JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

AMP KONSIDERA PR LÚ OLO KRIA IMPASE POLÍTIKA “LA APROVA VIZITA ESTADU BA PORTUGAL”

AMP KONSIDERA PR LÚ OLO KRIA IMPASE POLÍTIKA “LA APROVA VIZITA ESTADU BA PORTUGAL”

Bankada apoiu governu, ne’ebé kompostu husi, CNRT, PLP, KHUNTO no UDT/Frente-Mudança liu hosi nia deklarasaun bankada nian, konsidera Prezidente Repúblika (PR) Francisco Guterres ‘Lú Olo’ mak kria impase polítika oras ne’e dadauk no laiha kapasidade hodi análiza situasaun polítika atual Estadu ninian, deklara reprezentante bankada apoiu Governu deputadu PLP, Francisco Vaz Conselhos iha plenaria, Segunda (09/07/2018).

Deputadu PLP Francisco Vaz Conselhos fo sai deklarasaun ne’e, relasiona ho lista kandidatura ba membru VIII Governu 42 ne’ebé aprezenta husi Primeiru ministru indijitadu, maibe hetan suspende ba lista kandidatu 11 hodi la fó posse no balun de’it mak simu posse.

“Prezidente Repúblika hatudu dadauk katak nia laiha kapasidade hodi análiza ba Estadu no nasaun atual no liu-liu laiha koñesimentu konaba sistema ne’ebé tane hela ita nia Estadu, Estadu ne’ebé nia (PR) tau an nu’udar xefi, hodi la fó posse ba membru VIII Governu sira seluk. Se ida ne’e mak akontese, situasaun ida ne’e sei monu responsabilidade tomak no mesak Prezidente Repúblika nian, tanba nia mak kria impasse polítika, hodi la respeita vontade soberanu povu nian, maske nia (PR) dehan nia deside ba eleisaun antesipada atu husik povu mak deside, maibe deside tiha iha maioria iha Parlamntu, Prezidente Repúblika la konsistente ho nia deklarasaun no la respeita povu nia desizaun iha eleisaun antesipada,”dehan Francisco Vaz Conselhos.

Bankada apoiu governu, liu hosi nia reprezentante ne’e mós fo sai katak, aktu ka desizaun xefi Estadu ne’ebé lakohi fó posse ba kandidatu membru VIII governu hirak ne’ebé hetan konfiansa husi Primeiru ministru, konsidera la respeita ona prinsipiu presunsaun inosensia no naran diak no onra sidadaun nian ne’ebé hatúr ona iha konstituisaun RDTL.

Bankada AMP no UDT/Frente-mudança mós konsidera xefi Estadu laiha imparsialidade, tanba xefi Estadu la aplika kriterius ne’ebé sai hanesan razaun ba nia hodi la fó posse ba kandidatu membru VIII governu iha fulan Setembru no Outubru 2017, bainhira fó posse ba membru VII Governu nian.

“Prezidente Repúblika mós nomeia ba VII Governu, ema balun ne’ebé ho perfil étiku kontroversu, ne’ebé halo sabotajen durante VII Governu, ba atividades Parlamentu nian, orgaun ida ne’ebé mak reprezenta povu tomak, konaba paralizasaun Parlamentu nian, ne’eb’e inkonstitusional no anti-demokrátika, PR nonook hela de’it, no hakru’uk hela de’it ba atitudes no komportamentu VII Governu nian iha tempu ne’eba, Prezidente Repúblika lakohi hatene no laliga, haluha loloos kedas nia dever konstitusional atu zela ba bom funsionamentu iha instituisoens demokrátika nian, nune’e pozisaun Prezidente Repúblika nian, atu kontinua ho impasse ida ne’e, sai hanesan desizaun ida ne’ebé mai ho total responsabilidade ba Prezidente Repúblika. Bankada CNRT, PLP, KHUNTO no UDT/FM la simu no repudia tebes desizaun ida ne’e, tanba la serve interese povu nian, hodi kontraria fali vontade maioria Povu nian,”katak Vaz Conselhos.

