AIFAESA sei fo sansaun ba negosiante laiha lisensa negósiu

Autoridade Inspesaun Fiskalizasaun Atividade Ekonomia Sanitária Alimentar (AIFAESA), sei fó sansaun ba negosiante sira ne’ebé durante ne’e laiha lisensa negósiu.

Diretur Operasionál AIFAESA, Gabriel da Costa, hateten, antes atu fó sansaun ba negosiante sira ne’ebé laiha lisensa negósiu, AIFAESA sei halo uluk identifikasaun.

“Ami sei tu’un identivika ba negosiante sira ne’ebé mak halo negosiu, maibé laiha lisensa negosiu. Tuir lei, bainhira hetan sei fó sansaun ou multa osan dolar Amerikanu USD1000  to’o USD10.000, bazeia ba dekretu lei númeru 23, artigu 22. Alende ne’e  Autoridade Inspesaun Fiskalizasaun Atividades Ekonómika kontinua hala’o kontrolu ba kualkér atividade negósiu iha Díli, liu-liu ba loja sira atu evita no halakon sasan liu prazu”, hateten Gabriel da Costa ba Jornalista, hafoin hala’o inspesaun ba loja sira iha área Audian Díli, Sesta (15/02).

Ekipa AIFAESA hala’o inspeksaun ba loja MEIMAR, ALFA DILI, STAR KING, inklui sasan kontrusaun hanesan, Ai, kalen, tripleks, besi, paralon ne’ebé operador sira fa’an ba komsumedores sira.

Iha  inspeksaun ne’e, AIFAESA la detekta sasan no material ne’ebé liu ona prazu. Tanba ne’e, Diretur AIFAESA, Gabriel da Costa hateten, ida ne’e hatudu katak,  atividade ne’ebé durante ne’e AIFAESA halo,  nia rezultadu positivu tebes, hodi garante katak, operador ekonómiku sira iha ona konsiensia hodi fa’an sasan no material  ho justu no lolos ba komsumidores sira.

Nune’e mós, Diretór Kompañia Timor Bonuk, Angelo Freitas Gama hateten, durante ne’e nia hatama Ai,tripleks no papan tuir padraun ne’ebé Governu estabelese, no garante nia kualidade atu fa’an ba  komsumidores sira.

Entretantu  iha nia inspesaun  AIFAESA nian durante ne’e, konsege taka atividade negósiu  restaurante balun iha Díli,  tanba la tuir padraun ne’ebé Governu estabelese.aba