JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PR estuda hela alterasaun pakote LAP-LFP ■Alkatiri: PR sei la veta tratadu tasi Timor

PR estuda hela alterasaun pakote LAP-LFP ■Alkatiri: PR sei la veta tratadu tasi Timor

Prezidente Repúblika (PR), Francisco Guterres ‘Lú Olo’, hatete, nia estuda hela alterasaun pakote Lei Atividade Petrolífera (LAP) no Lei Fundu Petrolíferu (LFP) antes desidi veta ka promulga.    

Xefe Estadu nu’udar mós komandante supremu forsa armada, Francisco Guterres ‘Lú Olo’ hato’o lia hirak ne’e ba jornalista sira hafoin partisipa seremónia komemorasaun aniversáriu loron Forças Armadas de Libertação Nacional de Timor-Leste (FALINTIL) ba dala 44, iha Kuartel Jenerál F-FDTL Fatuhada, Díli, Tersa (20/08/2019).

Xefe Estadu nu’udar eis gerileiru ne’e esplika katak, pakote lei atu ajusta ba ratifikasaun fronteira marítima, nia sei estuda ida por ida antes foti desizaun veta ka promulga hodi tama iha vigór.

Enkuantu lei rua, konaba fundu petrolífelu no atividade petrolíferu, Prezidente Repúblika husu fiskalizasaun preventiva konstitusionalidade, tanba ne’e haruka ona ba Tribunal Rekusu atu hetan apresiasaun.

“Sim! pakote de lei ne’e sei iha ne’ebá, maibe Prezidente Repúblika sei estuda hela nafatin ida por ida, ne’ebé prontu iha tempu ne’ebé mak kuandu to’o, naturalmente Prezidente Repúblika sei hola desizaun konaba lei sira ne’e, idak-idak. Lei rua, fundu petrolíferu ho atividade petrilífera, hanesan ema hotu rona ona katak, Prezidente Repúblika husu fiskalizasaun preventiva ba konstitusionalidade lei rua ne’e, e haruka tiha ona ba tribunál rekursu para atu halo apresiasaun,” hateten Prezidente Repúblika Francisco Guterres ‘Lú Olo’.

Enkuantu Parlamentu Nasionál (PN) responde ona notifikasaun husi Tribunal Rekursu (TR) kona-bá Lei Atividade Petrolífera (LAP) no Lei Fundu Petrolíferu (LFP) ne’ebé Tribunal Rekursu haruka ba PN iha Sesta-Feira semana kotuk.

Hafoin Prezidente Repúblika (PR) Francisco Guterres Lú Olo husu Tribunal Rekursu halo fiskalizasaun abstrata ba alterasaun Lei Atividade Petrolíferu ho Lei Fundu Petrolíferu ne’e.

Alkatiri: PR sei la veta tratadu tasi Timor

Sekretáriu Jerál Partidu FRETILIN, Marí Alkatiri, hateten, kona-ba tratadu tasi Timor, Prezidente Repúblika (PR), Francisco Guterres Lú Olo, sei la veta ka promulga, maibé diretamente publika deit.

Lee hotu :   Governu laiha kompetensia altera lei ■Branco:Ne’e la’os lei

Sekretáriu Jerál Partidu FRETILIN nnu’udar mos fundadór Estadu, Marí Alkatiri, informa kestaun ne’e hafoin partisipa seremonia komemorasaun aniversáriu loron Forsas Armadas de Libertação Nacional de Timor-Leste (FALINTIL) ba dala 44, iha Kuartel Jenerál F-FDTL Fatuhada, Díli, Tersa (20/08/2019).

Marí Alkatiri, hateten, tratadu tasi Timor labele iha veta husi Prezidente Repúblika (PR), Francisco Guterres Lú Olo, maibe tenki foti desizaun hodi publika deit.

“Labele! pakote lei ne’e buat ida, e tratadu Timor ne’e buat seluk. Tratadu Timor labele iha veta, e pakote lei ne’e hein Prezidente Repúblika haruka ona ba Tribunal Rekursu e agora ita hein deit. Ita koalia atu halo saida? atu influensia Tribunal ka influensia Prezidente? Tratado mar de Timor ne’e laiha promulgasaun, e ne’e publikasaun deit, e Prezidente laiha dalan seluk e tenke fó desizaun para atu publika,” hateten Sekjer Partidu FRETILIN, Marí Alkatiri.

PN responde ona notifikasaun TR kona-ba LAP ho LFP

Antes ne’e, Parlamentu Nasionál (PN) responde ona notifikasaun husi Tribunal Rekursu (TR) kona-ba Lei Atividade Petrolífera (LAP) no Lei Fundu Petrolíferu (LFP), ne’ebé TR haruka ba PN iha Sesta semana kotuk, hafoin Prezidente Repúblika (PR), Francisco Guterres Lú Olo, husu TR halo fiskalizasaun abstrata ba alterasaun LAP no LFP ne’e.

“Tuir lolos, TR fó mai PN loron 5, maibé se konta loron lima ne’e nia efetivu, Kinta oin mak sei remata maibé, ami haree katak, lei ne’e importante tebes, liga troka notas ne’ebé mak Timor-Leste ho Australia atu halo, haree mós ba interese nasionál. Tanba ne’e mak, Parlamentu Nasional iha Sábadu no Domingu  mós, kontinua servisu maka’as, para prepara resposta, ohin (Segunda) dadersan, ami halo revizaun haree hamutuk, prontu ona, orsida lorokraik tuku 016:00 ou tarde liu tuku 17:00 Otl, ami lori ona ba TR”, informa PPN, Arão Noe de Jesus Amaral ba jornalista iha PN, Segunda(19/08/2019) ne’e.

