Uza samurai ho rama-ambon iha konfrontu, TDD aplika prizaun preventiva ba arguidu AS

Tribunal Distrital Díli (TDD), iha loron 25, fulan ne’e, tenki aplika prizaun preventiva ba arguidu AS, tanba iha konfrontusaun entre grupu ho grupu iha suku Fatuhada, postu administrativu Dom Aleixo, munisípiu Díli, arguidu uza Samurai no rama-ambon no arguidu na’in lima (5) seluk ho inisiál MCP, ACA, CS, ALG no MA TDD aplika Termo Identidade Residencia (TIR).

Razaun TDD aplika prizaun preventiva ba arguidu AS, tanba iha loron Domingu (20/01), fulan Janeiru, tinan ne’e, mais ou menus tuku 11:00 kalan, arguidu AS uza samurai no rama-ambon envolve iha konfrontasaun entre grupu iha suku Fatuhada, postu administrativu Dom Aleixo, munisípiu Díli.

Rezultadu primeiru interogatóriu husi TDD ba arguidu na’in nén (6) ne’e, desidi prizaun preventiva ba arguidu AS no kondena ho krimi arma branka, tanba nia lori samurai no rama-ambon durante konfrontu. Ba arguidu na’in lima (5) seluk ho inisiál MCP, ACA, CS, ALG no MA TDD aplika TIR no kondena ho crime dano agravado.

Enteretantu arguidu na’in nén (6) ne’e polisia kaptura iha fatin akontesimentu antigu merkadu Comoro nia kotuk, aldeia 03, suku Fatuhada, postu administrativu Dom Aleixo, munisípiu Díli.

Primeiru interogatóriu ne’e, prezidi husi Juíza Singulár, Francisca Cabral, Ministériu Públiku (MP), reprezenta husi Prokuradór Jeral,  Antonio Freitas no arguidu na’in nén (6) hetan asisténsia legál husi advogadu privadu, Miguel Acaçio Fária ho Ismael Assuncão Lopes. min