JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Mari Alkatiri:”lideransa lahatene rezolve situasaun polítika”

Mari Alkatiri:”lideransa lahatene rezolve situasaun polítika”

Primeiru Ministru Mari Alkatiri afirma situasaun polítika agora ne’e la iha ema ida mak bele sai mesias salvador, povu mak bele rezolve.

“Situasaun politika agora ne’e la iha ida mak sai mesias salavdor, se mak atu salva rai ida ne’e mak povu sira, se lideransa sira lahatene rezolve, bolu povu mai fali rezolve,’’ dehan Primeiru Ministru Mari Alkatiri iha seremonia inaugurasaun eskola EBC Oesilio RAEO, Sábado (08/12).

Mari Alakatiri afirma, povu sira lalika preokupa, hakmatek deit, basa povu mos sei la simu  lideransa ne’ebe hakarak joga povu.

“Situasaun polítik agora ne’e presiza bolu malu rezolve ho responsavel, laos halo GOLPE ba halo GOLPE mai, hau koalia ne’e tanba  realidade,’’ esklarese Mari.

Situasaun politika agora seidauk iha solusaun nafatin, maske Prezidente da Republika Francisco Guterres Lu Olo bolu ona liderasan husi partidu CNRT, PLP, KHUNTO, FRETILIN ho PD hodi buka soluasaun, maibe to’o agora la iha resultadu.

PM Alaktiri rekuñese VII Governu la iha osan atu selu tusan sira ne’ebe VI Governu husik hela.

“Balun dehan  osan barak hela Governu mak lakohi selu, mais osan la iha duni tusan mak barak, tanba ne’e hau seidauk kumprende tanba sa mak iha politika rezeita programa VII Governu nian. Luta agora ne’e hakarak kadeira ga hakarak servi povu,’’ afirma PM Alaktiri.

PM Mari Alktiri afirma, uniku Região Administrativu Espesial Oecusse (RAEO) mak la iha tusan. Projetu sira ne’ebe lao iha RAEO, osan iha selu kedas, laos hanesan projetu sira iha municipiu 12 ne’ebe tusan barak tebes.

Ho situasaun politika agora Mari la nega katak, afeita mos ba ekonomia iha rai laran, maibe nia sei esforsu hodi bele garante nafatin povu nia moris ho diak.

Lee hotu :   Alkatiri: “Xanana konfia nafatin ha’u”

“Kuandu imi hotu assesu ona ba programa VII Governun, imi bele haree saida mak Governu ne’e hakarak halo ba Timor-Leste,’’ tenik Mari Alkatiri.

VII Governu ne’e lori ona sira nia programa, inklui orsamentu retifikativu ho karater urjensia ba Parlamentu Nasional, maibe deputadu sira husi aliansa maioria opozisaun parlamentar  halo mosaun sensura hodi rezeita,”haktuir Alaktiri.

Nune’e mos Tuir Ministru Prezidensia Konsellu Ministru, Adriano do Nascimento katak, orsamentu retifikativu la pasa fo perigu tebes ba funsionariu kontratadu no emprezariu sira.

Dadus husi Ministeriu Finansas hatudu katak, divida iha ospital Singapura 1.2 miloens dolar Amerikanu, hospital Sandra 1.6 miloens, hospital Bali 1.4 miloens, hospital Malaysia 619, hospital Utomo-Surabaya 46 mil ho kustu operasional ne’ebe presiza.

La’os kulpa opozisaun

Entretantu Deputadu Natalino dos Santos husi bankada CNRT hateten Desizaun Governu atu hapara funsionáriu kontratadu 20.000 tanba Governu laiha ona osan atu selu, la’os kulpa Bloku Opozisaun Aliansa Maioria Parlamentar (BOAMP) nian.

Nia dehan, atu halo jestaun diak funsionamentu públiku ne’e mak Governu, la’os Parlamentu Nasional.

“Se hakarak mai husu orsamentu foun, tenki iha programa, Governu mai esplika uluk nia programa, la’os mai fó sala ba opozisaun, se sira hapara, ne’e sira nia kulpa, la’os opozisaun, husu responsabilidade ba Governu minoria,”dehan Natalino dos Santos ba GMN iha PN, Tersa (12/12).

