JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR Lú Olo veta ona OJE 2019, Jurista Avelino Coelho: Bele ba eleisaun antesipada

PR Lú Olo veta ona OJE 2019, Jurista Avelino Coelho: Bele ba eleisaun antesipada

Prezidenti Repúblika (PR), Francisco Guterres ‘Lú Olo’ veta ona Orsamentu Jeral Estadu (OJE) 2019 ho montante billiaun USD 2.1 no husu ba Parlamentu Nasionál (PN) atu halo fali apresiasaun ba OJE refere.

Ho veto ne’ebé PR Lú Olo halo ba OJE 2019 ne’e, tuir jurista Avelino Coelho, katak, Timor-Leste bele ba eleisaun antesipada. Tanba atu konfirma votu iha Parlamentu Nasionál presiza 2/3 deputadu ka tenki iha 43 deputadu prezensa.

Hatán kona-ba pergunta bele ka lae ba eleisaun antesipada? Avelino hatán bele. “Bele. Orsamentu Jeral Estadu la promulgadu, konsekeuensia mak disolusaun Parlamentu Nasionál, se disolusaun Parlamentu Nasionál ne’e, nia konsekuensia mak ba Eleisaun Antesipada”,dehan jurista Avelino Coelho iha estudio GMN TV, Bebora, Díli, Kuarta (23/1/19), bainhira husu nia hanoin kona-ba bele ka lae ba eleisaun antesipada.

Maibe Avelino dehan, sera que nesesáriu eleisaun antisipada dala ida tan, maibe kuandu laiha konsertasaun kada bankada, konsekuensia mak ba Eleisaun antesipada.

Iha loron 24 Dezembru 2019, Prezidénsia Repúblika simu hosi Parlamentu Nasional, Dekretu Parlamentu Nasional nº 4/V – Orsamentu Jeral Estadu 2019, liuhosi ofísiu hosi Señor Prezidente Parlamentu Nasional, ho referénsia 201/GPPN/XI/2018.

Tinan ida ne’e, Parlamentu Nasionál aprova Orsamentu Jeral Estadu ida ne’ebé boot liu Orsamentu hotu-hotu ita iha to’o ohin loron. Osan atu gasta iha 2019 hamutuk dólar amerikanu billaun rua no atus ida tolu nulu resin rua (2. 132 millaun).

OGE 2019 liu OGE 2017, pursentu lima nulu resin tolu pontu hitu, (53,7%) no liu OGE 2018, pursentu neen nulu resin neen, pontu sia (66,9%).

Haree ba kbiit sira ne’ebé Konstituisaun Repúblika fó, liu hosi alínea a) artigu 85º no númeru 1, artigu 88º, Prezidente Repúblika deside veta Dekretu nº 4/V hosi Parlamento Nacional – Orçamento Geral  Estadu ba 2019, liuhosi nensájen fundamentada ba Parlamentu Nasionál, iha 23 Janeiru 2019.

Lee hotu :   Xanana Gusmão hato’o parabens ba Taur

Iha mensájen ne’e, Prezidente Repúblika haklaken kona-ba ninia desizaun veta ho kbiit hosi Konstituisaun Repúblika, liuhosi artigu 88, númeru 1.

“Prezidente Repúblika veta tanba, OGE 2019 hamenus liután sustentatibilidade. OGE 2019, ho valór bilaun  rua no atus ida tolu nulu resin rua mosu iha ita-nia  istória polítika fiskál nu’udar orsamentu aas liu,” deklara, Chefe Casa Civil, Francisco Maria de Vasconcelos, hodi fo sai desizaun Prezidenti Repúblika ba OJE 2019, ne’ebe mak hala’o iha Palasio Prezidensial, Kuarta (23/01/2019).

Francisco Maria de Vasconcelos hatutan katak Valór aas tebtebes ne’e signifika defísit orsamentál mós aas tebtebes katak Estadu tenke foti osan tan atu kompleta Orsamentu ne’e.Tanba la iha fonte seluk atu hatama osan ba Orsamentu ne’e, Estadu tenke foti hodi biit osan liután hosi Fundu Minarai.

Ba OGE 2019, Dekretu Parlamentu Nasionál husu atu foti tan pursentu atus rua haat nulu resin sia (249%),  liu dook Rendimentu Sustentável Estimadu Fundu Minarai nian. Tuir lolos hasai de’it dólar amerikanu millaun atus lima rua nulu resin sira, ka pursentu tolu, hosi Fundu Minarai, ne’ebé  hanesan sasukat ka kalkula tinan-tinan.

