JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kazu kontentor 9 “TDD absolve arguidu Hamzah no José”

Kazu kontentor 9 “TDD absolve arguidu Hamzah no José”

Tribunál Distritál Díli (TDD), liu husi leitura akordaun ne’ebé lee sai husi juíz prezidi desidi absolve arguidu Hamzah no José Antonio husi krimi prekursor no asosiasaun kriminoza tuir lei kombate tráfiku no ilísitu de droga númeru 2/2017.

Razaun tribunal absolve arguidu na’in rua (2) husi krimi ne’e, tanba laiha prova sufisiente atu fó kondenasaun ba arguidu sira.

Entertantu advogadu privadu husi arguidu sira, Pedro Apariçio hateten, kontentor sia (9) ne’ebé Ministériu Públiku (MP) dehan tula materia droga ne’e la aprovadu, tanba aimoruk ne’e la’os droga.

“Razaun tribunal absolve arguidu na’in 2, tanba sasan ne’ebé iha kontentor laran la’os droga, maibé sasan ne’e uza hodi halo jamu ka aimoruk tradisional”, informa Pedro Apariçio foin la-lais ne’e.

Nia esplika, kontentor 9 ne’e mai husi Nasaun Xina, liu husi Singapura, hodi mai Timor no atu ba Indonesia, maibé la konsege liu husi Singapura, tanba selu impostu boot, tanba ne’e na’in ba kontentor ne’e desidi haruka mai Timor mak transfere fali ba Indonesia.

Antes ne’e, tuir akuzasaun husi Ministériu Públiku (MP) ne’ebé lee sai husi juíz prezidi katak, arguidu MK nu’udar Diretor kompañia PT Indonesia Sejarah ho ninia enderesu iha Jakarta, arguidu H hanesan kapitaun ba barku ou ró ho naran Berkat Selayar, JA nu’udar Diretor ba kompañia Naroman Furak Unipessoal. Lda no arguidu SS nu’udar emprezariu no hela iha Timor kuaze tinan barak no hanesan arguidu MK nia kolega.

Iha loron 14, fulan Janeiru, tinan 2018, Unidade Polísia Maritima (UPM) hetan informasaun husi servisu sekretu katak, iha kontentor 9 ne’ebé rai kuaze fulan 6 iha Portu Díli no trata hela dokumentu hodi halo exportasaun ba Indonezia, maibé tuir informasaun husi intelijensia katak, kontentor 9 ne’e deskonfia materia prima ne’ebé atu produz droga, ho nune’e komandante UPM halo koordenasaun ho Badan Narkotika Indonesia (BNN), haruka fotografia husi material prima hirak ne’e ba BNN hodi konfirma materia prima droga ne’e loos ka la’e.

Lee hotu :   Filomeno Paixão: Polísia labele antesipa konfrontu iha fatin hotu

Iha loron 20, fulan Janeiru, tinan 2018, BNN husu atu autoridade Timor-Leste haruka materia kontentor 9 ne’e ba Indonezia, maibé autoridade Timor-Leste rezeita ho pedidu ne’e, ho nune’e iha fali loron 21, fulan Janeiru, tinan 2018, BNN Indonezia hasoru malu ho autoridade Polísia Timor-Leste hodi haree direitamente materia prima sira ne’e no buka hatene tuir ema ne’ebé involve iha kazu ne’e no iha sorumutu ne’e BNN informa ba autoridade Timor-Leste katak, arguidu MK kle’ur ona sai hanesan ema ne’ebé BNN buka no husu atu prosesu sira tuir lei ne’ebé vigora iha Timor-Leste.

Iha parte seluk, kontentor sira ne’e hetan ona aprovasaun husi Diretor Nasional Alfándega halo exportasaun ba Indonezia no aprovasaun ne’e akontese, tanba iha loron 17, fulan Janeiru, tinan 2018, Diretor kompañia Furak Naroman Unipessoal. Lda hato’o ona pedidu ba Diretor Alfándega kona-bá exportasaun kontentor 9 ne’e husi portu Díli ba Indonezia, hafoin hetan aprovasaun husi alfándega arguidu MK, JA, SS kontaktu ba arguidu nu’udar kapitaun ró Berkat Selayar hodi mai tula kontentor 9 ne’e, maski arguidu sira seidauk iha justifikasaun klaru kona-bá destinasaun kontentor 9 ne’e.

