateten ba jornalista sira hafoin hasoru malu ho Prezidente Republika (PR), Francisco Guterres Lú Olo, iha palacio Prezidensial Bairo Pite Dili Sesta (14/9/2018).

Komisariu Julio Hornay afirma, kazu soe bebé la’os ona buat ne’ebé subar, maibe entidade hotu hatene, tanba ne’e oras ne’e dadauk PNTL mos lansa hela informasaun ba entidade hotu liu-liu lider komunitária sira atu koopera ho PNTL hodi halo identifikasaun ba inan nain hira mak isin rua no nain hira mak partus.

“Kuandu ita hetan ona kazu ida hanesan ne’e, PNTL sei lansa informasaun atu nune’e se iha bairu ida inan sira ka ita-nia alin feton sira nain hira mak isin rua, ezemplu se ema nain lima mak isin rua, nain lima ne’e nain hira mak partus ona, se partus ona sira nia bebé ne’e iha ne’ebé? ida ne’e ita tenki buka tuir no maneira barak mak ita uza hodi identifika, Polísia iha maneira atu identifika,”dehan Julio Hornay.

Tuir Planu PNTL sei servisu hamutuk ho lider komunitária sira hodi identifika inan feton sira ne’ebé mak soe bebé hodi submete ba prosesu investigasaun.

Tuir dadus kazu krime ne’ebé mak akontese iha fulan ne’e liu-liu kazu soe bebé hamutuk nain tolu, entretantu kazu homesidu seidauk iha númeru serteza.Ola