Lee hotu :   Veteranus eziji PR harii lalais Konsellu Veteranus

Tuir polítiku ne’e katak, bainhira membru governu seidauk kompletu, seidauk iha dalan, tuir hahalok ne’ebé polítikamente konsidera responsavel duni, atu aprezenta programa Governu nian ba Parlamentu Nasionál no hafoin ne’e mak bele aprezenta proposta ba lei orsamentu jeral Estadu 2018 nian, hodi bele sai husi rejime duo désimu no bele is foun situasaun finanseira nasaun nian.

Tanba kofre Estadu atual, hela de’it 20 milloens dolares, maibe Estadu presiza 80 milloens ne’ebé inklui saláriu ba funsionariu públiku, bens servisu no transferensia públika ba veteranus, idozus no subsídíu ba bolsa da mãe, atu bele garante ninia funsionamentu normal iha fulan jullu nia laran.

Deputadu ne’e mós hateten tan, bainhira orsamentu kontinua la aprova lalais maka sei laiha osan atu selu salariu, vensimentu, pensoens, garante funsionamentu hospitais no sentru saúde, asegura funsionamentu eskola, selu forsa no seguransa, garante kombustivel ba eletrisidade iha Timor laran tomak no sei la bele asegura funsionamentu Portu no Aeroportu sira.

Nune’e bankada AMP konsidera, bainhira mosu akontesimentu hirak ne’e, kulpa Xefi Estadu nian.

Deputandu PLP ne’e deklara tan, sei la apoia planu Prezidente Repúblika atu ba Portugal, tanba konsidera laiha sentidu, tanba formasaun VIII Governu sei pendent hela, xefi Estadu atu sai ba rai liur, lahanesan prosesu formasaun VII Governu iha tinan 2017 ne’ebé Xefi Estadu rasik deside kansela nia dezlokasaun ba Nova Yorke hodi partisipa asembleia jeral ONU nian, razaun tanba sei akompanha formasaun Governu no atu fó lalais posse ba membru VII Governu.

Hatan ba preokupasaun ne’e, Vise Prezidente bankada FRETILIN, Francisco Branco, hateten, desizaun Xefi Estadu nian ne’e, hanesan kriteriu ida ás tebes, hodi ezije honestidade no integridade husi ukun nain sira, atu labele hamosu dúvidas ba povu.

Lee hotu :   Alkatiri garante Fretilin manan mutlak iha EA

“Ukun nain sira ne’ebé atu kaer ukun, tenke moos no loos, husi deskonfia  ba kazu ruma, hodi hatudu duni integridade no dignidade Estadu nian, la’os segredu ba ita hotu, katak korupsaun iha tinan ikus ne’e aumenta maka’as tebes, maske iha rezultandu di’ak iha tinan sira ikus liu ne’e, minoria ne’ebé koresponde ba Dr. Rui Araujo no Marí Alkatari nian. Ita-nia país kontinua nafatin hanesan país ne’ebé korupsaun, kontinua koloka difikuldade hodi tahan iha kresimentu, tanba ne’e ita presiza duni fó sinal di’ak ba mundu, desizaun ne’e hatudu integridade nasaun no Estadu nian, dignidade governu ne’e rasik, hodi hetan konfiansa ba povu no investidor sira,”dehan Branco.

Deputadu Francisco Branco argumenta tan, governante sira tenke tau honestidade no integridade ás liu, bainhira kaer ukun deside distinu povu no nasaun nian.

Polítiku ne’e dehan tan, tuir loloos ema hotu fó apoiu ba desizaun Prezidente Repúblika, tanba Xefi Estadu la kesitona prejunsaun inosensia, la halo intervensaun ba kompetensia Tribunal nian, maibe Prezidente Repúblika defende de’it katak, atu sai ukun nian tenke moos no honestu, atu bele servi ho di’ak liu tan povu no nasaun.

