JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Komemorasaun 20 Maiu, Xanana-Taur la marka prezensa

Komemorasaun 20 Maiu, Xanana-Taur la marka prezensa

Lideransa masimu Aliansa Mudança ba Progresu (AMP), Kay Rala Xanana Gusmão ho Taur Matan Ruak, la marka prezensa iha selebrasaun loron restaurasaun independensia ba dala-XVI, 20 Maiu 2018.

Prezidenti Republika (PR), Francisco Guterres “Lú Olo”, hateten, ema ida la bele obriga atu sira nain rua (Xanana ho Taur) atu marka prezensa iha serimonia historiku ne’ebe Estadu selebra iha Palacio do Governo alias Praça da Proclamação Independençia.

Lú Olo afirma katak, komemorasaun loron proklamasaun independesia ne’e baTimor oan. Nune’e, bainhira prezidente AMP Kay Rala Xanana Gusmão ho nia ‘alin’ Taur Matan Ruak, la marka prezensa labele obriga.

Iha fatin hanesan Primeiru Ministru (PM), Mari Alkatiri  reforsa katak, uluk kuandu porta vos AMP Taur Matan Ruak sai Prezidente Repúblika komemora loron proklamasaun independensia ba 15 prezidente AMP Kay Rala Xanana Gusmão la partisipa.

“Presidente AMP la marka prezensa no porta vos AMP Taur Mata Ruak  halo komemorasaun loron proklamasaun ba dala 15 prezidente AMP kay Rala Xanana Gusmão la ba,  ha’u mos la ba,” Alkatiri fo hanoin hikas.

Alkatiri ho oin hamnasa lia tun dehan, ohin loron festa historiku ne’e, lider nain 2 husi AMP nian la marka prezensa hotu.

Hatan kona-ba ida ne’e, Mericio Akara, nudar membru AMP argumenta katak, Kay Rala Xanana Gusmão ho Taur Matan Ruak, nudar lideransa nasional Timor Leste nian. Nune’e, maske sira la partisipa iha seremonia restaurasaun independensia TL ba tinan 16 ne’e, maibé sira nia domin nafatin ba povu.

“Sira sempre iha lejitimasaun forte atu selebra loron importante hanesan ne’e iha ne’ebé de’it, no atu partisipa oinsa. Sira la mai tanba sira iha atividade seluk ne’ebé la bele husik,” informa Mericio Akara.

Merisio Akarak afirma mos katak, ema ida la bele inpoin Timoroan ida atu selebra loron restaurasaun Timor Leste nian iha ne’ebé de’it, tanba povu Timor Leste sei presiza nafatin lideransa Nasional sira, hanesan Kay Rala Xanana Gusmão ho Taur Matan Ruak.

                        Louva Governu

Biban ne’e, Prezidenti Republika, Francisco Guterres “Lú Olo”, lori povu Timor Leste nia naran hato’o parabens no louva VII Governu ne’ebe lidera husi Primeiru Ministru (PM), Mari Alkatiri.

Lee hotu :   La involve iha VII Governu, Xanana labele asina dokumentu FM

Xefi Estado hato’o sentimentu apresiasaun ne’e katak, maske hasoru kondisaun ne’ebe susar tebes, la’os deit iha nível politiku, maibe mos iha nível orsamental.

“Iha momentu ne’ebe ita hamutuk selebra Restaurasaun Independénsia, hau hakarak hato’o liafuan espesiál parabens ba membrus Parlamentu Nasionál hotu-hotu, ne’ebe mak eleitu iha loron 12 Maiu. Ha’u agradese no hako’ak mos deputadus no deputadas ne’ebe mak serví nasaun iha Parlamentu Nasionál sesante durante tinan ida ikus ne’e,” hateten Lu Olo.

 Lori povu no Estadu nia naran, Lú Olo mos fo parabens ba Primeiru-Ministru no membrus VII Governu Konstitusionál nian hotu-hotu, ne’ebe ukun  nia rain ne’e ho rigorozu, kompetente no ezemplár durante períodu ida-ne’e.

