Suspeitu oho Tan Lin Xue seidauk kaptura

Polísia Nasional Timor-Leste (PNTL), to’o oras ne’e dadaun seidauk kaptura suspeitu ne’ebé oho sidadaun Xinéz, Tan Lin Xue, ne’ebé ema deskoñesidu oho iha Segunda (25/03/2019)  madrugada  iha Bairo-Pite, Díli.

“Suspeitu ne’ebé mak halo asaun krime ne’e dadauk ne’e sei iha prosesu nia laran, la signifika katak ami kaptura ona maibe iha prosesu nia laran no ami tenta nafatin para informasaun  husi sasaun sira para bele indentifika suspeitu ne’e”,  affirma Segundu Komandante  (PNTL) Munisípiu Díli, Superintendente Assistente, Euclides Belo, ba jornalista sira iha nia kna’ar fatin Kaikoli, Dili Tersa (26/03/2019).

Euclides esplika katak,  maske suspeitu ne’ebé komete kazu omisídiu ne’e seidauk kaer, maibe nia garante katak PNTL kumprimenta nafatin ninia misaun tuir prosedimentu legal ne’ebé mak iha.

“Espera katak sedu ou tarde prosesu ne’ebé mak la’o no kontinua rekolla informasaun sira ne’ebé PNTL hotu-hotu hala’o iha terenu para depois detekta suspeitu sira no iha tempu badak nia laran sei kaptura suspeitu sira. Motivu husi mate PNTL nia observasaun katak ema oho ka sona mate, ne’e PNTL ninia observasaun  seksaun investigasaun kriminal ne’ebé hato’o iha lokal do krime ne’e haruka mai”,haktuir Euclides Belo.

Komandante daruak ne’e fiar katak, suspeitu sira ne’ebé mak komete krime ne’e, sei kona sansaun ne’ebé mak sira komete ne’ebé  kontempla tiha ona iha kodigu penal.

“Kaundu kaptura suspeitu prosesa tuir prosedimentu legal ne’ebé mak iha no  simu sasaun tuir krime ne’ebé mak sira komete iha tempu ne’eba.

Tamba ne’e mak PNTL servisu hamutuk ho Ministériu Públiku”,dehan nia.

Euclides Belo kompromete, suspeitu sira ne’ebé komete kazu krime sei kaptura iha tempu badak,  tamba PNTL la’os servisu mesak maibe ho mós FALINTIL-Forsa Defesa Timor Leste (F-FDTL) liu-liu Polísia Militar (PM) nune’e mós ho autoridade lokal sira. Aes