JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR enkoraja F-FDTL tane aas prinsípiu FALINTIL ■ Lere: Presiza valoriza ba nafatin

PR enkoraja F-FDTL tane aas prinsípiu FALINTIL ■ Lere: Presiza valoriza ba nafatin

Prezidenti Repúblika (PR) Francisco Guterres Lú Olo enkoraza FALINTIL-Forsa Defeza Timor Leste (F-FDTL) atu kontinua tane aas prinsipiu FALINTIL nebe respeitu hosi povu.

“Selebra aniversáriu  FALINTIL-FDTL ba dala 18. Iha selebrasaunn ida ne’e, ita hanoin ba kotuk, ita hanoin-klean ba ohin-loron no ita haree mós ba futuru Instituisaun ida ne’e nian,  ne’ebé ita harii no tenke kaer-metin nafatin,  atu la’o ba oin, nu’udar nesesidade Nasaun no Estadu nian,” Diskursu Prezidente Republika iha selebrasaun loron transformasaun FALINTIL ba F-FDTL ba dala 18, ne’ebé realiza,  Sabadu(02/02/2019) iha Kuartel Jeneral Fatuhada-Dili.

Iha loron selebrasaun ne’e, Prezidenti Repúblika hato’o uluk ninia saudasaun no parabéns ba ema hotu ne’ebé hala’o dadaun knaar iha Forsas Defeza hodi serbí Nasaun loron-loron, ho sentidu misaun no dedikasaun.

Nudar oportunidade mós ba ita hotu-hotu presta omenájen ba kontribuisaun veteranus FALINTIL sira-nian ba ita-nia luta ba independénsia nasionál, no mós ba memória mártir sira-nian, ne’ebé sakrifika-an ba ita-nia Pátria.

“Ita hakru’uk ba sira-nia esforsu, sira-nia aten-barani no sira-nia sakrifísiu. Ba sira-ne’ebé mate, ita la haluha sira-nia família, Omenájen di’ak liu ba sira mak ita hatutan babeibeik eransa  ida ne’ebé sira husik hela mai ita. Hosi eransa ida ne’ e, ita hasai  inspirasaun atu hakat liu dezafiu sira ne’ebé ita hasoru ohinloron no sei hasoru abanbairua, iha prosesu  dezenvolvimentu nasaun nian,” hateten, Xefe Estadu.

Prezidenti Repúblika aprofunda katak Estadu la iha bainhira la iha territóriu, la iha populasaun no la iha autoridade. Autoridade Estadu nian hatuur ho Forsas Armadas hamutuk ho instituisaun seluseluk. Forsas Armadas mak garante soberania, defeza no seguransa territóriu nian.

Tanba ne’e, Forsas Armadas ne’e sai  instrumentu importante tebes ida ba Estadu nia lala’ok. Kompete ba Estadu kaer-metin órden, asegura defeza no promove sosiedade nia moris-di’ak no progresu.

Iha nível polítiku, Forsas Armadas sira-nia koezaun no naran-kmanek presiza hetan atensaun maka’as. Nune’e, órgaun soberania-siratenke hakaas-an hodi fó tulun efetivu ba komandu ninia lala’ok no kondisaun sira ne’ebé Forsas Armadas  presiza atu bele hala’o sira-nia knaar baibain ho di ‘ak.

“Bainhira ita hanoin no ko’alia  kona-ba Forsas Armadas, ita presiza kompreende uluk Nasaun ida ne’e, ninia istória no ninia futuru, nu’udar Estadu independente, soberanu no unitáriu. Istória FALINTIL-FDTL nian kesi-metin ba oinsá ita harii Nasaun ida ne’e,” hateten Komandante Em-Xefe Forsa Armada ne’e.

Hanesan horiuluk, nu’udar FALINTIL, no hanesan mós ohin-loron, nu’udar FALINTIL-FDTL, militár sira, nu’udar kontinuadór, tane aas  nafatin valór no prinsípiu fundamentál sira ne’ebé dada konfiansa, konsiderasaun no respeitu hosi ita-nia povu.

Lee hotu :   Jeca Smith husu KPK servisu imparsiál ■Estabelese ona iha Suku 24

Bainhira ita hahú harii ita-nia Estadu, iha haksesuk kona-ba nesesidade atu organiza ka lae forsa militár permanente ida hodi defende ita-nia soberania.

Iha momentu susar tebes ida, iha ita-nia istória, ita deside harii FALINTIL-FDTL. Haree ba realidade, ita-nia lideransa foti duni desizaun loos ida. Ita-nia líder sira hatudu aten-barani, karáter no vizaun ba abanbairua, ba ita-nia moris koletivu, nu’udar Nasaun Independente ida.

Timoroan sira fó fiar no identifika-an ho Forsas Defeza. To’o ohin loron, FALINTIL-FDTL, hala’o sira-nia lala’ok ho di’ak no, ho konduta ezemplar ida  ne’e,  kontribui maka’as ba ita-nia pás no estabilidade.

