PTR Deolindo:Relatóriu auditoria ZEESM sei publika iha website

Prezidente Tribunal  Rekursu (PTR), Deolindo dos Santos, informa, relatóriu auditoria husi Tribunal nian ba Zona Espesial Ekonomia Sosial  Merkadu (ZEESM), iha tempu badak sei publika iha Website Tribunal nian. Iha relatóriu ne’e rasik iha pájina hamutuk 500 resin.

“Relatoriu ZEESM nian ne’e auditoria ida ne’ebé Tribunal Rekursu  rasik atraves Camara de Contas  aprova iha tinan hirak liu ba, entaun iha planu Camara de Contas nian, ida mak auditoria ba ZEESM, no iha mos seluk ne’ebé barak los,”informa Deolindo dos Santos ba Jornalista sira Segunda (10/09/2018), iha Palasiu Prezidensial Nicolau Lobato, Bairo Pite, Díli.

Deolindo hatutan, iha auditoria balun  ba Ministériu balun,  hanesan Ministériu Edukasaun, EDTL no seluk tan ne’ebé hala’o ona no nia relatóriu  ne’e publika tiha ona, no ikus liu mak ZEESM.

“Ha’u sempe hatete katak, kuandu bainhira ita atu koalia kona-ba konteudu relatóriu  ne’e, publiku no deputadu  sira presiza atu lee didiak relatóriu  ne’e, ha’u fiar katak deputadu sira mos lee mak foin bele sira hasai piniaun, tamba bainhira atu to’o konkluzaun ne’e liu prosesu naruk ida, mas ha’u nu’udar juiz ne’ebé aprova relatóriu ne’e rasik no ha’u la bele emite ha’u-nia  opiniaun kona-ba  konteudu relatóriu ne’e rasik, ne’ebé tuir lei la premite,”subliña Deolindo.Oly