JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN KANSELA LEILAUN KARETA 65

PN KANSELA LEILAUN KARETA 65

Xefi bankada CNRT, Natalino dos Santos, hatete, bazeia ba dekretu lei númeru 32/2011, kona ba jestaun no alinasaun bens no moves Estadu no mós lei númeru 12/2017 kona ba lei organizasaun no funsionamentu administrasaun Parlamentar, laiha entidade ida atu interven.

Nia hatutan, liu husi Konsellu Administrasaun Parlamentu Nasionál ne’ebé kompostu husi reprezentante husi deputadu bankada CNRT, FRETILIN, PD no FRENTI Mudança, nomós reprezentante Administrasaun  Parlamentu Nasionál nian, deside atu halo prosesu alienasaun tuir prosediamentu legal tomak ne’ebé mak iha, inklui mós nia presu alienasaun nian, tanba durante mandatu tinan lima nia laran, deputadu sira ida-ida ne’ebé partisipa ba kustus manutensaun annual kareta PN, tuir desizaun Konsellu Administrasaun ne’ebé mak haktuir iha akta reuniaun Konsellu Administrasaun refere. “Maibé hafoin tetu didiak ba situasaun atual ne’ebé hamosu polémika bo’ot iha públiku kona ba prosesu alienasaun kareta PN, no haree ba desizaun Prezidenti Parlamentu Nasionál hodi suspende prosesu alienasaun refere, no mós liu husi diskusaun bankada rasik, hodi tetu mós ba desizaun husi Konsellu Polítika Nasionál partidu CNRT nian, nune’e bankada CNRT deside katak, intrega hikas kareta 30 husi deputadu bankada CNRT nian hodi kontinua tuir prosesu alienasaun ba kareta Parlamentu Nasionál nian,” katak Natalino dos Santos liu husi konferensia imprensa ne’ebé hala’o iha bankada CNRT,  Tersa (22/08). Nia hatutan, desizaun ne’e, la’os tanba manifestasaun Movimentu Universitáriu Timor Leste nian durante loron hira ne’e, maibé tanba sira nia konsiensia polítika rasik, atu kontribui ba estabilidade nasionál, tanba desizaun Parlamentu Nasionál nian laiha ema ida atu interven. “Husu ba Prezidenti Parlamentu Nasionál atu kansela prosesu alienasaun kareta Parlamentu Nasionál nian ba deputadu 65. Ami bankada CNRT husu ba públiku atu kria situasaun paz no hakmatek, matan moris no neon nain hodi fó apoiu masimu ba prosesu formasaun Governu foun, nomós prosesu negosiasaun tasi Timor ne’ebé mak hala’o hela,” katak Natalino dos Santos. Hatan kona ba maioria deputadu sira hatama hotu ona osan ba leilaun nian, Natalino dehan, ida ne’e prosesu administrativa Parlamentu Nasional  nian mak sei haree, maibé bankada CNRT foti ona desizaun atu kansela. “Administrativa mós ami haree hotu ona, tanba kareta sira ne’e durante tinan lima, deputadu sira halo manutensaun rasik, maibé ida ne’e konsellu administrativa nia servisu,” relata Natalino dos Santos. Alende ne’e, Vise Xefi bankada FRETILIN, Francisco Branco mós hateten, Prezidenti Parlamentu Nasionál hasai ona despaisu ida katak, kareta sira ne’e tenki fila hotu ba patrimoniu Parlamentu Nasionál, tanba ne’e, FRETILIN kumpri despaisu ida ne’e. “Ami-nia pozisaun mak ne’e, despaisu ida husi Prezidenti Parlamentu Nasionál, ne’ebé konsidera kareta sira ne’e Patrimoniu Parlamentu nian, entaun ami la presiza halo tan deklarasaun, tanba despaisu ida ne’e klaru ona katak, kareta sira ne’e propriedade Parlamentu nian,” katak Branco. Tanba ne’e, Francisco Branco dehan, sira sei kumpri hela sira-nia mandatu to’o loron 5 fulan oin, entaun sira sei uza kareta sira ne’e atu hala’o servisu, maibé bainhira sira-nia mandatu hotu, kareta sira ne’e sei husik ba Patrimoniu Parlamentu Nasionál. Francisco mós rekoñese katak, durante ne’e sira mak halo rasik manutensaun ba kareta sira ne’e, maibé kestaun ida ne’e, Konsellu Administrativa PN mak sei rezolve. Nune’e mós, deputada bankada PD, Maria Lourdes Besa, hatete, deputadu PD nain 8 konkorda ona atu entrega fila-fali Kareta Prado ba Estadu bainhira sira-nia mandatu remata. Bankada PD mós lamenta ho asaun protesta husi Movimentu Universitariu Timor-Leste ba desizaun Parlamentu Nasional nian kona ba prosesu leilaun kareta Prado hodi ikus mai hamosu anarkismu. “Ita hotu iha direitu atu espresa sentimentu no protestu, maibe ami lamenta deit mak  situasaun deskontroladu no violensia ne’e. Ami lakohi situasaun ne’e atu kontinua tan, agora ita iha prosesu formasaun Governu foun, tanba ne’e ami hakarak mantein estabilidade ba situasaun polítika iha Governativa  no Parlamentu no ami lakohi haree ema ruma sai vítima ba problema ida ne’e, ne’eduni ami hola ona desizaun katak ami sei kansela prosesu atu hola kareta prado ne’e, ami konkorda malu ona ba desizaun ne’e, ami sei uza kareta ne’e to’o de’it final mandatu ne’ebé sei estende tan semana rua, hodi halo ami nia servisu, kuandu mandatu IV lejislatura simu posse ami entrega ona ba patrimoniu parlamentu,”relata deputada Maria Lourdes Besa ba jornalista sira iha PN, Tersa (22/08/2017). Deputada Lourdes husu deputadu foun mai bele kontinua uza kareta ne’e hodi hala’o servisu,  no laiha tan razaun atu sosa kareta foun tan. “Ami mai iha parlamentu ne’e la’os tanba kareta, tanba ne’e ami bankada PD lakohi lori tan todan husi polémika ida ne’e, no ami lakohi estraga saida mak ami halo tiha ona tinan lima nia laran tanba deit kareta ne’e. Tanba ne’e, deputadu foun tama kontinua halo servisu ne’ebé ami hala’o tiha ona,”katak Lourdes. Deputada Maria Luordes afirma tan, deputadu balun ne’ebé konsege halo ona leilaun no muda tiha xapa matrikula, sei prosesa fali iha parte adiministrasaun. “Kareta hirak ne’e ami mós koidadu durante tinan lima,  ami halo manutensaun rasik, la hanesan ho prosesu Governu nian. Maibe buat sira ne’e hotu ami sei diskute, karik ami bele hetan fali osan manutensaun ne’e ami agradese, la hetan mós labuat ida,”dehan nia. Antes ne’e MUTL halo asaun protesta no hatama karta ba Parlamentu Nasional hodi espresa sentimentu lamentasaun ba prosesu leilaun ne’ebé tuir manifestante sira baratu liu. GMN mós nota katak, entre kareta 65 ne’e, kuaze barak mak muda ona xapa matrikula mean ba privadu. Tuir informasaun ne’ebé GMN rekolla husi Parlamentu Nasionál katak, Konsellu Administrativa sei selu fali osan ne’ebé mak durante tinan lima ne’e konsellu administrativa Parlamentu Nasionál ko’a ba halo manutensaun. Kada fulan ida konsellu administrativa ko’a 10% ka US$ 800 husi deputadu sira-nia salariu hodi halo manutensaun ba kada deputadu ida nia kareta. Tanba ne’e Estadu sei selu fali US$ 48.000 ba kada deputadu ida ho osan rihun walu ne’ebé mak foin lalais deputadu sira hatama ona ba folin leilaun kareta nian ne’ebé sai polémika. Nune’e Estadu sei selu kada deputadu III lejislatura ho osan US$56.000. To’o notísia ne’e públika seidauk hetan konfirmasaun husi autoridade Konsellu Administrativa PN.

