TL-RI sei hakotu disputa fronteira iha Oecusse

Ministru Negósiu Estranjeiru no Kooperasaun (MNEK), Dionísio Babo Soares, hateten Timor-Leste ho Repúblika Indonézia (RI) sei hakotu disputa fronteira terrestre iha Oecusse.

Laos ne’e deit, iha futuru sei hadia mos infraestrutura iha fronteira terréstre nian, liu-liu iha fronteira Batugade hodi nune’e bele fasilita sidadaun sira tama sai iha fronteira.

 “Ita nia kestaun fronteira segementu rua iha Oecusse ita tenke rezolve para depois bele dudu ona ita nia markasaun fronteira marítima ho Indonézia,”dehan Ministru Negosius Estranjeirus no Kooperasaun, hafoin hala’o enkontru bilateral ho Vise Prezidente Parlamentu Indonézia, Fadli Zon, ho nia delegasaun, iha Ministériu Negósiu Estranjeiru no kooperasaun Praia dos Coqueiros-Díli, Sesta (13/09/2019).

Diplomata timor-oan ne’e mós informa durante sorumutu asuntu sira ne’ebé diskuti kona mos planu ba futuru mak hadia infraestrutura sira iha fronteira terrêstre batugade nune’e sidadaun Timor Leste bele hakat tama ka sai ho kareta fronteira indonézia.

Iha fatin hanesan, Vise Prezidente Parlamentu Indonézia Fadli Zon esplika asuntu ne’ebé koalia ne’e hanesan servisu uma nian (pekerjaan Rumah-red), ne’ebé seidauk remata liu-liu kona-ba fronteira tasi no rai maran nian, tanba Timor Leste mos públika ona sei lívre husi viza.

“Ami agradese ba esforsu diplomasia ne’ebé mak ministru Dionisio Babo halo hodi hametin liutan lasu amizade entre nasaun rua hodi bele solusiona problema ne’ebé mak sai hanesan servisu uma nian, liu-liu kona-ba fronteira rai maran no tasi nian,” dehan, Vise Prezidente Parlamentu Indonézia ne’e.

Fadli Zon agradese ba Governu Timor Leste ne’ebé públika ona livre viza, ne’e hametin liutan relasaun povu Timor Leste ho Indonézia iha área fronteira no hametin liutan amizade maun alin nian.

Amizade la’os deit liu husi eskola nomos iha negosia sasan ninian ne’ebé Timor Leste ho Indonézia iha historia ne’ebé mak naruk tebes.

Iha enkontru ne’e, partisipa mós husi membru parlamentu nu’udar prezidenti komisaun lima ba asuntu infraestrutura no akompaña husi embaixadór indonézia iha Timor- Leste Sahat Sitorus.Eus