JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Governu esforsu ezekuta OJE ho rigor “FRETILIN konsidera OJE laiha balansu”

Governu esforsu ezekuta OJE ho rigor “FRETILIN konsidera OJE laiha balansu”

Primeiru Ministru (PM), Taur Matan Ruak, kompromete, hamutuk ho VIII Governu sei esforsu maka’as atu ezekuta Orsamentu Jeral Estadu (OJE) 2018 ho detalla no rigor ba nesesidade ne’ebé nesesitariu atu responde situasaun ne’ebé nasaun no povu infrenta.

“Ami iha konfiansa katak, ami sei implementa hotu OJE 2018, sé ita haree ita-nia istoria ezekusaun orsamental 90 itall porsentu diak ona, mínimu liu, dalaruma iha 80 itall porsentu de’it, tanba ne’e maka ami halo esforsu para ezekuta orsamentu ne’ebé aprezenta, tanba sé haree di-diak iha detallu sira barak que sei ba ita-nia kompromisu sira,”PM Taur liu husi nia resposta ba intervensaun polítika ne’ebé deputadu bankada opozisaun sira hato’o liu husi plenaria OJE 2018, iha Parlamentu Nasional (PN), Tersa (28-08-2018).

Nia esplika, orsamentu ne’ebé maka Governu aprezenta ne’e nia baze ba nesesidade ne’ebé presiza hetan solusaun no rezolve, maibé orsamentu refere sei bele diskuti, hanesan karik hakarak ko’a, atu ko’a iha ne’ebé no karik hakarak aumenta, atu aumenta iha ne’ebé.

“Governu mós antes aprezenta orsamentu haree mós kapasidade ezekusaun ninian, por outro lado nesesidade no kompromisu ne’ebé ita iha, hakarak ka lakohi tenki selu. Sé ita la selu ne’e ita adia de’it solusaun ba problema ida,” haktuir PM Taur.

Xefi Governu ne’e mos deklara, VIII Governu nia kompromisu maka oinsa poupa no investe OJE 2018 iha área ne’ebé maka importante, atu bele hetan rezultadu iha aban-bainrua.

”Sé ba OJE 2019 nian, ami sei husu apoiu PN para ajuda Governu ko’a iha ida ne’ebé tenki ko’a, para reduz gastus ne’ebé supérfluo, agora Governu iha kapasidade atu ezekuta orsamentu ne’e ka la’e, orsamentu ne’ebé maka ami aprezenta natoon loos ba buat ne’ebé ita tenki atende, ida para sustenta mákina Estadu no ida seluk selu ita-nia kompromisu sira,” relata PM Taur.

Husi sorin seluk, deputadu bankada opozisaun FRETILIN, Antoninho Bianco, sujere ba PM Taur, atu jere OJE 2018 ne’e ho di-diak, atu nune’e bele kobre ba atividade ne’ebé nesesariu duni atu responde, tanba OJE 2018 ne’e ninia reseitas ki’ik liu despezas.

Lee hotu :   MEUJTIL konsidera ukun na’in lakon sentidu Estadu

“Husi estrutura orsamentu ne’e ita-nia reseitas kiik liu do que despezas, tanba orsamentu ne’e deficit liga ho montante atu mai foti osan ne’e, ha’u la liga ho petroleu, karik petroleu laiha reseitas la sufisiente atu lori dezenvolvimentu, ne’ebé reseitas kiik liu husi despezas,”relata Antoninho Bianco.

Entretantu tuir giaun debate OJE 2018 iha jeneralidade hahú husi loron 27-29 Agostu, espesialidade sei realiza iha loron 31 Agostu no loron 3-6 Setembru, tinan ne’e.

FRETILIN konsidera OJE 2018 laiha balansu

Nune’e mos, deputadu Parlamentu Nasionál (PN) husi bankada opozisaun FRETILIN, Maria Ângelica Rangel, konsidera, Orsamentu Jeral Estadu (OJE) ba tinan 2018 nia kategoria sira laiha balansu ba kapital umanu ho infraestrutura nian.