Lee hotu :   XANANA UKUN HO FUAN, ALKATIRI UKUN HO LEI

MUTL husu tenki entrega Xavi

Inisiativa Parlamentu  Nasional hod kansela leilau kareta Prado nee hetan reasaun positivu husi Movimentu Universitariu Timor – Leste (MUTL) tamba responde ba asaun nebe MUTL halo. “agradese tamba Parlamentu Nasional rona sira nia ejijensia maibe tenki tau iha pratika “ dehan Porta Voz MUTL, Atanasio Belo ba GMN, Tersa feira nee iha edisiu GMN, Bebora, Dili. Porta Voz MUTL nee realsa katak tenki entrega Xavi nee publiku sira tenki hatene tama MUTL lakohi akontese iha tinan lima ba kotuk katak wainhira laiha ona protesta husi kotu sira fo xavi ba malu nonok deit.cos/Say

Add to Comments Here!!!!

error: Content is protected.
Secured By miniOrange
You might also like:
KOMBATE BOXE, MAYWEATHER KONTRA MCGREGOR

Iha loron 26 fulan Agostu, iha...

ÚNIKU GOLU MARINUS LORI INDONEZIA HALAKON SELESAUN NASIONÁL SUB 23 TIMOR-LESTE

Selesaun Nasionál Sub 23 Indonezia fila...

NEYMAR ELOGIA “ESTILO BRASILEIRO” DO PSG E FALA EM EVOLUIR APÓS ESTREIA ESPETACULAR EM CASA

(Reuters) - Neymar disse já estar...

Close