PNTL Munisípiu Díli alerta 2 ■Operasaun tama-sai bairu

Polísia Nasionál Timor-Leste (PNTL) Munisípiu Díli, alerta 2  hodi hala’o  operasaun tama-sai bairu atu garante seguransa no prevene komnidade labele tauk atu la’o iha tempu kalan.

Alerta ne’ebé trasa husi Komando PNTL Munisípiu Díli hahú iha Tersa (04/12/18), liu husi enkontru entre Komandante PNTL Munisípiu Díli  ho Komandante Eskuadra sira iha Kuartel Jeral PNTL Kaikoli, Díli.

“Ligasaun ba komunidade ninia sentimentu tauk iha Díli laran.Tanba ne’e mak  Komando  PNTL Munisípiu Díli sistema servisu dehan alerta 2.  Alerta ne’e ninia servisu fahe ba  ekipa rua atu servisu loron no kalan hodi garante nafatin seguransa ba ita ninia komunidade. Tanba ne’e mak ita sei halo check point  tama-sai bairu. Ita tama mós bairu kiik oan sira hotu atu evita ita nia komunidade sira labele senti tauk”,esplika Segundu Komandante PNTL Munisípiu Díli ba GMN Kuarta (05/12/18) iha  Kuartel PNTL Díli.

Tanba ne’e mak Komando PNTL Munisípiu Díli sei husu apoiu husi Unidade Espesial Polísia, liu-liu Batallaun Orden Públika Komando Operasaun Espesial. Posibilidade husu apoiu tan ba iha FALINTIL Forsa Defeza Timor-Leste (F-FDTL).

“Tanba ne’e mak husu ba komunidade hotu hela iha Díli laran husu atu pasa informasaun ba Polísia kuandu suspeita ema ruma hatene ema nia naran liga mai ami nia númeru telefone 3311380 atu ami buka tuir  hodi lori ba prosesu tuir lei ne’ebé mak vigora iha nasaun ne’e”,dehan Euclides Belo.avi