Maibé ita labele haluha katak presu mina iha merkadu mundiál mós tun dadaun ona no osan ne’ebé tama iha Fundu Minarai mós tun dadaun ona.

Ita mós hatene katak volume minarai hosi kampu Bayu-Undan mós tun dadaun ona no sei tun babeibeik. Bayu-Undan sei maran loron ruma no osan sei la tama tan husi kampu mina ne’e.Fundu ne’e labele sai sustentável bainhira Estadu hasai osan barak beibeik, liu RSE hosi Fundu Minarai.

Ho ritmu transferénsia hanesan ne’e, ita sei hamamuk Fundu ne’e lalais liu, no ita nia osan ne’e sei mohu iha tempu badak.

Lee hotu :   AMP la rejistu iha TR ''Arão Noe: Kumpri regras legal

Governu rasik fó-sai dadus katak seidauk hetan alternativa finansiamentu hosi rekursu minarai foun seluk. Biar Governu fó-sai estimativa  ida ne’e, Governu la foti medidas atu kaer metin sustentatibilidade finanseira.

OGE 2019 la  hatuir Konstituisaun no lei estruturante sira. Haree ba politika ekonómika no finanseira temi iha leten,  OGE 2019, la hatuir regras no prinsípius Konstituuisaun RDTL no lei sira ne’ebé fó dalan ba dezenvolvimentu, hanesan rezerva finanseira obrigatória, unidade orsamentál no investimentu ne’ebé justifika hetan tranferénsia direta hosi Fundu Minarai.

Proposta OGE 2019 mós la hatuir Programa Governu ne’ebé aprova hosi Parlamentu Nasional kona-ba diversifikasaun ekonómika no harii empregu no tau prioridade atu investe iha kapitál sosiál, ita-nia ema nu’udar rekursu boot liu,  no dezenvolvimentu ekonómiku.

Dezekilíbriu Orsamentál aas tebtebes. Alokasaun orsamental sira ladún fó benefísiu ba sidadaun sira. Osan boot liu katak pur sentu tolu nulu resin rua (32%) ka tersu ida (1/3) hosi OGE aloka ba sosa patrimóniu hosi kompañia  estranjeira mina nian.

Pursentu sanulu de’it (10%)  mak fahe ba edukasaun no formasaun profisionál, saúde, agrikultura no turismu.  Hosi pursentu sanulu ne’e (10%), pursentu ida (1%)tau ba agrikultura, maisounenus pursentu neen (6%) ba sektor edukasaun no pursentu tolu (3%) ba sektor saúde no pursentu zero pontu lima nulu resin hat (0.54%) tau ba turismu. Valor kiik ne’e labele satisfáz nesesidades iha área servisus sosiais no la fó dalan ba kreximentu ekonómiku iha área sira ne’e.

La iha polítika alternativa. OGE 2019 la hatudu polítika alternativa finansiamentu ne’ebé bele konvense katak, biar la’ós sustentável, ita bele lao ba oin, no iha prazu badak no médiu, ita bele hala’o dezenvolvimentu sustentável no Estadu sei la tama iha falénsia finanseira ka fiskal cliff no mosu fenómenu ne’ebé baibain ema bolu “maldisaun rekursus nian”.

Lee hotu :   PN sosa duni kareta foun ba deputadu

Ho kbiit Konstituisaun Repúblika nian, Prezidente Repúblika hala’o ninia direitu veta Dekretu Parlamentu Nasional nº 4/V – Orsamentu Jeral Estadu 2019, no liuhosi mensajen fundamentada, husu ba Parlamentu Nasionál atu tetu fila fali Dekretu ne’e ho hanoin katak ita tenke uza ho di’ak rekursu finanseiru sira ne’ebé pertense ba Estadu no Povu Timor-Leste.

Bainhira uza rekursu sira ne’e liuhosi dalan justu, ekilibradu, sustentável no efisiente liután mak ita bele satisfás nesesidades loronloron Povu nian no fó dalan ba kreximentu no dezenvolvimentu nasionál, no garante sustentabilidade ba ita nia ekonomia hodi fó moris di’ak ba ita nia oan no bei-oan sira iha futuru. Eus

Add to Comments Here!!!!

error: Content is protected.
Secured By miniOrange
You might also like:
JORNAL AS 12 GMNTV, Loron-23 Fulan-Janeiru Tinan-2019

o Programa Haburas Vida Espiritual GMNTV episódio 59 na versão em Português

JORNAL NACIONAL GMNTV KALAN, Loron-22 Fulan-Janeiru Tinan-2019

Close