Iha fali loron 23, fulan Janeiru, tinan 2018, wainhira arguidu sira hasa’i sasan husi kontentor 9 ne’e tula ba ró Berkat Selayar UPM no PNSIK prende kedas kontentor 99 ne’e iha portu Díli no halo mós detensaun ba arguidu MK, H no JA.

Hafoin prende kontentor 9 ne’e identifika katak, kontentor 9 ne’e tula materia prima hanesan Paracetamol, Acetaminopen, Caffeine, PVP, Tramadol, Dexamethasone, Meloxicam, Simethicone, Allopurinol, Ausinofilia, Dapoxetine, Aminopyridine, Subtramine, Piroxicam, Tadalafil, Carisoprodol 160.00 drums, Caffeine 164 drums, Sildenafil 20 drums, Dexamethasol 655 drums, Meloxicam 40 drums, Miconazole 8 drums, Simethicone 5 drums no Tadalafil 3 drums.

Lee hotu :   Forsa Rezerva PNTL Díli baku membru RENETIL

Iha loron 8, fulan Febereiru, tinan 2018, autoridade polísia Timor-Leste hamutuk ho BNN Indonezia halo teste laboratorium ba materia prima hirak ne’e iha Indonezia no rezultadu hatudu katak husi aimoruk hirak ne’e hanesan Acetaminopen, Caffeine, Carisprodol, Tramadol, Miconazole, Meloxicam, Simethicone, Allopurinol, Ausinofilia, Dapoxetine, Aminopyridine, Dexamethasone, Subtramine, Piroxicam fo indikasaun hanesan analjésiku ne’ebé bele hamosu reasaun alerjia, té been, ulun moras, isin manas, kabun moras, isin mean, zombie, matan dukur, la hakmatek, bila’an, delirium kma’an, muta, iritasaun gástrika, katar, ibun maran, laran la hakmatek, hamrook, sinti kolen, iritasaun matan, desmaia no halo kakorok no inus moras no husi efeitu aimoruk hirak ne’e identifika katak materia prima ho naran Carisprodol, nu’udar substansia ida husi droga, tanba ninia efeitu fó reasaun makaas hasoru ema nia isin lolon, bele hamosu depresaun no wainhira materia prima Paracetamol, Carisprodol no Caffein kahur hamutuk bele produz aimoruk ho naran PCC, wainhira konsumu bele efeitu imajinasaun ás, halusinasaun, kontenti hela de’it no halo konsumidor dependensia ba aimoruk ne’e.

Ho hahalok arguidu sira nian ne’e, MP akuza arguidu MK, H, SS no JA hanesan autor ba prátika krimi prekursór no asosiasaun kriminoza tuir lei númeru 2/2017, 25 de Janeiru kona-bá kombate tráfiku no ilísitu de droga.

Audénsia ba julgamentu ne’e prezidi husi juíz kolektivu, Ana Paula, Zulmira Auxiliadora, Eusebio Xavier, MP reprezenta husi prokurador, Jacinto Babo, arguidu sira hetan asisténsia legal husi advogadu privadu, Januario Martins, Pedro Camões no Pedro Apariçio. ita

Add to Comments Here!!!!

error: Content is protected.
Secured By miniOrange
You might also like:
KomJer PNTL dezloka ona ekipa halo investigasaun ba kazu agresaun fíziku iha Baucau

Komandante Jerál Polísia Nasionál Timor-Leste (PNTL),...

Governu prevé billiaun USD 1.6 ba OJE 2020

Primeiru Ministru   (PM), Taur Matan Ruak,...

PD labele ameasa governu AMP

Eis Prezidenti Repúblika José Ramos Horta...

Close