Lere rekoñese jerasaun tuan sira egoista no arogante

Xefe Estadu Maior FALINTIL Forsa Defeza Timor Leste (F-FDTL), Major Jeneral Lere Anan Timur, rekoñese katak, impase polítiku iha rai-laran dura ona ba tinan rua resin ne’e, tanba jerasaun tuan sira mak egoista duni no arogante tanba deit interese.
“Ha’u hanoin katak, jerasaun foun sira preokupa sira-nia futuru, futuru ne’ebé hahú kedan ohin, entaun ami katuas jerasaun tuan sira ne’e mak tenki halo aliserse ne’e metin, para bloku bele hari’i iha aliserse (Sigla lingua Indonézia fondasi) nia leten, bloku bele monu maibé, aliserse la bele monu maibé, kuandu aliserse monu, uma sobu rahun hotu, tanba los duni, ne’e hanesan preokupasaun juventude jerasaun foun sira nian”, dehan Lere Anan Timur ba Jornalista sira, Kuarta (13/11/2019) iha Palásiu Prezidensial Nicolau Lobato Bairo Pité Díli.
Nia afirma, jerasaun tuan sira tenke rai buat ruma ne’ebé diak, hanesan ezemplu diak ba jerasaun foun sira atu bele banati tuir, hodi bele hatete katak, joven sira sama tuir jerasaun tuan sira-nia ain fatin.
“Ami guerileiru FALINTIL sira-nia dever no obrigasaun mak la’os buat seluk mate ba nasaun, no 12 de Novembru mós hanesan ne’e, tanba risku ne’e ita hatene ona, katak risku mak sei mate, joven kuandu rihun ba rihun hamutuk ona ne’e , ne’e ita brani ona, TNI mós ita sadik ona, ita tuda mós ita tuda ona, baku mós ita baku ona, tanba ne’e mak juventude mate barak iha 12 de Novembru ne’e, husi 12 de Novembru mak hakmaan ami-nia todan ami hodi iha ai laran”, hatutan Lere.
Nia rekoñese katak, jerasaun tuan sira egoista tanba lakohi tu’ur hamutuk.
“Ida ne’e tanbsa? dala ruma tanba arogansia, lakohi sala no lakohi ko’alia ba malu tanba saida? ita dehan katak, prinsípiu uluk ami aprende iha ai laran mak kritika no autokritika, kona bá diálogu ne’e mak prinsipal, maibé ita la tu’ur hamutuk ne’e se mak sala no se mak los ne’e, ita lahatene. maibé kuandu lider sira tu’ur hamutuk, problema no sala imi deit mak hatene, la’os mai iha liur hodi hatete, Lú Olo mak sala, Xanana mak sala, ou Taur mak Sala? hanesan uluk ami iha ai-laran, se mak sala ami deit mak hatene, ami la publika iha mundu para hatene”,subliña Lere.oly