Polísia detein diretór SAS ho FP na’in hitu

Polísia Tránzitu  Munisípiu Díli, detéin diretor Servisu Água Saneamentu (SAS) Munisípiu Díli ho inisial  FJ no Funsiónariu Públiku  hamutuk na’in hitu (7) iha sela detensaun,  tanba lori  transporte Estadu sirkula iha loron feriadu inklui laiha karta kondusaun.

Operasaun  konjunta entre Komisaun Anti Korrupsaun (KAK),  no membru Polísia Tránzitu no Diresaun Nasionál Transporte Terrestre (DNTT)  Iha  Sábadu (15/06/19)  no Domingu (16/06/19), konsege hetan membru funsiónariu  Estadu balun, lori kareta Estadu  hodi serkula iha loron  feriadu sira hanesan iha Sabdu no Domingu  sein iha  guai de marsa  husi instituisaun.

“Operasaun KAK lidera, depois DNTT, ami PNTL fó apoiu  hodi kontrola kareta Estadu nian, serkula iha loron feriadu”,esplika Segundu Komandante PNTL Munisípiu Díli, Superintendente Asistente Euclides Belo,  ba  jornalista sira Tersa (18/06/19)  iha Kuartel PNTL iha Kaikoli Díli.

Tuir Euclides Belo, membru Funsionariu sira detein iha sela, la’os lori kareta Estadu  sirkula iha loron feriadu,  maibe  balun identifika  laiha karta kondusaun. Tanba ne’e,  membru Polísia   Tránzitu lori ema sira  hodi  detein  durante oras 72  iha sela detensaun,  hafoin submete ba primeiru interogatoriu iha Tribunal Distrital  Díli.

Tuir informasaun husi servisu Polísia  balun lakohi temi sai naran informa katak, Funsionariu públiku nain hitu dadauk  detéin iha sela kompostu husi feto nain rua,  no   mane nain 5.

Entre feto nain rua ne’e,  feto  ida funsionariu  Saúde Liquisa, no  tuir fali funsionariu Minisériu Justisa, servisu Guarda Priosional Suai.

Alende ne’e, mane sira ne’e funsionariu husi Ministériu Justisa, Ministériu Negosiu Estranjeiru  no Kooperasaun,  no Diretór  SAS ida husi  Servisu Água Saniamentu (SAS) Munisípiu Díli ho inisial  FJ. Maibe  Polísia ne’e  la temi diretór SAS, ba área lolos. Pasa revista ne’e hala’o iha  Fatuahi, Manleu, Tasitolu no Lahane.avi