Nia haktuir, labele fó sala ba opozisaun iha Parlamentu, tanba la’os opozisaun mak kaer Governu.

“Hapara funsionariu kontratadu 20.000 ne’e, haree husi konteudu saida, Parlamentu aprova orsamentu ne’e, ba tinan ida nian, husi Janeiru to’o Dezembru, se sira hapara ona hanesan ne’e, tenki iha razaun,”dehan Natalino.

Lee hotu :   Aniceto Guterres: AUMENTA VISE PN HUSI CNRT NO PLP, DESIZAUN POLÍTIKA

Alende ne’e, Xefi bankada Partidu Demokrátiku (PD), Maria Teresa Gusmão, hateten, PD rona ona informasaun husi Governu atu hapara funsionáriu públiku kontratadu 20.000, tanba osan laiha ona atu selu sira.

“Los duni katak, funsionáriu kontratadu sira uza osan husi bens servisu, entaun bainhira kuandu orsamentu la sufisiente atu selu sira, ita labele halo buat ida, tanba orsamentu retifikativu la aprova, tanba ita atu lamas osan iha ne’ebé atu selu ita-nia funsionáriu kontratadu sira,” katak Maria Teresa.

Maibé Xefi bankada PD ne’e dehan, FRETILIN ho PD sei tu’ur hamutuk ho bankada opozisaun atu buka solusaun ba situasaun ne’e.

“Tanba ita kuandu hapara ema 20.000 resin ne’e, sira atu sustenta sira-nia família oinsa, tanba iha konstituisaun mós hateten, sidadaun ida iha direitu universal atu moris, no ema iha direitu atu hetan servisu atu sustenta nia vida moris no nia família,” katak Maria Teresa.

Tanba ne’e, Maria Teresa, dehan, Estadu mak tenki garantia katak, povu hotu tenki hetan servisu atu bele hetan osan ba sustenta família nia moris.

“Ita husu ba malu, li-liu deputadu 65 katak, ita povu hili mai tu’ur iha Parlamentu Nasional atu sai matan, tilun no ibun povu nian, tanba ne’e deputadu ho Governu tenki toma responsabilidade ba situasaun ida ne’e,” katak Maria Teresa.

Nune’e mós, deputadu David Dias Ximenes mós hateten, Governasaun FRETILIN sei la hasai arbiru Timor oan ida husi nia servisu, tanba kada ema ida presiza servisu atu sustenta nia família.

“Ita hatene katak, oras ne’e dadaun ema lakohi aprova orsamentu, entaun ita atu haruka ema servisu de grasa de’it oinsa. Tanba ne’e mak ita sei ko’alia tu’un sa’e para la’o hamutuk atu hadia buat ne’e,” afirma David Dias.

Lee hotu :   Governu minoritária hatodan vida sosial-ekonómika povu TL

David Dias rekoñese katak, agora dadaun ne’e, Governu laiha ona osan atu selu funsionáriu kontratadu sira, entaun Governu tenki fó liberdade ba sira hodi buka fali servisu iha fatin seluk atu sustenta sira-nia família.

Nia hatutan, funsionáriu kontratdu sira ne’e, la’os FRETILIN mak hatama hodi servisu iha Governu, tanba durante tinan 10 ne’e, la’os FRETILIN mak kaer ukun, maibé FRETILIN lakohi atu hasai ema arbiru husi nia servisu. Nia/cos

Add to Comments Here!!!!

error: Content is protected.
Secured By miniOrange
You might also like:
BOAMP konsidera PPN halo teatru polítika

Bloku Opozisaun Aliansa Maioria Parlamentar (BOAMP),...

Aban, diskute OR iha jeneralidade ”AMP ezije ajenda mós karta BOAMP”

Prezidente bankada PLP, Fidelis Magalhães, informa,...

Rezultadu Ezame Nasional, Estudante 45.143 aprovadu no 473 reprovadu

Ministru Edukasaun no Kultura (MEK), Fernando...

Close