Tanba Timor-Leste iha ona esperiensia, kona-ba eis ministra ida ne’ebé halai ses husi nia responsabilidade ba nasaun seluk, hafoin kómete sala.

Alende ne’e, deputadu Bankada FRETILIN, Antonino Bianco mós esklarese tan, formasaun VIII Governu tarde ka falla, la’os Prezidente Repúblika nia kulpa, maibe VIII Governu mak laiha kapasidade hodi nomeia ka deside kandidatu foun membru VIII Governu.

La aprova vizita Estadu ba Portugal

Reprezentante povu iha uma fukun Parlamentu Nasional (PN) ne’ebé fó apoiu ba VIII Governu, Segunda (9/7/18), desidi kansela planu vizita Estadu Prezidente Repúblika (PR), Francisco Guterres ‘Lú Olo’, ba Portugal, ho rajaun hakarak rezolve uluk lai impase polítika iha rai laran maka foin bele halo vizita Estadu ba nasaun seluk.

Lee hotu :   Diskusaun OR hatudu Governu nia inkompetensia ''FDN apoia BOAMP salva K-RDTL''

Reprezentante povu ne’ebé fó apoiu ba VIII Governu ne’e mak hanesan, CNRT, PLP, KHUNTO no UDT/Frente-mudança desidi liu husi votasaun no rezultadu votasaun rezulta, maioria reprezentante povu iha fukun PN hili kansela viajen PR Lú Olo, ba Portugal, liu husi votasaun kontra 35, a favor 29, no abstensaun 0.

“Ho rezultadu votasaun iha PN Prezidente PN, Arão Noe públika sai iha uma fukun katak votus a favor 29, vota kontra 35 no abstensaun 0, nune’e Prezidente PN, Arão Noe hato’o sentimentu ba desloksaun PR Lú Olo, katak PN la autoriza,” Prezidente PN, Arão Noe Amaral, liu husi ninia deklarasaun ne’ebé nia halo iha uma fukun PN, Díli, Segunda (09-07-2018).

Entretantu antes tama ba votasaun liu husi intervensaun husi Bankada FRETILIN, PD no PUDD kontinua fó apoiu ba deslokasaun Xefi Estadu ninian ba Portugal, tanba ho razaun ida katak kestaun dignidade nasaun no kestaun lasu amizade entre Timor-Leste ho nasaun Portugal.

Maibé deputadu bankada apoiu Governu la aseita atu Xefi Estadu hala’o vizita Estadu ba Portugal, tanba kestaun impase polítika iha rai laran seidauk normal ou hakarak rezolve uluk lai maka situasaun iha rai laran.

Iha vizita Estadu entre delegasaun Timor-Leste ho Portugal ne’e Xefi Estadu, Francisco Guterres ‘Lú Olo’ sei asina akordu intendimentu ida ho portugal, hodi reforsa kooperasaun iha área edukasaun, liu-liu kapasitasaun ba profesor no Diretor eskola Timoroan sira iha Portugal.

Enterantu iha plenaria horiseik (9/7) ne’e PN konsege hili mós membru ba Grupu Nasional Asembleia ba Parlamentar CPLP nain 12, efetivu nain 6 no suplente nain 6, ho votus a favor 61, kontra 0, Abstensaun no nulu 0. Iha plenaria ne’e mós PN konsege hili mós membru ba Uniaun Inter Parlamentar nain  4 ho votos a favor 63, kontra 0, Abstensaun 1 no votu nulu 0. Say/Ves

Add to Comments Here!!!!

error: Content is protected.
Secured By miniOrange
You might also like:
Jornal Semanário GMNTV Edisaun 08 Jullu 2018

Mundu ho Tétun GMNTV 07 Jullu 2018

SEIDAUK URJENSIA SOSA TAN PRADO FOUN BA PN

Sosiedade Sivil husu ba reprezentante povu...

Close