“Iha kategoria kapital sira ne’e hotu, ita haré katak laiha balansu orsamentu ho fundu infra-estrutura, tanba iha salariu vensimentu ita gasta ona husi 2006 to’o agora billiaun US$1,7, bens servisu husi 2006 to’o agora ita gasta ona billiaun US$4, kapital menor ita gasta ona millaun US$438, kapital dezenvolvimentu ita gasta ona billiaun US$2, no transferénsia públika ita gasta ona billiaun US$3, inklui fundu infra-estrutura ita gasta ona billiaun US$4, no ki’ik liu iha fundu dezenvolvimentu kapital humanu ho montante millaun US$271, haree husi rúbrika sira ne’ebé ha’u síta, katak nasaun ne’e presiza duni atu investe barak liu iha infra-estrutura no kapital umanu,”hateten deputada FRETILIN ne’e iha diskusaun faze jeneralidade, Tersa (28/08/2018), iha PN.

Tuir deputada FRETILIN ne’e, alokasaun orsamentu ne’ebé laiha balansu tanba inklina interese ne’ebé barak.

“Orsamentu sira ne’e ha’u dehan laiha balansu, tanba iha interesse barak mak tau iha ne’eba, ne’e mak osan sira ne’e ita gasta de’it, tanba ne’e iha bens servisu sa’e kuaze 6,7%, tanba kategoria ne’e hanesan orsamentu ne’ebé mak ita uza no depois hotu de’it,”dehan deputada Maria.

Maria afirma tan, despeza ba tinan 2018 sei hamosu dúvida ba deputadu opozisaun FRETILIN, atu bele iha ezekusaun ne’ebé kualidade.

“Haree ba despeza 2018 nian, hatudu katak ita gasta ona US$400 mil iha saldo ne’ebé mak agora iha, atu gasta tan ba períodu fulan 4 nia laran, ne’ebé mak millaun US$696.6, ne’e hatudu momos katak, dentru tempu ida badak ne’e, governu iha kapasidade atu bele ezekuta ho kualidade kalae?, ida ne’e kestionável ba ami hanesan bankada opozisaun, tetu husi orsamentu ne’ebé mak billiaun US$1,2, atu gasta iha tinan ida ne’e nia laran ho períodu ne’ebé badak, kestionável tebes, tanba tau iha saúde 3%, tau iha edukasuan ne’ebé mak ita hotu haree nu’udar kestaun importante mak 5,9% de’it, át liu tan mak tau iha área agrikultura ne’ebé atu substitui ita nia mina-rai atu maran iha período badak, ne’ebé mak ita seidauk hetan estudu inserteja ida, ita bo’ot sira (VIII Governu_red) tau 0,56%, hanesan bankada opozisaun triste tebes, tanba área ida agrikultura ne’e, atu substitui no atu fó reseitas imediata ba povu, nune’e ita nia povu ne’e bele moris iha agrikultura ne’ebé ho kualidade ás,”katak Rangel.

Lee hotu :   Taur: Ukun nain labele hanoin de’it tau osan ba bolsu

Alende ne’e, deputadu bankada CNRT, Adérito Hugo da Costa, dehan, iha OJE bens servisu ho pursentu bo’ot, tanba kuaze tinan 2 ona empreza sira to’o atu haluha tiha nia deve ba governu tanba laiha orsamentu ba kategoria bens servisu nian.

“Ohin loron husi aprezentasaun orsamentu ne’e, ha’u haree netik, kuaze tinan 2, ami la halo audiénsia ba Orsamentu Jeral Estadu, dezde Dezembru 2016, kuaze ami haluha tiha orsamentu rúbrika halo nusa? no item kuaze haluha hotu, hanesan mós emprezariu sira ne’ebé Governu deve hela, sira haluha tiha sira-nia montante osan hira mak Governu deve hela, tanba osan bens servisu laiha, inklui kapital menor, kapital dezenvolvimentu mós laiha, ne’ebé tinan-tinan Governu ida kria aprezentasaun provoka dezenvolvimentu ekonomia nasaun nian, liu hosi OJE nian,”afirma Adérito Hugo.

