JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Aban reuniaun KE, Xanana la partisipa maibe delega Taur

Aban reuniaun KE,  Xanana la partisipa maibe delega Taur

Prezidenti Repúblika (PR), Francisco Guterres Lú Olo, Kuarta aban (24/1/2018), sei konvoka reuniaun Konselho Estado (KE) hodi rona membru Konselho Estado kona-ba situasaun polítika, ohin loron nian, molok PR Lú Olo foti desizaun.

Atu hakotu ‘empase’ politika ne’ebe la’o ohin loron, PR Lu Olo sei uza nia kompetensia Konstitusional hodi bolu Partidu Politiku sira ne’ebe hetan asentu iha Parlamentu Nasional, inklui halo enkontru ho Konselho Estado sira hodi rona sira nia opiniaun molok foti desizaun. Tanba ne’e, PR Lu Olo, halo ona ajenda atu Kuarta ne’e halo enkontru Konselho Estadu iha Palacio Prezidensia Republika, Aitarak Laran, Dili.

Informasaun ne’ebe GMN asesu husi fontes importante sira iha Orgaun Soberanu RDTL nian katak,  Prezidenti CNRT, Kay Rala Xanana Gusmão nudar mos membru Konselho Estado, sei marka prezensa iha reuniaun Konselho Estado nian ne’e, tanba sei atende hela reuniaun importante ida iha Sydney-Australia, relasiona ho negosiasaun fronteira maritima nian entre Australia ho Timor Leste.

Fontes ne’e mos hateten katak, Kay Rala Xanana Gusmão nudar mos xefe prinsipal negosiador fronteira maritima nian, Segunda horseik (22/1/2018), haruka ona karta koñesementu ba PR Lú Olo kona-ba nia razaun aujensia iha reuniaun Konselho Estado nian ne’e.

 Iha karta ofisial ne’e mos Kay Rala Xanana Gusmão subliña katak, momentu  importante ne’e nia labele marka prezensa tanba atende hela enkontru trilateral entre Australia, Timor Leste ho kompaña explorador sira hodi diskuti asuntus tekinku balun ne’ebe atu halo iha Sydney.

Fontes ne’e dehan, iha karta Xanana nian ne’e informa mos ba PR Lu Olo kona-ba fiar ne’ebe mak Xanana fo hela ba Taur Matan Ruak atual Prezidenti Partidu Libertasaun Popular (PLP) nudar porta voz Aliansa Maioria Parlamentar (AMP) nian atu koalia iha reuniaun Konselho Estado.

Lee hotu :   KHUNTO ezije aprova Lei Anti Korupsaun ■Labele deklarasaun mamuk

Iha karta ne’e Xanana mos hateten, nia parte kontinua fiar iha Prezidenti Republika (PR) Francisco Guterres Lú Olo, atu foti desizaun Konstitusional hodi bele hakotu lalais empase politika ne’e.

Taur Matan Ruak nudar eis Prezidenti Republika no atual prezidenti PLP nudar mos membru Konselho Estado ne’ebe sei partisipa iha reuniaun Konselho Estado ne’e.

Membru Konselho Estado periodu 2017-2022, kompostu husi atuál Xefe Estadu, eis Prezidente Repúblika sira, atuál Prezidente Parlamentu Nasionál, atuál Primeiru Ministru, hola mós parte membru sira ne’ebé Parlamentu Nasionál mak nomeia hanesan, José Marcelino Cabral Belo, Aurora Ximenes, Virgílio da Costa Hornay, Virgílio Smith, José dos Santos “Naimori Bukar” no membru sira ne’ebé nomeia husi atuál Prezidente Repúblika mak hanesan, Oscar Lima, Faustinho Godinho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes.

PR rona opiniaun ikus Parpol

Prezidente Repúblika (PR), Francisco Guterres Lú Olo, Tersa ohin, (23/01/2018), sei halo konsulta ho Partidu Polítika sira ne’ebé hetan asentu iha Parlamentu Nasionál (PN).

Komunikadu imprensa ne’ebé redasaun GMN simu, horseik, informa katak, sei la bolu Bloku Koligasaun hanesan (FRETILIN-PD) no Bloku Opozisaun Aliansa Maioria Parlamentar (BO-AMP (CNRT, PLP no KHUNTO), maibé Prezidenti Repúblika sei bolu partidu ida-idak ne’ebe hetan asentu iha PN.