Lú Olo hateten, maski hasoru kondisaun ne’ebe susar teb-tebes, la’os deit iha nivel polítiku, maibe mos iha nivel orsamentál, maibe VII Governu  kontinua halao nia knar hodi jere administrasaun Estadu ho senseru no diak tebes.

“Aniversáriu Restaurasaun Independénsia konvida ita atu halo reflesaun kona ba responsabilidade aas ne’ebe mosu hosi Governu maioria ida. Governu serve ba saida? Governu ida ne’ebe hili tuir dalan demokrasia nian, ho responsabilidade sira ne’ebe sidadaun sira tau iha ukun na’in sira nia liman, serve ba saida? Sidadaun sira fo ba nasaun maioria ida atu ukun. Maibe maioria ne’e la signifika katak Governu ida, Governu ne’ebe deit, bele halo tuir nia hakarak. Lae. Ukun ne’e katak hili polítika hirak ne’ebe adekuadu, implementa medida hirak ne’ebe diak hodi hatan ba nesesidade sira povu nian. Ukun ne’e katak tane aas interese sira povu no nasaun nian,” afirma Prezidenti Lú Olo.

Lú Olo mos hatutan, maioria ne’ebe rezulta hosi eleisaun antesipada fasilita serbisu ukun nian. Maski nune’e, hodi hametin konfiansa iha demokrasia, ukun na’in sira tenke halo tuir promesa sira ne’ebe halo durante kampaña eleitorál. Basa, liu tiha Restaurasaun Independénsia, Estadu nia prioridade mak haburas kondisaun ne’ebe diak liu hodi hametin soberania nasionál.

“Hodi haforsa soberania no hametin ita nia nasaun, ita tenke dezenvolve lailais ita nia rain ne’e, hadi’ak kondisaun moris no hasa’e moris diak ba sidadaun hotu-hotu.  Hodi dehan ho liafuan seluk, haburas nasaun no hadi’ak kondisaun moris ema hotu-hotu nian mak ukun ho susesu. Ida-ne’e mak pontu-xave hosi reflesaun ne’ebe hau propoin ba ita hotu,” Lú Olo hateten.

Lee hotu :   AMP sei implememta programa dezentralizasaun iha kada munisípiu

Tuir Lú Olo, demokrasia la’os deit partisipasaun sidadaun sira-nian iha eleisaun. Ukun liu hosi dalan Demokrasia signifika mos haburas kondisaun ba sidadaun sira atu partisipa lor-loron iha solusaun ba problema sira ne’ebe mak afeta sira-nia moris, signifika mos promove povu nia partisipasaun iha prosesu definisaun no implementasaun ba prioridade sira dezenvolvimentu nian, iha nivel nasionál no lokál.

“Bazeia ba kondisaun paz, estabilidade no klareza polítika ne’ebe mak ita nia rain iha daudaun ne’e, hau fiar katak iha tinan lima oin mai hosi V Lejizlatura, ne’ebe lakleur sei hahu ho abertura parlamentu Nasionál foun, Timor-Leste tenke fo hakat foun hirak ne’ebe metin hodi hasa’e kualidade ekonomia nian, kualidade dezenvolvimentu nian, atu nune’e ita bele realiza Objetivus Dezenvolvimentu Sustentavel ne’ebe ita promete atu halo tuir iha Nasoins Unidas nia oin, hamutuk ho komunidade internasionál,” Lú Olo hateten.

Objetivu estratéjiku sira ba dezenvolvimentu nasionál la muda, tanba deit troka tiha Governu. Defeza no promosaun ba interese nasionál ezije diálogu, konsertasaun no partisipasaun sidadaun sira nian ho ativu.