Hatudu mós maturidade boot, apartidarizmu, katak,  la hali’is ba partidu ne’ebé de’it, lealdade ba podér polítiku eleitu, no respeitu ba Konstituisaun no Lei sira. Nune’e, FALINTIL-FDTL kontribui maka’as ba ita afirma ita nia soberania no hametin ita nia estabilidade no demokrasia.

F-FDTL kontinua hala’o knar PNTL

Prezidenti Repúblika (PR) Francisco Guterres Lú Olo afirma katak, militar, FALINTIL-Forsa Defeza Timor Leste (F-FDTL) kontinua hala’o bebeik knar Polisia Nasional Timor Leste (PNTL) nian mak hafraku imajen Estadu nian.

“La’ós regra ida katak militár sira bele hala’o polísia nia knaar, bainhira militár halo beibeik polísia ninia knaar, hahalok ne’e hafraku imajen Estadu nian no hasees Forsa Defeza hosi ninia misaun prinsipál”, dehan  PR Lú Olo .

Xefe Estadu aprofunda liutan katak Estadu harii Forsas Defeza ba misaun ida, atu hala’o defeza militár tuir Konstituisaun haruka, Forsas Defesa sira simu formasaun liu liu ba misaun ida ne’e, maibé sira mós bele partisipa, ho sira-nia rekursus rasik.

Hamutuk ho  parte sira seluk, iha misaun sira seluk, bainhira presiza halo hamutuk. Ohin loron, Timoroan sira-nia seguransa no moris-di’ak ezije Forsas Defeza servisu hamutuk ho Forsas no Servisus Seguransa iha misaun protesaun sivíl.

Iha knaar sira ne’ebé iha relasaun ho nesesidades bázikas no atu hadi’a kualidade moris ba ita-nia populasaun sira.

Iha nível seguransa interna, Forsas Defeza bele haforsa Forsas Seguransa bainhira presiza duni hatuur lalais autoridade no garante seguransa ba populasaun sira. Maibé situasaun ida ne’e labele akontese beibeik.

Xefe Estadu dehan atu asegura soberania, Timor-Leste tenke hakbesik-an ba rai sira seluk.Timor-Leste presiza estratéjia defeza militár ida ne’ebé la’o ho diplomasia no ko’alia ho ibun mamar no matenek, nu’ udar dalan atu hasees-an no rezolve konflitus

Lee hotu :   PDHJ halo asaun karidade ba prizoneiru feto iha Gleno

No hetan parseria estratéjika hodi haburas ninia kapasidade militár iha ámbituseguransa kooperativa hodi hare’e ba ámbitu ida ne’e.

“Ha’u hakarak  hato’oagradesimentu ba nasaun belun hotu-hotu ne’ebé kontribui ona ba kapasitasaun no dezenvolvimentu Forsas Defeza Timor-Leste nian,” agradese Xefe Estadu Lú Olo.

Susar tebetebes ba planeadór militár no ukun-na’in sira atu define forsa militár no kapasidade militár bainhira Estadu sira iha  rekursus limitadus tebes.

Biar nune’e, tuir Prezidenti Republika nia hanoin, presiza hala’o nafatin esforsu ba prioridade sira tuir mai ne’e hametin no haburas reforma lejizlativa sira ne’ebé la’o hela tuir ita-nia Konseitu Estratéjiku Defeza no Seguransa.

Fó kapasitasaun ba Rekursus Umanus no sosa ekipamentu baforsa sira, tuir kritérius loloos no  ikus mai promove forsas sira-nia partisipasaun iha misaun pás nu’udar fatór dezenvolvimentu, motivasaun no prestíjiu ba forsa sira no ba ita-nia  país.

Área relevante seluk ida ne’ebé ita presiza konsidera mak oinsá valoriza profisaun militár no respeita kondisaun militár sira.

Relasiona ho ida-ne’e, presiza define loloos estatutu ba pesoál militár,ne’ebé serve iha Forsas Defeza nian, hahú ho Estatutu Kondisaun Militár ne’ebé seidauk define tuir lei, hodi identifika loloos kondisaun militár no tuir  fali, halorevizaun ba Estatutu Militár sira-nian.

Atu haree loolos sira-nia devér, direitu no karakterístika seluseluk ne’ebé haketak sira hosi funsaun públika, iha ita-niaEstadu. Uluk, ohin no aban-bainrua, Forsas Defezanafatin komponente ida ne’ebé kontribui ba hatuur ita-nia  identidade nasionál.

Valór ida ne’ebé hametin ita-nia Nasaun babeibeik  no ida ne’ ebé halo imi-nia Komandante Supremu sente orgullu.

“Ha’u hatene katak ita sei iha buat barak atu halo. Ha’u rekoñese  esforsu sira ne’ebé imi halo ona no imi-nia dedikasaun ba Forsas Defeza no Nasaun. Ha’u enkoraja imi atu mantein nafatin imi-nia espíritu unidade no kamaradajen atu hakiak nafatin eransa ne’ebé FALINTIL husik hela mai ita,” hateten, PR Lú Olo.

