JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Lakohi sosa asaun ConocoPhillips-Shell, Xanana: Dehan ba imi nia prezidente veta tiha OJE

Lakohi sosa asaun ConocoPhillips-Shell, Xanana: Dehan ba imi nia prezidente veta tiha OJE

Reprezentante espesiál Governu Timor-Leste ba asuntu petróleu, Kay Rala Xanana Gusmão, hatete, deputadu bankada opozisaun FRETILIN lakohi atu Timor-Leste sosa asaun husi kompañia ConocoPhillips ho Shell hamutuk millaun USD 650, dehan ba imi nia Prezidente Repúblika (PR), Francisco Guterres ‘Lú Olo’ atu veta tiha Orsamentu Jeral Estadu (OJE) 2019 ne’e.
Durante ne’e, deputadu opozisaun sira eziji atu Governu nia reprezentante espesial Xanana Gusmão, atu esplika prosesu sosa asaun ConocoPhillips no Shell atu deputadu sira intende, maibe Xanana ho VIII Governu ba halo aprezentasaun detallada iha Parlamentu Nasional, nafatin hetan krítika husi deputadu FRETILIN, maske deputadu FRETILIN balun konvensidu. Tanba ne’e, Xanana ladun konkorda ho polítika deputadu opozisaun FRETILIN nian, nune’e Xanana ameasa atu kansela tiha sosa asaun husi ConocoPhillips ho Shell nian.

“Hakarak uza kestoens téknika, uza ba, hakarak polítika, ha’u tur iha ne’e ita hakilar malu. Deskulpa ita la’os mai atu halimar. Ha’u la’os ba perde tempu atu halimar. Hanesan uluk mos ha’u dehan, ha’u defende interese nasionál ne’e mak ha’u aguenta tur hamutuk ho imi (Deputadu sira). Ne’ebé ita bo’ot sira mak ne’e, tau iha orsamentu, se ilegal dehan ba imi-nia Prezidente (Francisco Guterres ‘Lú Olo’) veta (OJE), prontu ita lalikan sosa, laiha problema, laiha problema, aban kedas (Horiseik) ha’u hakerek surat ba ConocoPhillips ho Shell, imi fa’an ba ema seluk, deskulpa. Se ita hakarak interese nasionál ita hanoin ba saida mak atu narsa”,dehan Xanana Gusmão, ho nia ekipa iha aprezentasaun kona-ba sosa asaun ConocoPhillips ho Shell, iha PN, Tersa (08-01-2019).

Tuir Xanana Gusmão, nia koñese mos deputadu sira ne’ebé veteranu ona iha Parlamentu Nasionál ne’e.
“Ha’u la’os primeira vez mak mai iha ne’e (Parlamentu Nasional), ha’u laos primeira vez mak hasoru ita bo’ot sira balun ne’ebé veteranu ona iha ne’e. Ne’ebé bele deit husu deskulpa ba ConocoPhillips ho Shell dehan, imi buka ema seluk fa’an ba, ami lakohi, laiha problema”,fundamentan lider karismátiku Xanana Gusmão ne’e.
Tuir eis Prezidente Repúblika, Xanana Gusmão, katak, se deputadu bankada opozisaun sira liu-liu FRETILIN uza audiénsia ne’e hodi ataka malu, nia mos prontu ataka malu iha Parlamentu Nasionál.
“Se ita atu mai husu maka hanesan ha’u aponta sira ne’e ha’u lee hotu fila fali, eipaa. Ida ne’e laos audiensia, ida ne’e ita atu ataka malu. Se imi hakarak ataka malu, ita ataka malu hotu iha ne’e, tanba ita tenki onestu mos oitoan, se imi hakarak partisipa husu ho diak, laos fali dehan oiiii, oiii, oiiii, ne’eb’e ha’u husu fali imi nia pasadu saida deit, ne’e ita la sai husi ne’e”,dehan Xanana hodi responde ba preokupasaun deputadu FRETILIN nian.
Orsamentu Jeral Estadu ba tinan 2019 ne’e hamutuk billiaun USD 2.1, iha ne’ebé barak liu aposta ba sosa asaun ConocoPhillips no Shell.
Preokupa kustu investimentu dada kadoras
Iha aprezentasaun Xanana Gusmão nian neé, deputadu bankada FRETILIN, Antoninho Bianco, preokupa tebes ho kustu atu halo investimentu dada kadoras mai Timor-Leste, tanba tuir informasaun hateten kustu investimentu atu dada kadoras presiza osan kuaje “billiaun USD 25”.

Lee hotu :   Australia konkorda asina tratadu foun fronteira marítima ho TL

“Kestaun ida ha’u atu koloka ne’e, la’os dehan sei mai ida no ida ne’ebá, maibé kestaun de ekonómikamente ita tenki fó hatene ba malu, tanba kustu investimentu ho total loloos ha’u rona bele porvolta billiaun USD 25 no balun dehan billiaun USD 20, sé hanesan ne’e ha’u mós dúvidas, ita nia osan iha ne’ebé, ita nia osan billiaun USD 17 ita sei uza suporta tinan-tinan ba OJE”,deputadu bankada FRETILIN ne’e liu husi ninia intervensaun liu husi audensia ho ekipa reprezentante espesiál Governu Timor-Leste ba asuntu petroleu, Kay Rala Xanana Gusmão, iha PN.

Nia esplika, buat ida upstream no downstream, ne’e buat tékniku, maibé sé Timor-Leste hakarak halo investimentu, pelumenus reprezentante povu iha PN tenki hatene, tanba kustu ne’ebé uza atu investe ne’e osan povu nian.

“Ami sei dúvidas, ita osan naton de’it para atu bele halo buat ne’e ba oin, ha’u garante katak ita sustentabilidade ba Estadu ne’e mai husi FP, sé ida ne’e laiha, ita atu hetan osan husi ne’ebé, porque kuandu imi esklarese mai ita, ha’u hanoin ne’e katak wainhira ita hamutuk sei bele, ha’u dúvidas no tauk ita nia fundu soberani hotu, ita laiha tan fundu ida atu hatama”, haktuir Antoninho Bianco.

Hatán ba preokupasaun ne’e, reprezentante espesial, Kay Rala Xanana Gusmão, hateten, Governu sei la hasa’i osan husi fundu petrolíferu no fundu soberanu nasaun ninian sei la hotu, tanba investimetnu ne’e sei hatama lukru ba nasaun.

Antes ne’e, iha tinan kotuk reprezentante espesial Governu ba asuntu petroleu, Kay Rala Xanana Gusmão halo ona akordo ho kompañia ConocoPhillips atu sosa asaun ho montante orsamentu millaun USD 350 no mós husi kompania Shell ninian ho montante orsamentu millaun USD 300.tos/ves

Add to Comments Here!!!!

error: Content is protected.
Secured By miniOrange
You might also like:
JORNAL AS 12 GMNTV, Loron-8 Fulan-Janeiro Tinan-2019

JORNAL NACIONAL GMNTV KALAN, Loron-7 Fulan-janeiro Tinan-2018

ULTIMA HORA GMNTV, Loron-8 Fulan-Janeiro Tinan-2019

Close