Hanesan libertasaun nasionál hanorin mai ita, durante luta tinan 24 nia laran, unidade povu nian no unidade entre povu no funu na’in sira importante teb-tebes hodi lori paz ba vitória no restaura Independénsia. Ohin loron, só ho mobilizasaun sidadaun sira nian iha territóriu laran tomak, so ho unidade povu nian no serbisu hamutuk entre Estadu no sidadaun sira, mak ita bele atinje meta nasionál sira ne’ebe determina ona, Liu-liu, hasa’e Edukasaun nasionál nia kualidade, Hasa’e kualidade hosi uma kain timoroan ida-idak nia saúde, hasa’e ita-nia ekonomia nia rendimentu, no kumpre ambisaun atu halo ita nia rain nakfila ba nasaun ida ho rendimentu médiu iha tinan 5 to’o 10 oin mai, ho kondisaun moris ne’ebe diak liu tan ba ita hotu-hotu.

“Kompromisu sira ne’ebe mak hau foti hori bainhira hau eleitu ba Xefe Estadu, fo valór no atensaun maka’as ba ambisaun nasionál hirak ne’e. Hanesan ha’u temi iha momentu ha’u hetan pose, durante hau nia mandatu hau sei uza instrumentu sira-ne’ebe Konstituisaun fo ba Prezidente Repúblika hodi defende inkluzaun sosiál no ekonómika ba Timoroan hotu-hotu, feto no mane, liu hosi defende no promove polítika hirak ne’ebe Estadu tenke halo ba Edukasaun, formasaun profisionál, saúde, uma, asesu ba bee moos, saneamentu báziku no kria kampu serbisu, no sai fatór ida ne’ebe kaer metin estabilidade polítika, paz no dezenvolvimentu,” afirma Lú Olo.

Lee hotu :   Komemora loron 30 Agostu, PN kongratula Povu no veteranu TL

Atu bele alkansa Timor-Leste nia objetivu nasionál sira,  tuir Lu Olo, Estadu no sidadaun sira, ita hotu, tenke haraik-an, onestu, laran-moos no serbisu hamutuk hodi fo liman ba malu hasoru dezafiu boot sira ne’ebe mak mosu iha prosesu haburas ita nia rain. Tenke halo Timoroan sira sai unidu haleu interese nasionál balun. Nasaun presiza opozisaun ida ne’ebe ativu no kompetente, maibe sei iha dezafiu nasionál balun ne’ebe ezije opozisaun nia tulun no Governu nia kapasidade atu rona no halo diálogu hodi bele hetan susesu.

“Nu’udar Prezidente Repúblika hau sei halo buat hotu-hotu tuir kompeténsia ne’ebe Konstituisaun fo mai hau, atu ajuda halibur hamutuk nasaun, promove sidadaun sira nia partisipasaun iha dezenvolvimentu nasionál no serbisu hamutuk ho órgaun soberania sira seluk hodi fasilita definisaun no implementasaun ba polítikas dezenvolvimentu nasionál, iha nivel hotu-hotu. Durante tinan dahuluk hosi hau nia mandatu ne’e, hau nunka haluha kompromisu sira ne’ebe hau halo ba povu bainhira hau eleitu. Hau promete ba Ita Boot sira katak hau nia prioridade sira ba hau nia mandatu iha tinan hirak oin mai sei nafatin, la muda,” Lu Olo hateten.

Nia husu ba povu hotu konta nafatin ho nia atu sai hanesan Prezidente hotu-hotu nian no ba Timor-oan sira hotu, no mos fatór ida ne’ebe kaer metin unidade, diálogu no inkluzaun sosiedade nian, hamutuk sei alkansa la-lais liu metas dezenvolvimentu País nian no sei hadi’ak moris diak ba Timoroan hotu-hotu. ety/mia

Add to Comments Here!!!!

error: Content is protected.
Secured By miniOrange
You might also like:
PM Alkatiri: EA susesu tamba VII Governu

Primeiru Ministru (PM), Mari Alkatiri, hatete,...

TR sei anunsia rezultadu EA hafoin oras 72

Prezidente Tribunal Rekursu (PTR), Deolindo dos...

Tinan ida mandatu Lú Olo infrenta dezafiu polítika foun

Prezidenti Republika (PR), Francisco Guterres “Lú...

Close