Arão Noe afirma, PN responde ho desizaun ne’ebé nafatin katak, laiha inkonstitusionalidade ruma, husi alterasaun ba lei rua ne’e, no konsidera rekursu ne’ebé Xefe Estadu hatama, argumentu polítiku, la’os jurídiku.

Lee hotu :   CNE-ParPol verifika kalendáriu kampaña

“Parlamentu Nasional responde klarifika de’it,  tanba sa mak aprova lei sira ne’e, nia objetivu saida, iha violasaun konstituionalidade ka la’e, maibé tuir ami nia haree laiha violasaun ida, maibe kabe ba TR mak sei deside,maibé tuir Parlamentu  nia analiza, durante loron rua, haree ba rekursu ne’ebé Prezidente Repúblika haruka ba TR, no notifikasaun mai ami, argumentu sira ne’e barak liu, argumentu polítiku, la’os juridiku”, haktuir PPN ne’e.

Arão Noe mós garante, órgaun Parlamentu Nasional sei foti desizaun ba pakote lei ne’e, iha tempu badak no ho interese Estadu nian, tanba tempu ba troka notas entre Timor-Leste, ho Australia besik dadaun ona, nu’udar akordu ida ne’ebé sei realiza iha ámbitu selebrasaun 30 de Agostu tinan ne’e.

“Ami hein katak, órgaun sira seluk, hanesan prokurador jerál da repúblika, ne’ebé hetan mós notifikasaun husi Tribunal, husu mós Tribunal Rekursu, pedidu ne’ebé PR husu mai Tribunal Rekursu, loron 20, sei konta husi dia 15 de Agostu ba to’o 30 de Agostu, loron 20 ne’e hotu iha dia 5 de Setembru katak, liu tiha loron lima husi tárjetu ne’ebé mak iha, tanba ne’e mak ami halo ho másimu, para atu bele aselera, nune’e fó tempu ba Tribunal Rekursu, iha tempu sufisiente para halo desizaun. Ami hein katak, molok 30 de Agostu, Tribunal Rekursu bele iha ona desizaun final ida kona-ba lei rua ne’ebé PR husu atu halo apresiasaun ba nia konstitusionalidade”, hateten Arão Noe.

Eis Vise Prezidente komisaun A ne’e haktuir, iha rekursu ne’ebé Xefe Estadu haruka ba TR,  tanba konsidera PN viola artigu 39 iha konstituisaun RDTL, ne’ebé ko’alia kona-ba rekursu naturais no rikusoin Timor-Leste nian.

“PR kestiona buat lubuk ida, ne’ebé liga artigu 139 Konstituisaun RDTL nian hateten katak, Parlamentu Nasional viola artigu ida ne’e, maibé artigu ida ne’e, uluk ami halo alterasaun lei LAP Tribunal deklara ona katak, laiha inkonstitusionalidade, tanba ne’e mak ami aprova nafatin, maibé ba dala rua nian, kabe ba Tribunal Rekursu nia desizaun, ita hotu hein de’it desizaun saida mak Tribunal Rekursu atu foti, maibé ami husu para, sasán ne’ebé interese nasionál, buka para atu aselera nia prosesu ne’e, la’os husu aselera para viola, maibé kumpri nafatin regras sira, maibé tenki haree mós ba tempu, tanba dia 30 Agostu atu troka ona notas entre nasaun rua ne’e, importante tebes atu termina ita-nia direitu fundamental Timor ni’an kona-ba delimitasaun Fronteira Maritima (FM), kona-ba rikusoin sira hotu ne’ebé mak iha, depois FM ne’e tama iha vigor, direitu sira ne’e hotu, TL tenki foti, tanba ne’e, lejislasaun ne’e importante tebes”, akresenta Prezidente órgaun lejislador ne’e.

Lee hotu :   AMP sei hametin administrasaun públika

Noe Amaral realsa, PN seidauk iha informasaun ruma, kona-ba lei rua seluk husi pakote lei ne’ebé PN haruka ba Xefe Estadu, hanesan lei tributária ho rejime laboral.

Tuir konstituisaun RDTL artigu 39 iha alinea 1 hateten, rekursu rai leten nian, rai okos nian, bee territoriál, plataforma kontinentál no zona ekonómiku eskluzivu, ne’ebé importante ba ekonomia, ne’e Estadu nia propriedade ne’ebé tenki utiliza iha forma loloos no hanesan de’it ba ema hotu, tuir interese nasionál. No iha alinea 2 hateten, kondisaun atu aproveita rekursu naturál sira-ne’ebé ko’alia iha númeru uluk tenki sai nu’udar rezerva finanseira obrigatóriu, tuir lei.

Nune’e mós alinea 3.ko’alia katak, Aproveitamentu rekursu naturál sira tenke haree didi’ak mós ba ekilíbriu ekolójiku no sees husi destruisaun ba ekosistema sira.

Entretantu, rekursu ne’e, Xefe Estadu haruka ba TR iha Kinta 15 fulan Agostu semana kotuk, no TR haruka ba notifikasaun ba PN iha Sesta loron 16 fulan Agostu ne’e.Ito/say

Add to Comments Here!!!!

error: Content is protected.
Secured By miniOrange
You might also like:
Governu promete fó atensaun ba eis FALINTIL ■Xanana-Horta ‘falta’ iha komemorasaun loron FALINTIL

Primiru Ministru (PM), Taur Matan Ruak,...

Filomeno Paixão: Membru PNTL ho F-FDTL envolve GAM, sai

Ministru Defeza no Interior Interinu, Filomeno...

Komemorasaun loron FALINTIL ba dala 44, Tranzmite valór frente armada ba jerasaun foun

Prezidente Repúblika (PR), Francisco Guterres 'Lú...

Close