Segundu programa governu hanaran anotasaun

Ministru Prezidenti Konselho Ministrus, Adriano do Nascimento, informa katak, segundu programa ne’ebe VII Governu sei lori fali ba Parlamentu Nasional (PN) atu halo apresiasaun ne’e hanaran programa anotasaun.

Programa ne’e hanaran anotasaun, tanba dadus ne’ebe membru PN sira husu iha diskusaun primeiru programa Governu nian, halibur no tau hotu ona iha nota.

“Kona ba segundu programa hau hakarak dehan ami rekolha hotu ona dadus ne’ebe deputadu sira ejiji. Buat hot-hotu ne’ebe sira ejiji ami hakerek hotu ona. Programa ne’e ami bolu anotasaun, katak justifika, resposta ba pergunta no preokupasaun,” hateten Ministru Prezidenti Konselho Ministrus, Adriano do Nascimento ba Jornalista sira iha Parlamentu Nasional, Segunda (11/12/2017).

Adriano do Nascimento afirma mos katak, programa daruak ne’e hotu ona, hein deit aprovasaun iha Konselho Ministrus no asina husi Primeiru Ministru, Mari Alkatiri, hodi  ba aprejenta iha uma fukun PN.

Iha parte seluk, Ministru Prezidenti Konselho Ministrus ne’e sublinha, situasaun ne’ebe presiza tebes maka Orsamentu Retifikativu, maibe la aprova entaun ema lubun ida maka sei afeta, liu-liu empresário sira.

“Kestaun urjensia maka kona ba orsamentu, Estado agora iha perigu nia laran, tanba se orsamentu retifikativu la aprova ne’e significa katak ema lubun ida tenke hetan konsikuensia, primeiru maka laiha sirkulasaun osan iha merkadu, tanba ema lubun ida lasimu osan, li-liu empresário sira ne’ebe halo ona obra ho sira nia osan rasik,” hateten Adriano do Nascimento.

Programa dahuluk la passa iha uma fukun Parlamentu Nasional nune’e mos Orsamentu Retifikativu ho karater urjensia mos la aprova hotu iha PN. mia