Ajuda feto seluk, Hamosu konfrontu iha uma-laran

FOTO:GOOGLE

Tribunal Distrital Díli (TDD), hala’o julgamentu ba krimi violénsia doméstika ne’ebé deskonfia komete husi arguidu ho inisial JR, tanba baku ninia-fen lezada ho inisial RW, hafoin arguidu ajuda feto seluk.

Tuir akuzasaun ne’ebé iha katak, iha loron 15, fulan Abril, tinan 2019, iha sira-nia hela fatin Liquiça, lezada kesi hela ai-maran atu ba fa’an no lezada bolu arguidu hodi husu ajuda, maibé arguidu lakohi ajuda no arguidu ba ajuda fali feto viziñu ense rai -metan, tanba ne’e, halo lezada nervozu no ko’alia barak, maibé arguidu la simu, tanba ne’e arguidu tuku, basa no lori tali kesi lezada.

Konsekuensia husi arguidu nia hahalok ne’e rezulta lezada sinti moras iha ulun, hasan no liman, tanba ne’e, Ministériu Públiku (MP) akuza arguidu ba prátika krimi violénsia doméstika ho forma ofensas integridade fízika simples, ne’ebé previstu iha artigu 145, husi kódigu penal Timor-Leste.

Hatán ba akuzasaun ne’e, arguidu deklara, faktu balun loos no balun sala, loos mak arguidu la’o ba viziñu feto ida ho naran Virgina, maibé lezada tuir husi kotuk ko’alia barak no dun arguidu ajuda feto seluk.

“Wainhira ha’u fila husi viziñu, ha’u haree nia (lezada-red) harahun sasan hotu, ko’alia barak no dun ha’u ba buka feto, tanba ne’e, ha’u nervozu hodi baku nia”, deklara arguidu iha audénsia.

Hafoin rona husi arguidu, juíz prezidi marka fali audénsia ba loron seluk, hodi kontinua rona husi lezada.

Audénsia ba julgamentu ne’e, prezidi husi juíz singular, José Ribeiro, MP reprezenta husi prokuradór, Nelson Carvalho no arguidu hetan asisténsia legal husi defensor públiku. ita