Xefe Estadu sei aproveita sorumutu ho partidu polítika sira hanesan mós reunian Konsellu Estadu,  hodi rona opiniaun ikus husi partidu ida-idak no membru sira Konsellu Estadu nian, molok atu foti desizaun.

Tuir oráriu Prezidente Francisco Guterres Lú Olo, sei ko’alia ho lideransa partidu sira iha oras sira hanesan, Partidu FRETILIN iha tuku 09:00, CNRT tuku 10:00, PLP tuku 11:00, PD 15:00 no Partidu KHUNTO iha 16:00.

Lee hotu :   TR deside karta destituisaun hasoru PPN konstitusional “BOAMP husu PPN labele subar-an”

Antes ne’e,  iha fulan Outubru 2017, Prezidente Repúblika Francisco Guterres Lú Olo mós hala’o ona diálogu ho entidade oioin, hanesan konfisoen relijioza sira, reprezentante veteranu, reprezentante organizasaun juventude rezisténsia,  organizasaun sosiedade sivíl, organizasaun estudantil hodi rona sira-nia opiniaun atu bele foti desizaun hodi hakotu impasse polítika ne’ebé mosu hafoin formasaun VII Governu Konstitusionál.

Husi sorin seluk, jurista Timoroan no eis deputadu, Manuel Tilman hateten katak, ho aujensia eis Prezidenti Repúblika aktual Prezidenti Partidu CNRT Kay Rala Xanana Gusmão nian ne’ebé sei la marka prezensa iha sorumutu Konsellu Estadu, tanba sei iha rai liur, laiha impaktu ba sorumutu Konsellu Estadu tanba Konsellu Estadu funsiona por maioria.

“Klaru katak, maun Xanana Gusmão la iha ne’e, ne’e difisil oituan, maibé Prezidenti Repúblika ne’e rona Konselho Estado, maibé Prezidenti Repúblika la’os obrigadu tenki tuir Konselho Estado ninia opiniaun. Ne’eduni ba ha’u, maun boot Xanana mak iha ne’e di’ak liu,”  hateten Manuel Tilman.

Manuel Tilman esplika liu tan katak, depois de reuniaun Konselho Estadu, Prezidenti Repúblika la’os atu foti kedas desizaun iha loron ida ou rua nia laran, maibé sei lori tempu natón atu bele tetu no análiza sujestaun sira husi Partidu polítiku sira no Konsellu Estadu nian, molok foti desizaun.

“Parlamentu Nasionál mós ajenda hela mosaun sensura ba dia 31 de Janeiru, entaun ha’u hanoin, Prezidenti Repúblika sei hein dia 31 ne’e. Sé iha dia 31 ne’e mak mosaun sensura ne’e liu, entaun iha ona razaun atu demite Governu, iha ona posibilidade, atu konvida AMP ne’e atu konstitui VIII Governu. Maibé Konsellu Estadu mak sei fó pareser kuandu Prezidenti Repúblika konvoka ona reuniaun Konsellu Estadu atu nune’e Prezidenti Repúblika iha ona hanoin ruma konkretu, atu foti desizaun. Maibé Prezidenti Repúblika laiha obrigasaun atu tenki tuir Partidu Polítiku sira nia hanoin, la iha obrigasaun atu tenki tuir Konsellu Estadu nia opiniaun,” hateten Manuel Tilman.

Lee hotu :   Opozisaun rejeita OR iha Komisaun C ''FRETILIN preokupa''

Husi sorin seluk, Primeiru Ministru Marí Alkatiri hateten katak, sei ba Parlamentu Nasionál la’os atu debate maibé atu hateten deit ba deputadu sira, liu-liu BO-AMP katak, sira nian mosaun sensura ne’e iha méritu ga laiha méritu.

“Ha’u mós halo Konstituisaun. Maibé iha Konstituisaun ne’e la dehan katak, sira maioria ne’ebé sira tenki halo golpe,” esplika Marí Alkatiri ba jornalista sira iha edifísiu Comissão Função Pública (CFP), Matadouro, Segunda horseik. ixo/mia

Add to Comments Here!!!!

error: Content is protected.
Secured By miniOrange
You might also like:
PM Alkatiri apela ba PNTL labele ameasa povu

Primeiru Ministru Mari Alkatiri, apela ba...

Ajenti PNTL nain 178 simu graduasaun ■Julio Hornay husu tane a´as valor profisional

Ajenti Polísia Nasionál Timor-Leste (PNTL) nain...

GRANDE ENTREVISTA Hamutuk ho Presidenti CCITL Oscar Lima no Empresariu Nacional Rui Castro

Close