Nune’e, Xefe Estadu dehan ba militar sira sei simu beibeik, hosi ami hotu, Timoroan, ami-nia respeitu, konfiansa no konsiderasaun.

Lere: Presiza valoriza istória FALINTIL

Xefe Estadu Maior Jeneral FALINTIL Forsa Defeza Timor-Leste (F-FDTL), Major Jeneral Lere Anan Timur hateten,  istória FALINTIL presiza valoriza hodi konta ba jerasaun foun Timor-Leste nian no mos sira iha instituisaun FALINTIL Forsa Defeza Timor-Leste atu bele hatene.

“Ha’u hakarak hateten, se kuandu  ita la valoriza ita nia istória ita sei labele  hakat ba oin. Tanba ne’e istória FALINTIL importante”,Xefe Estadu Maior Jeneral FALINTIL Forsa Defeza Timor-Leste (F-FDTL), Major Jeneral Lere Anan Timur, ba liu husi diskursu aniversario loron  transformasaun FALINTIL ba F-FDTL ba dala 18,   ne’ebé mak selebra iha  Sabadu (02/02/19) iha Kuartel Jeneral F-FDTL Fatuhada Díli.

Lee hotu :   Komando F-FDTL demite nia membru na’ok Bibi

Líder máximu instituisaun F-FDTL ne’e haktuir,  forsa armada Timor-Leste  agora dadauk hala’o kna’ar  tuir konstituisaun RDTL  artigu 146, ninia kna’ar mak atu   garante seguransa ba rai doben Timor-Leste no ba povu.

Alende ne’e F-FDTL kontinua hala’o komunikasaun  komunidade país internasionál.

“Ha’u  hakarak koalia sai de’it katak,  ha’u lakohi subar liafuan  ruma ba ha’u nia membru sira,  ha’u  apresia  tebes  ho F-FDTL, tanba sira ninia misaun importante ba  Estadu no ba povu rai doben ida ne’e”,dehan Lere Anan Timur.

Partisipa iha seremonia ne’e,  Prezidente Repúblika, Francisco Guterres Lú Olo, Prezidente Parlamentu Nasionál, Arão Noe, korpu diplomátiku,   Jeneral Tentara Nasional Indonesia,  Marsekal  Hadi  Tjahjanto,  Vise-Xefe Estadu Maior Jeneral forsas  defeza Japaun, Tanente Jeneral Takashi Motomatsu.

F-FDTL garante paz no estabilidade

Prezidenti Parlamentu Nasionál (PN), Arão Noe, konsidera instituisaun FALINTIL-Forsa Defeza Timor-Leste (F-FDTL) maka garante páz no estabilidade iha Timor-Leste, liu liu ameasa externa no iha rai laran.

“Ha’u hato’o parabéns ba instituisuan  F-FDTL ne’ebé ohin (02/02) halo komemorasaun aniversáriu ba-dala 18, dezenvolvimentu forsa la’o ho diak no ho rekrutamentu pesoal forsa foun sira komesa iha mudansa barak”, dehan Xefi Órgaun Lejislativu ne’e ba jornalista sira hafoin partisipa loron transformasaun FALINTIL ba F-FDTL, iha Kuarter Jeneral F-FDTL, Fatuhada-Díli, Sabádu (02-02-2019).

Arão Noe sujere ba veteranu sira ne’ebé maka sei aktivu hela iha instituisaun F-FDTL atu reforma ona, hodi fó konfiansa ba jerasaun foun sira, hodi asegura páz no estabililidade ba Timor-Leste.

“Ba oin ita nafatin fó konfiansa ba veteranu sira, sira mós komesa reforma ona para fó konfiansa ba jerasaun foun sira, hanesan kontinuador hodi asegura F-FDTL nia ezistensia hodi garante páz no estabilidade iha rai laran, hodi fó apoiu ba Polisia Nasional Timor-Leste (PNTL)”, haktuir Xefi Órgaun Lejislativu ne’e.

Entretantu tuir ístoria iha ínisiu Forças Armadas da Libertacão Nacional de Timor-Leste (FALINTIL) hanesan guarda ba partidu FRETILIN iha tinan 1975, FALINTIL hari’i iha loron 20 Agostu 1975 no ofiasialmente FALINTIL transforma ba F-FDTL iha loron 1 Febereiru, tinan 2001. Eus/avi/ety

Add to Comments Here!!!!

error: Content is protected.
Secured By miniOrange
You might also like:
Kona-ba OJE 2019, PR Lú Olo konsidera koresponde malu ona

Prezidenti Repúblika (PR), Francisco Guterres ‘Lú...

Atu hakotu impase polítiku, Eis PR Horta: Obrigasaun PR Lú Olo promulga OJE 2019

Desculpe, este conteúdo só está disponível...

JORNAL NACIONAL GMNTV KALAN, Loron-1 Fulan-Fevereiru Tinan-2019

Close