Eis Prezidente Parlamentu ne’e hateten, iha aprezentasaun OJE 2018 ne’ebé kontinua laiha balansu entre despezas ho reseitas despezas, nu’udar difikuldade ne’ebé kada tinan Estadu hasoru.

“Ha’u ho surpreza tebes, kuandu haree Orsamentu Jeral Estadu 2018 ne’e aprezenta estatístika ba balansu entre reseitas ho despezas nafatin laiha mudansa, mehi ida furak no ambisiozu tebes iha 2015 no 2016, hanoin katak mais ou menus ita iha reseitas doméstika ne’e kategoria bens servisu no salariu vensimentu ne’e bele atinji ona millaun US$200, maibe ha’u haree husi situasaun atual agora, karik tanba krize inventadu sira ne’ebé ita provoka halo tiha ita-nia estimasaun reseitas doméstika atu ultrapassa millaun US$200 para bele kobre ona selu ba salariu vensimentu kada tinan ne’ebé millaun US$200 ital, maibe ita lakonsege. Kada tinan ita-nia despeza Estadu nian sempre iha difisil, proposta OJE tinan ne’e hatudu dala ida tan, difisil nafatin, kontrariu ho nasaun ne’ebé la depende ona ba investimentu públiku, maibe depende de’it ba investimentu setór privadu nian,”dehan Hugo.

Lee hotu :   Komemora loron 30 Agostu, PN kongratula Povu no veteranu TL

Deputadu apoiu governamental ne’e garante, iha aprezentasaun OJE 2019 bele iha ona balansu entre depsezas ho reseitas, maske la’os milagre.

“Ha’u hein katak proposta OJE 2019, hatudu ona balansu entre reseitas no despezas, ne’e ita halo milagre, maibe ha’u hein katak Primeiru Ministru aprezenta OJE hanesan dadauk agora ne’e, ne’ebé hatete buat loloos, hatudu inisiativa atu halo oinsa dezenvolve setór privadu nasionál ho internasional, nune’e bele hasa’e ita-nia reseitas doméstikas,”Hugo garante.

Enkuantu iha proposta OJE 2018, Governu aloka ba salariu vensimentu millaun US$200.3, Bens Servisu millaun US$397.8, Transferensia públikas millaun US$261.9, Kapital menor millaun US$3.7 no kapital dezenvolvimentu inklui emprestimu millaun US$330.4.

Diskusaun Orsamentu Jeral Estadu ba tinan 2018 ne’e, hahú ona diskute iha jeneralidade iha loron 27, fulan ne’e, no sei remata ho votasaun iha final global iha loron 7, fulan Setembru, tinan ne’e.

Entretantu Primeiru Ministru (PM), Taur Matan Ruak, hatete, OJE 2018 ne’e hodi atende saida mak nasaun presiza.

“Orsamentu ne’ebé maka ami aprezenta natoon loos ba buat ne’ebé ita tenki atende, ida para sustenta mákina Estadu no ida seluk selu ita-nia kompromisu sira,”dehan PM Taur iha nia intervensaun ba plenaria.Ves/Say

Add to Comments Here!!!!

error: Content is protected.
Secured By miniOrange
You might also like:
Tribunal Câmara de Contas seidauk finaliza auditoria ba ZEESM

Tribunal câmara de contas seidauk finaliza...

Espesialista matan Australia fo tratamentu gratuita ba pasiente TL

Xefi Departementu Oftalmologia, Hospital Nacional Guido...

Governu sei estabelese Jardim Infantil 26 iha TL

VIII Governu Konstitusional sei estabelese tan...

Close