SekJer UDT substitui Gilman Exposto iha PN

Partidu União Democrata Timorense (UDT), liu husi reuniaun extraordenária, deside ona Sekretáriu Jerál (SekJer) partidu UDT nian, Francisco David Carlos alias Abono Ramkabian atu substitui matebian Gilman Exposto dos Santos, nu’udar deputadu iha Parlamentu Nasionál (PN), durante mandatu kinta lejislatura.

Atual Sekretáriu Jerál UDT ne’e, espresa nia sentimentu tristeza, tanba la espera atu bele substitui deputadu Gilman iha mandatu klaran.

Francisco David haktuir, iha momentu UDT hamutuk iha koligasaun FDD, hetan kadeira ida iha PN, matebian rasik sujere nia parte atu tu’ur iha PN, maibé nia parte lakohi, tanba kompetensia ema primeiru iha partidu nia direitu.

“Tuir estatutu partidu nian hatete ona katak, segunda pessoa iha partidu mak bele substitui Gilman Exposto dos Santos, nune’e iha mós reuniaun estraordináriu ida horseik, (horbainrua-red) husi UDT tomak nomeia ona ha’u, tanba segundu pessoa iha partidu, para atu substitui Sr.Gilman Exposto nia fatin, iha uma fukun PN. Tuir informasaun iha karta ne’ebé ami haruka ona ba Prezidente PN, para subtituisaun ne’e komesa loron 29, bainhira hahú disksaun jeneralidade iha Orsamentu Jerál Estadu”, informa Francisco David ba jornalista sira iha PN, Tersa (26/11/2019).

Abono Ramkabian haktuir, durante ne’e, matebian konsege rai hela mensajen ba kuadrus partidu UDT, atu kontinua servisu maka’as, hodi nune’e garante nafatin UDT atu la’o ba oin.

“Sr.Gilman ko’alia bebeik ha’u, keixa kona-bá nia sofre tensaun no korasaun ne’e, depois ikus nia mós problema stomuck hotu, maibé fila husi konsulta, nia dehan buat hotu di’ak, maibé ohin hanesan ne’e, ha’u sente triste tebes ho substituisaun ne’e, maske iha inísiu Prezidente Gilman haruka ha’u mak atu ba deputadu, maibé ha’u dehan labele ne’e previllezu ba Prezidente, kuandu partidu hetan asentu, nia la’os ema ida ne’ebé interesadu sai deputadu, altura nia propoin mak ha’u. Nia sempre dehan katak, agora tempu ona para UDT tenke la’o ba oin, depois nia mensajen, forma ekipa ami desloka ba Munisípiu, ho programa, tanba ami nia kongresu mós atu hahú ona, nia hatete dehan, atu foti delegadus kada Munisípiu, hodi tuir kongresu ema rua 25 kada Munisípiu, ida ne’e mak nia haruka ami halo servisu maka’as tan, maun Gilman mak mate, maibe UDT sei la mate iha futuru, no sei forte nafatin”, tenik David Carlos.

Entertantu, liu husi reunaiun estraordenáriu ne’ebé hala’o iha Segunda ne’e, kuadrus UDT mós nomeia ona Rodolfo Aparicio Guterres nu’udar Prezidente Interinu partidu UDT nian.

Aleinde ne’e, iha Kuarta semana ne’e, sei realiza misa ba matebian deputadu Gilman Exposto dos Santos, hafoin ne’e sei ba iha sede UDT Palapasu, no kontinua kedas ba iha uma fukun Parlamentu Nasionál, hodi fó omenajen ikus husi deputadu sira kinta lesislatura, no remata sei ba haloot iha nia fatin deskansa ikus Bekusi.say